1 Usen kiet Jisọs ama obuk mbuk ọnọ mme mbet Esie ndiwut ntak emi mmọ ekpebọñde akam kpukpru ini, ye ndinyuñ ñwut mmọ ñko nte ke mmọ esuk enyene ndiyire ke ubọñ akam tutu mmọ ebọ ibọrọ.

2 Enye ama ọdọhọ ete, ke obio kiet ekpe ikpe kiet ama odu emi mikebakke Abasi, inyuñ ibatke owo ndomokiet ke ñkpọ. 3 Ndien ebekpa kiet ama onyuñ odu ke obio oro, emi esikade ekekpe ekpe ikpe emi ubọk oyom unen esie. Onyuñ ọdọhọ ete, "Biere unen nọ mi ye asua mi." 4 Ama ebighi ekpe ikpe emi ikenyimeke ndinam ebeñe ebekpa oro. Edi ke akpatre, enye ama ọdọhọ idem esie ete, "Okposuk edi emi mme mbakke Abasi ñnyuñ ndaha ndomo owo kiet ke baba ñkpọ ndomokiet, 5 edi sia ebekpa emi osuk akade iso ndifina mi, ami ñyekut nte ke enye enyene unen esie, man enye editimede mi aba ke uyire uyire edidi esie."

6 Ndien Ọbọñ ama aka iso ke ikọ Esie, onyuñ ọdọhọ ete, "Ekpañ utọñ ekop se ekpe ukwañ ikpe oro ọkọdọhọde. 7 Nte mbufo ikereke ite ke Abasi akpanikọ eyenọ ikọt Esie emi ekpede Enye ubọk okoneyo ye uwemeyo utebe ikpe? Nte Enye eyebighi ndibọrọ mmọ? 8 Yak ndọhọ mbufo, ke enye eyebọrọ iwiwa, onyuñ ọnọ mmọ utebe ikpe. Nte ededi, mme Eyen Owo ama edi, mme Enye eyekut mbuọtidem ke isọñ?"

9 Ntem ke Jisọs eketiñ mbuk emi ọnọ ndusuk mmọ emi eburede mbure ebaña idem mmọ, nte ke mmimọ imọfọn ikan, enyuñ ese mbon efen ke usuhọde itie.

10 "Owo iba ekedọk eka ubọñ akam ke itie ukpono Abasi, kiet ekedi owo ntañidem, mfọnmma owo Farisi, ndien enye eken ekedi owo ñwo, ọbọ utomo.

11 Mfọnmma owo ntañidem Farisi adaha ada ọbọñ akam esie ntem, ‘Mmọkọm Fi Abasi, ami ndighe anam idiọkñkpọ nte mme mmọ eken, akpan akpan nte adia ñwo ọbọ etibe ukara emi osuk adade ko. Koro akananam ntukke owo, akananam nsinke efibe. 12 Ntetre udia ikaba ke urua kiet, ñnyuñ nnọ Abasi ọyọhọ ubak kiet ke mbak duop mi ke ñkpọ ekededi emi ọnọde mi okuk.’ "

13 "Edi ọbọ utomo ama ada nsan nsan ke anyan ebiet inyuñ imaha ndimenede enyin esie nse enyọñ, edi ke ini enye ọbọñde akam, enye ọbọñ ye ọkpọsọñ mfuhọ, amia ubọk esie mbiba ke esit eseme ete, ‘Abasi, tua mi idiọk owo Fo mbọm,’ 14 Ami ndọhọ mbufo nte ke idiọk owo emi, idighe owo Farisi eken, ama ọnyọñ ufọk esie ye edidahadonnọ, koro eyesuhọrede mbon ntañidem, edi eyekpono mbon nsuhọdidem."

15 Ndusuk mme eka nditọ ema emen ñkpri nditọ mmọ esọk Jisọs man Enye odori mmọ ubọk onyuñ ọdiọñ mmọ. Ke ini mme mbet Esie ekekutde emi, mmọ ema esua enọ mme eka nditọ emi.

16 Edi Jisọs ama okot ñkpri nditọ etiene Enye, onyuñ ọdọhọ mbet Esie ete, "Eyak ñkpri nditọ etiene Mi, ekubin mmọ, koro Obio Ubọñ Abasi enyene mme mmọ emi enyenede oruk esit emi etiede nte esit nditọ ọwọñ emi. 17 Eti emi! Owo ekededi emi midibọhọ Obio Ubọñ Abasi nte ekpri eyen ididukke ke esit."

