1 Ini usọrọ ube inyañ, oro edi ini usọrọ emi mme Ju etade uyo emi enamde, emi owo misinke ibọk umenere ebok uyo, ama ekpere. 2 Ndien mme ikpọ oku ye mme ekpep mbet mme Ju ke ekeñwañwana ndiyom usuñ ndiwot Jisọs; edi mmọ ekebak mme otu owo.

3 Do ke Setan okoduk esit Judas, emi ekekotde Iskariọt, emi ekedide kiet ke otu mme mbet duopeba. 4 Ndien Judas ama adaha ebine mme ikpọ oku ye ikpọ mbon emi ekpemede itie ukpono Abasi oduk odu ye mmọ abaña usuñ nte enye edikemede nditap Jisọs. 5 Mmọ ema edara eti eti, enyuñ ebiere ndinọ enye okuk. 6 Judas ama enyime ntre, onyuñ ọtọñọ ndiyom eti ifet nditap Jisọs nnọ mmọ ke usuñ nte mme otu owo midifiọkke ibaña.

7 Usen usọrọ emi mme Ju esitade uyo emi ibọk umenede ebok uyo miduhe ama edisim, kpa ini emi enyenede ndiwot eyen erọñ ndia usọrọ uwọrọ ufin. 8 Jisọs ama osio Pita ye Jọn ọdọñ, onyuñ ọdọhọ mmọ ete, "Eka ekenam mbeñeidem enọ ñnyin ndidia usọrọ ube inyañ."

9 Mmọ ema ebup Enye ete, "Mmọñ ke Afo oyom ñnyin ikanam ndutim emi?"

10 Ndien Enye ama ọbọrọ ete, "Nte mbufo edidukde obio, eren owo kiet emi obiomde otu mmọñ eyesobo ye mbufo. Etiene enye ekesim ufọk emi enye edidukde.

11 Enyuñ edọhọ enyene ufọk ete, ‘Andikpep ọdọhọ yak afo owut ñnyin ufọk isen, man imọ ikpadia usọrọ ube inyañ ye mme mbet imọ do.’ 12 Enye eyeda mbufo okowut akamba ubet enyọñ emi ema eketetim ema. Do ke mbufo editim kpukpru ñkpọ ibeñe ñnyin."

13 Mmọ ema eka obio enyuñ ekekut kpukpru ñkpọ kpasuk nte Jisọs ọkọdọhọde mmọ, ndien mmọ ema etem udia mbubreyo usọrọ ube inyañ.

14 Ke ini ñkanika ama ekekem, Jisọs ama etie ke okpokoro ye mme mbet Esie.

15 Ndien Enye ama ọdọhọ mmọ ete, "Ami menyene ata udọñ ndidia usọrọ ube inyañ emi ye mbufo mbemiso Ami ntọñọ ndibọ ndutuhọ. 16 Koro Ami ndọhọ mbufo idahaemi nte ke ndidiaha usọrọ emi aba tutu esio se enye ọwọrode ewut ko ke Obio Ubọñ Abasi."

17 Ke Enye ama ekemen kọp, Enye ama ọnọ Abasi ekọm onyuñ ọdọhọ ete, "Ebọ kọp emi enyuñ edeme enye ke otu mbufo. 18 Koro mọdọhọ mbufo nte, ke Ami ndiñwọñke aba nto mfri vain, tutu Obio Ubọñ Abasi edi."

19 Ndien Enye ama emen uyo, ọnọ Abasi ekọm, ndien obuñ, onyuñ ayak ọnọ mmọ, ọdọhọ ete, "Emi edi ikpọk idem Mi, emi ñyakde nnọ mbufo, enam emi ke nditi Mi."

20 Kpasuk ke ukem usuñ oro ke ema ekedia udia mbubreyo ema, Enye ama emen kọp, onyuñ ọdọhọ ete, "Kọp emi edi obufa ediomi Abasi emi edade iyip Mi emi nduọkde nnọ mbufo esọñọ. 21 Edi ubọk owo emi editapde Mi odu kiet ye Okim ke okpokoro emi. 22 Eyen Owo eyekpa nte ekebierede enim, edi ọdọdiọk ọnọ owo emi editapde Enye."

23 Mme mbet ema etọñọ ndibup mbume ke otu mmọ mme anie owo ke otu mmimọ ekeme ndinam oruk ñkpọ ntre.

24 Ndien mmọ ema etọñọ ñko ndineni ke otu mmọ mme anie owo ke ekpekere nte andikpon ñkan.

25 Jisọs ama ọdọhọ mmọ ete, "Mboñ ererimbot enyene odudu ukara ke idem ikọt mmọ, ndien ekot mme akara ukara emi Iberedem! 26 Edi inyeneke ndidi ntre ye mbufo. Akam ana edi nte enye emi okponde ke otu mbufo enyene ndikabade ntie nte ekpri eyen ọwọñ, ndien enye emi akarade akabade etie nte enye emi enyenede ndinam ñkpọ nnọ mme mmọ eken. 27 Anie edi andikpon ñkan, enye emi etiede ke okpokoro ndidia udia, mme enye emi adade ke okpokoro? Nte idighe enye emi etiede ke okpokoro adia udia? Edi Ami ndu ke otu mbufo nte Enye emi adade ke okpokoro. 28 Mbufo edi mme mmọ emi ekedade ye Ami ke kpukpru ini idomo Mi. 29 Ndien kpa nte Ete Mi ama ọkọnọ Mi unen ndikara, kpa ntre ke Ami ndinam ukem ediomi emi ye mbufo. 30 Mbufo eyedia enyuñ enwọñ ke okpokoro Mi ke Obio Ubọñ Mi, ndien mbufo eyetie ke mme ebekpo enyuñ ekpe ikpe enọ ufọk Isrel duopeba."

