1 Ke usen ikọ Abasi mme Ju (Sabat) kiet, nte Jisọs ye mme mbet Esie ekesañade ebe ke iñwañ ibokpot kiet, mme mbet Esie ema etọñọ ndiwai mme ibokpot, ndien ebek, enyuñ efiak ke ubọk enyuñ efri mbio esio ndien mmọ eta idem ibokpot.

2 Edi ndusuk mme Farisi ema ebup mmọ ete, "Nsidi ntak emi mbufo enamde utọ ñkpọ emi edide ibet ke usen Sabat?"

3 Jisọs ama ọbọrọ mmọ ete, "Nte mbufo ikotke ibaña se Defid akanamde ke ini enye ye mme nsaña esie ekekopde biọñ? 4 Enye ama oduk ke esit ufọk Abasi, odorode uyo emi ekediọñde enim onyuñ ata se mbet ekenimde ọnọ mme oku ikpọñ ikpọñ ndita. Ndien enye onyuñ ọnọ mme nsaña esie ñko eta." 5 Do ke Jisọs ọkọdọhọ mmọ, ete, Eyen owo edi Ọbọñ Sabat.

6 Ke usen ikọ Abasi mme Ju (Sabat) efen Enye ama okoduk ekpri ufọk akam mme Ju onyuñ aka iso ndikpep ñkpọ, ndien owo ama odu do, emi ubọk nnasia esie akakpade. 7 Mme Farisi ye mme ekpep mbet ke ekeyom se edade edori Jisọs ikọ, do mmọ ema ekpeme Enye eti eti ndise mme Enye eyekọk udọñọ ke usen Sabat.

8 Edi Jisọs ama ọdiọñọ ekikere mmọ, ndien Enye ama ọdọhọ owo emi ubọk esie akpade, ete, "Daha da ke enyọñ ñnyuñ di ke iso kpukpru owo." Owo oro ama adaha akada do.

9 Do ndien Jisọs ama ọdọhọ mme Farisi ye mme ekpep ibet ete, "Ami mmenyene mbume ndibup mbufo, Ewe edi se inende ndinam ke usen Sabat, edinam eti mme edinam idiọk, edinyaña uwem mme edibiat uwem?"

10 Enye ama ọwọñọde enyin ese kpukpru mmọ kiet kiet akanade, ndien Enye ọdọhọ owo oro, ete, "Neñede ubọk fo." Enye ama anam ntre, ndien ubọk esie ama afiak enyene uwem onyuñ etie nte ekedide. 11 Edi esit ama ọdiọk mmọ eti eti, ndien mmọ etọñọ ndidiomi ke otu mmọ mbaña se ekemede ndinam ye Jisọs.

12 Edikem usen kiet ke ñkpọ emi ama ekebe; Jisọs ama ọdọk aka ke enyọñ akamba obot ndibọñ akam ndien Enye ama ọbọñ akam ofuri okoneyo oro. 13 Ndien ke eyo ama ekesiere, Enye ama okot kpukpru mbet Esie, onyuñ emek owo duopeba osio, mmọ emi Enye okokotde mme Isuñutom (Ọbọsuru) 14 Emi edi enyiñ mmọ; Saimọn, emi Enye okosiode enyiñ Pita, ye eyen eka esie Andru, Jems, Jọn, Filip, Batolomiu.

15 Matiu, Tọmọs, Jems, eyen Alfiọs, Saimọn emi ekekotde Ama-obio. 16 Judas ye Jems, ye Judas Iskariọt emi ekedide anditap Kraist.

17 Enye ama ọsuhọde ye mmọ akada ke unaisọñ. Akamba udim mme mbet, ye ata ediwak ibat owo emi eketode ofuri Judia, ye Jerusalem, ye ke mben akpa Taya ye Sidọn, 18 emi ekedide ndikop Enye ñnyuñ mbọ Usọbọ ke mme udọñọ mmọ. 19 Owo kiet kiet ekeñwana ndituk Enye, koro odudu ke ọkọwọrọ Enye ke idem, onyuñ ọkọk kpukpru mmọ.

20 Ntem ke Enye ọkọwọñọde ese mme mbet Esie, onyuñ ọdọhọ ete, ọfọfọn ọnọ mbufo emi edide ubuene, koro Obio Ubọñ Abasi enyenede mbufo. 21 Ọfọfọn, ọnọ mbufo emi ekpade biọñ idahaemi koro eyenam mbufo eyuhọ. Ọfọfọn ọnọ mbufo emi etuade eyet idahaemi, koro mbufo eyesak imam. 22 Ọfọfọn ọnọ mbufo ke ini mme owo esuade mbufo, ke ini mmọ ediañarede mbufo ke idem mmọ efep ndien esuñi mbufo, enyuñ esin enyiñ mbufo nte enyiñ idiọkñkpọ, ke ntak Eyen owo, Jisọs. 23 Edara ke usen oro, enyuñ efrọ ke ntak inemesit, koro utib mbufo okponde ke enyọñ. Koro kpa ntre ke mme ete mmọ ekenam ye mme Asiak Uduak Abasi.

24 Edi ọdọdiọk ọnọ mbufo mbon inyene, koro mbufo ema ebebọ idọñesit mbufo.

25 Ọdọdiọk ọnọ mbufo mbon uyuhọ idahaemi, koro mbufo eyesaña biọñ. Ọdọdiọk ọnọ mbufo emi esakde imam ke emi, koro mbufo eyefuhọ enyuñ etuaña. 26 Ọdọdiọk ọnọ mbufo kadaña emi kpukpru owo etiñde eti ikọ ebaña mbufo, koro kpa ntre ke mme ete mmọ ekenam ye mme nsu nsu mme Asiak Uduak Abasi.