18 Ada usuñ kiet ke otu mme Ju ama obup Jisọs ete, "Eti Andikpep, ami ndinam nso man ñnyene nsinsi uwem?"

19 Jisọs ama obup enye ete, "Nsidi ntak afo okotde Mi eti? Owo baba kiet idighe eti, ke ebede Abasi ikpọñ ikpọñ.

20 Afo ọmọfiọk mme mbet? ‘Kusin efibe, kuwot owo, kuyip inọ, kutie ntiense nsu, kpono usọ ye uka.’ " 21 Owo oro ama ọbọrọ Enye ete, "Mma nnenim kpukpru emi toto ke uyen mi."

22 Ke ini Jisọs okokopde ibọrọ esie, Enye ama ọdọhọ enye ete, "Afo amanana ñkpọ kiet. Nyam kpukpru inyene fo ñnyuñ da okuk oro nọ mme ubuene ndien afo eyenyene ekese inyene ke Obio Abasi, ndien di di tiene Mi."

23 Edi ke ini owo oro okokopde ikọ emi enye ama adaha ọnyọñ esie ye mfuhọ koro enye ekedide akwa enyene ñkpọ owo. 24 Jisọs etim owuk enyin ese nte enye ọkọnyọñde ndien Enye ama ọdọhọ mme mbet Esie ete, "Ọsọñ adaña didie ye mbon inyene ndiduk ke Obio Ubọñ Abasi! 25 Emem eti eti ibuot enañ ndibe ke odudu abiabon akan owo inyene ndiduk ke Obio Ubọñ Abasi."

26 Mmọ emi ekekopde Enye etiñde ntem ema ebup ete, "Edieke ọsọñde ntem, anie owo ndien ke edinyaña?"

27 Jisọs ama ọbọrọ ete, "Abasi ekeme ndinam se mme owo mikemeke ndinam."

28 Ndien Pita ama ọdọhọ Enye ete, "Ñnyin ima ikpọñ kpukpru se ñnyin ikenyenede idaha itiene Fi."

29 Jisọs ama ọdọhọ mmọ ete, "Ami ntiñ akpanikọ nnọ mbufo, baba owo ndomokiet emi ọkpọñde ufọk, mme ñwan, mme eyen eka, mme ete ye eka, mme nditọ ke ntak Obio Ubọñ Abasi, iditreke ndibọ se iwakde ikan oro ke emana emi.

30 Ndien ke emana enye emi edidide, enye eyenyene nsinsi uwem."

31 Jisọs ama ọwọñọde ada ye mme mbet Esie duopeba, onyuñ ọdọhọ mmọ ete, "Ekpañ utọñ! Ñnyin ika Jerusalem, ke ebiet emi kpukpru se mme Asiak Uduak Abasi ekewetde ebaña Eyen Owo ediwọrọde isu. 32 Eyemum Enye eyak enọ mme mmọ emi mibakke Abasi, emi edidade Enye itọ ndọk, eyesuñi Enye, enyuñ efiari Enye etap. 33 Mmọ eyemia Enye enyuñ ewot Enye, edi ke ọyọhọ usen ita Enye eyeset ke ñkpa onyuñ ọtọñọ ntak odu uwem."

34 Mme mbet ikọfiọkke se mme ikọ Esie ekewọrọde. Ema edip mmọ se mme ikọ emi ewọrọde. Ndien mmọ ikọfiọkke se Enye eketiñde abaña.

35 Nte Jisọs akasañade ekpere Jeriko, owo nnan kiet eketie ke mben usuñ ke ebeñe mme aka isañ ñkpọ. 36 Ke ini enye okopde uyom otu owo nte eyomode ebe, enye ama obup se ikekade iso. 37 Mmọ ema edọhọ enye ete, "Jisọs eyen Nasaret ke ebe." 38 Ntre ke enye ọkọtọñọ ndifiori, "Jisọs eyen Defid, tua mi mbọm!"

39 Otu owo emi ekebemde Jisọs iso ema eñwana ndiduat enye man enye okibi inua, edi enye etetim ofiori ke ọkpọsọñ uyo, "Eyen Defid, tua mi mbọm!"

40 Do Jisọs ama atuak ada, onyuñ ọdọhọ ete yak eda owo nnan oro esọk Imọ. Ke ini enye akasañade ekpere, Jisọs ama obup enye ete, 41 "Afo oyom Ami nnam nso nnọ fi?" Enye ama ọbọrọ ete, "Ọbọñ, ami ñyom ndikut usuñ"

42 Ndien Jisọs ama ọbọrọ enye ete, "Kut usuñ; mbuọtidem fo amanam idem ọsọñ fi."

43 Kpa ndo ndo oro enye ama okut usuñ onyuñ etiene Jisọs, aka iso ndinọ Abasi ubọñ. Ke ini kpukpru owo ekekutde utibe ñkpọ emi, mmọ ñko ema enyuñ etoro Abasi.