1 Jisọs ama ọdọhọ mme mbet Esie ete, "Owo inyene kiet ama odu emi eketiñde idiọk ikọ ebaña akama ukpọhọde esie nte abiatde inyene esie.

2 Ntre ke eteufọk esie okokot enye, onyuñ obup enye ete, ‘Nso ke ami ñkop emi mbaña fi? Nam ibat ukama ñkpọ fo nọ mi idahaemi, koro afo ududighe aba akama ukpọhọde mi.’ "

3 "Akama ukpọhọde emi ama ọdọhọ ke esit esie ete, Nso ke ami ndinam idahaemi? Eteufọk mi ọbọ mi utom mi. Ami ñnyeneke iñwek emi ñkemede nditibi isọñ, ndien but idiyakke mi mbeñe ebeñe. 4 Ami mmọfiọk se ndinamde ke mma ñkpọñ utom emi, man mme owo ekpeda mi esin ke ufọk mmọ."

5 "Do ke enye okokot owo kiet kiet emi ekekamade eteufọk esie okuk. Enye ama obup akpa owo ete, ‘Okuk ifañ ke afo akama eteufọk mi?’ 6 Enye ama ọbọrọ ete, ‘Ñkpọ nte abañ aran ọlif ikie.’ Akama ukpọhọde ama ọdọhọ enye, ete ‘Bọ ñwed isọn fo Sọp idem fo idahaemi kpuhọde nam edi abañ aran aba ye duop.’ "

7 "Ndien enye ama obup ọyọhọ owo iba ete, afo akama ifañ? Enye ama ọbọrọ ete, ‘Ekpat ibokpot tọsin kiet.’ Enye ama ọdọhọ akama isọn oro ete, ‘Bọ ñwed isọn fo ñnyuñ kpuhọde nam edi ikie itiaita.’ "

8 "Ete ufọk idiọk akama ukpọhọde emi ama otoro enye eti eti ke enye ndibre mme utọ ñkari emi. Koro mbon ererimbot enyenede ñkari ndinam ufọn nnọ idem mmọ akan nditọ uñwana. 9 Yak ntiñ emi nnọ mbufo, nte eda mme mbiara inyene ererimbot ekọ mme ufan enọ idem mbufo, man kadaña emi mme inyene emi edikurede, ekpeda mbufo esin ke nsinsi ebiet iduñ." 10 Owo ekededi emi ekemede ndibuọt idem ye enye kabaña ekpri ñkpọ, ekeme ñko ndibuọt idem ye enye kabaña ediwak ñkpọ, ndien owo ekededi emi minamke akpanikọ ke ekpri ñkpọ, idinamke akpanikọ ke ediwak ñkpọ. 11 Ntem edieke owo mikemeke ndibuọt idem ye mbufo ke edikama inyene ererimbot, anie edibuọt idem ye mbufo ke se idide ata inyene?

12 Edieke munamke akpanikọ ke se inyenede owo efen, anie owo edinọ fi se inyenede fi?

13 "Baba eyen ufọk kiet ikemeke ndinam ñkpọ nnọ eteufọk iba. Enye enyene ndisua kiet ñnyuñ mma kiet eken, midighe ntre, enye enyene ndisin ifik nnam ñkpọ nnọ kiet, ñyak kiet. Mbufo ikemeke ndinam ñkpọ Abasi ye eke okuk inikiet."