27 "Edi Ami ntiñ emi nnọ mbufo emi ekopde ikọ mi: Ema mme asua mbufo, enyuñ enam eti ñkpọ enọ mme mmọ emi esuade mbufo. 28 Ediọñ mme mmọ emi esuñide mbufo, enyuñ ebọñ nti akam ebaña mmọ emi enamde ntime ye mbufo.

29 Edieke owo amiade mbufo ke mfuk ñkañ kiet, ewọñọde ñkañ eken ñko enọ enye amia. Edieke owo ọbọde fi ewura fo, nọ enye ekpri ọfọñ idak idem fo ñko. 30 Enọ owo ekededi emi obupde mbufo ñkpọ, ndien edieke owo ekededi emende se inyenede fi, kutọñọ ntak ubọ enye. 31 Enam ye mbon efen nte emi mbufo eyomde mmọ enam ye mbufo."

32 "Ndien edieke mbufo emade mmọ emi emade mbufo, nso itoro ke oro ada ọnọ mbufo? Kpa idem mme anam idiọkñkpọ, ema mmọ emi emade mmọ. 33 Ndien edieke mbufo enamde ufọn enọ mmọ emi enamde ufọn enọ mbufo, nso itoro ke oro ada ọnọ mbufo? Kpa idem mme anam idiọkñkpọ enam kpa ntre. 34 Ndien edieke mbufo ebuọtde mme mmọ emi ekemede ndifiak ñkpe mbufo okuk oro, nso oruk itoro ke oro ada ọnọ mbufo? Idem mme ata ndiọi owo enyuñ ebuot mme ndiọi owo nte mmọ, man mmọ etọñọ ntak ebọ ukem se mmọ ekenọde.

35 Edi mbufo ema mme asua mbufo, enam nti ñkpọ enọ mmọ, enyuñ ebuọt mmọ ekuyom ndifiak mbọ. Ke ntre ke utib mbufo edikpon, ndien mbufo eyedi mme nditọ iren Jihofa Andikoñ ñkan, koro Enye ọfọfọn ido ye idiọk owo, emi ananade esit ekọm.

36 Ewut esit mbọm nte emi Ete mbufo owutde mbọm. 37 Ekusioño owo ndo mme ndinim owo ke usuhọde itie, midighe ntre kpukpru se enamde eyefiak etiene mbufo. Esaña emem emem ye mmọ efen; ndien mmọ eyenam kpasuk ntre ye mbufo. 38 Enọ, ndien eyenyuñ enọ mbufo. Eti udomo emi efikde enyuñ enyeñe ebuak tutu ọyọhọ ọduọi, ke ediñwaña idọñ mbufo ke ubọk. Koro kpa udomoñkpọ emi afo adade odomo ke edida idomo inọ fi."

39 Enye ama ọtọñọ ntak etiñ mme ikọ emi ke ñke ọnọ mmọ. "Nte nnan ekeme ndida nnan usuñ? Nte mmọ mbiba ididuọñọke iduk obube? 40 Enye emi ekpepde ñkpọ ikemeke ndikpon ñkan andikpep enye, edi owo ekededi emi ama ọkọbọ ukpepñkpọ nte ekemde enyene ndibiet andikpep mmọ."

41 "Ndien nsidi ntak emi afo esede ekpri mbio emi esinede ke enyin eyenete fo edi ukereke ubaña akamba mbio emi esinede ke enyin fo? 42 Ekeme didie ndidọhọ eyen ete fo ete, eyen ete, yak nsio fi ekpri mbio oro ke enyin fo, ke ini afo ke idem fo etrede ndikut akamba mbio emi odude fi ke enyin? Afo owo mbubik, bem iso sio akamba mbio ke enyin fo, ndien afo eyekut usuñ ọfọn ndisio ekpri mbio emi odude ke enyin eyenete fo."

43 "Eti eto ndomo kiet iñwumke idiọk mfri, kpa ntre ñko, idiọk eto ikemeke ndiñwim eti mfri. 44 Eda mfri eto ediọñọ eto. Ibọñ ikemeke ndiñwum ndiya, mme sokoro ndiñwum eben. 45 Eti owo osioño nti ñkpọ oto ke mme nti ñkpọ emi enye ekedipde ke esit esie, ndien oburobut owo onyuñ osioño ndiọi ñkpọ oto ke mme ndiọi ñkpọ emi enye ekedipde ke esit esie, koro oto ke uyọhọ esit, inua etiñ ikọ."

46 "Ntak emi mbufo ekotde Mi, ‘Ọbọñ, Ọbọñ,’ edi inamke se Ami ndọhọde-e? 47 Ami mmọñ ñwut mbufo se enye emi edide etiene Mi onyuñ okop ikọ Mi ndien esin ke edinam ebietde. 48 Enye ebiet owo emi ọbọpde ufọk, emi eketibide isọñ ọtuñọ, ndien enye esin itiat idak isọñ ke enyọñ itiat. Ke ini emi ukwọ ọtọde, oyobio onyuñ ebere ufọk oro, edi ikemeke ndinyeñe enye, koro ema ebọp enye ọfọn.

49 Edi enye emi okopde ikọ Mi, ndien idaha isin ke edinam, ebiet owo emi ọbọpde ufọk esie ke ini enye misinke itiat idak isọñ. Ndo ndo emi oyobio eberede ke ufọk oro, enye owure onyuñ abiara ama."