14 Mme Farisi emi emade okuk eti eti esak Enye nsahi ke ema ekekop mme ikọ emi.

15 Ntem Jisọs ama ọdọhọ mmọ ete, "Mbufo ekam edi mme mmọ emi enamde idem nte mme ndinen owo ke enyin mme owo, edi Abasi ọdiọñọ esit mbufo, koro se owo ekerede ete edi ata nsọñurua ñkpọ, edi se midighe ñkpọ ndomokiet ke enyin Abasi." 16 Ema ekwọrọ mme ibet Moses ye se mme Asiak Uduak Abasi ekewetde tutu osim ini Jọn Babtis, edi ọtọñọde ke ini oro, ekekwọrọ Eti Mbuk Obio Ubọñ Abasi, ndien kpukpru mme andikop eduk Obio Ubọñ emi ke odudu. 17 Edi oro iwutke nte ke ibet inyeneke aba odudu esie ke usuñ kiet ekededi. Edi mmem mmem ñkpọ enyọñ ye isọñ ndibe mfep akan ntọi ikọ kiet ke ibet Moses ndiwuhọde ñwọrọ,

18 "Owo ekededi emi osiode ñwan esie ke ndọ, onyuñ ọdọde ñwan efen, esin efibe, ndien eren owo emi ọdọde ñwan emi esiode ke ndọ esin efibe."

19 Owo inyene kiet ama odu emi ekesinede ata nsọñurua ọfọñ ye ñkisi, onyuñ odu ñkoñkoñ uwem kpukpru usen. 20 Usen kiet ema emen Lasarọs emi ekedide ebeñe ebeñe, emi inia ọkọyọhọde ofuri idem esie ekenim ke enyin usuñ owo inyene oro: 21 "Enye akana do ye idorenyin ete ke iyetañ mbeñe udia emi eduọñọde eto okpokoro owo inyene emi idia, mme ebua ekenyene ndidi ndidei mme inia esie. 22 Ekem ke akpatre, ebeñe ebeñe oro ama akpa, ndien mme enjel ema emen enye eka ekenim ke ñkañ Ebraham. Owo inyene oro ama akpa ñko, ndien ema ebuk enye. 23 Ke ñkpọdiọhọ ikañ emi owo inyene emi okodude ke ndutuhọ, enye ama emenede enyin ese ndien enye ama okut Ebraham ko nsan nsan ye Lasarọs, ke ñkañ esie.

24 Do enye esin uyo okot ete, ‘Ete Ebraham, kop mi mbọm ñnyuñ dọñ Lasarọs ekedebi utit nnuen ubọk esie ke mmọñ ada edibit edeme mi, koro ami ndude ke akwa ubiak ke ikañ emi.’ "

25 "Edi Ebraham ama ọbọrọ enye ete; ‘Eyen, ti ete ke ofuri eyo uwem fo, afo ama enyene kpukpru nti ñkpọ ke ini Lasarọs ọkọbọde mme ndiọi ñkpọ, edi ke emi enye ke ọbọ inemesit kini afo odude ke ufen ye ndutuhọ. 26 Ndien akande oro, akamba ukpe odu mi ke ufọt ñnyin emi abaharede ñnyin ye mbufo ndien owo emi oyomde ndisaña nto mi ndi do ikemeke, owo inyuñ ikemeke ndibe inyañ do ndi ntiene ñnyin mi.’ "

27 "Enye ama ọbọrọ ete, ‘Do mmekpe fi ubọk, nte, dọñ Lasarọs aka ke ubon ete mi, 28 koro ami mmenyene nditọ ete iren ition. Yak enye okoduri mmọ utọñ abaña itie ndutuhọ emi ndude mi, man mmọ ñko edidi ediduk ke ndutuhọ emi ke mmọ ema ekpaña.’ "

29 "Edi Ebraham ama asian enye ete, ‘Mmọ enyene Moses ye mme Asiak Uduak Abasi yak mmọ ekpañ utọñ enọ mme mmọ oro.’ "

30 "Owo inyene ama ọbọrọ ete, ‘Baba Ete Ebraham, mmọ idimaha ndikop mmọ, edi edieke edọñde owo oto mi ke otu mme akpa ñkpa aka, mmọ eyekabade esit.’ "

31 "Edi Ebraham ama ọbọrọ enye ete, ‘Edieke mmọ mikpañke utọñ inọ Moses, ye mme oku Abasi eken, mmọ idikpañke utọñ, ekpededi owo eset ke ñkpa aka ebine mmọ.’ "