31 "Saimọn kpañ utọñ, Setan ọmọbọ edinyime ndidomo kpukpru mbufo, kpa nte ọtọ iñwañ asatde ñkpasip ibokpot osioño ke ikpọk. 32 Edi Ami mmekpe ubọk ke akam mbaña fi Saimọn, nte yak mbuọtidem fo okukpu. Ndien ke ini afo udutọñọde ntak ufiak utiene Mi, Afo enyene ndinam mme nditọ ete fo ekop odudu."

33 Pita ama ọbọrọ ete, "Ọbọñ, ami mebeñe idem ndika ñkpọkọbi ye Afo, ye ndinyuñ ñkpa ye Afo."

34 Edi Jisọs ama ọbọrọ ete, "Ami ndọhọ fi, Pita nte, mbemiso ekikọ ọkpọk mfin emi, afo eyekañ Mi ikata ete ke imọ idiọñọke Mi."

35 Ndien Jisọs ama obup mmọ, ete, "Ke ini emi Ami ñkọdọñde mbufo ewọrọ ke ini oro, ñnyuñ ndọhọ mbufo ekukama ekpat usin okuk, ekukọñọ ekpat, mme ikpaukot, nte mbufo ema enana baba ñkpọ ndomokiet?" Mmọ ema ebọrọ ete, "Ñnyin ikenanake ñkpọ ndomokiet."

36 Enye ama ọdọhọ mmọ, "Edi idaha emi edieke mbufo enyenede ekpat usin okuk emen ekama, ye ekpat isañ nde, ndien edieke mbufo minyeneke akañkañ, enyam ewura mbufo enyuñ edep kiet. 37 Yak Ami ntiñ emi nnọ mbufo itie ñwed Abasi emi ọdọhọde ete, ‘Ekesin Enye ke otu mme oburobut owo,’ enyene ndiwọrọ nsu Mi ke idem. Ih, koro kpukpru se ekewetde ebaña Mi ke esesu."

38 Mme mbet Esie ema edọhọ, "Ọbọñ se akañkañ iba mi." Jisọs ama ọbọrọ ete, "Oro ekem ndien."

39 Jisọs ama ọwọrọ ke esit obio kpa nte Enye akam esinamde, aka ke obot Ọlif, ndien mme mbet ema etiene Enye. 40 Ke Enye ama ekesim itie emi, Enye ama ọdọhọ mmọ ete, "Ebọñ akam man mbufo ediduọñọ eduk ke idomo."

41 Enye ama adaha asaña ọkpọñ mmọ, ke ñkpọ nte ikpat ifañ, ọtọñọ edọñ onyuñ ọbọñ akam. 42 "Ete, edieke afo enyimede, bọ Mi kọp emi fep; okposuk edi oro idighe uduak Mi edi Okuo, enyene ndisu." 43 Enjel kiet ama ọsuhọde oto enyọñ ọwọrọ Enye ke iso, onyuñ ọnọ Enye nsọñidem. 44 Ndien sia Enye okodude ke ọkpọsọñ mmum, Enye ama ọbọñ akam ke ofuri esit, ndien ibibiak Esie eketie nte mme ntọi iyip eduọhọ ke isọñ. 45 Ke Enye ama ekekure akam, Enye ama afiak edem ebine mme mbet Esie, ndien ekesim mmọ nte edede idap oto ke mba mfuhọ.

46 Enye ama obup mmọ ete, "Ntaha mbufo edede-e? Edaha ke enyọñ ebọñ akam man mbufo ediduọ eduk ke idomo."

47 Ke adaña emi Jisọs akakade iso nditiñ ikọ, mme udim owo ema esaña edi, ndien owo emi ekekotde Judas, emi ekedide kiet ke otu mme mbet duopeba, akada mmọ usuñ, ndien enye ama asaña ebine nditim Jisọs inua.

48 Edi Jisọs ama obup enye ete, "Judas, nte afo oyom nditap Eyen Owo ke ntiminua?"

49 Ke ini mme mbet emi ekedude ye Jisọs ekekutde se ikeyomde nditibe, mmọ ema ebup ete, "Nte ñnyin isioño akañkañ ñnyin ikpeñe owo? Ñnyin ima ida mme akañkañ oro idi." 50 Ndien owo kiet ke otu mmọ ama ekpi eyen ufọk akwa oku utọñ ubọk nnasia esie osibe.

51 Edi Jisọs ama ọdọhọ enye ete, "Ekem!" Ndien Enye ama otuk owo oro utọñ onyuñ ọkọk enye. 52 Do ke Jisọs ọkọdọhọ ikpọ oku, mme mbon ekọñ emi esikpemede Edisana Ebiet ye mme mbuot emi ekedide ndimum Enye ete, "Nte Ami ñkebe iso nnọ mbio ndutime, emi esinde mbufo edi ebine Mi ye akañkañ ye eto eñwan? 53 Ami ñkosuk ndodu ye mbufo ke Edisana Ebiet kpukpru usen, edi mbufo ikedomoke ndimum Mi, edi emi edi ekem ini mbufo ndinam ñkpọ, kadaña emi odudu ekim adade ukara."

54 Mmọ ema emum Enye enyuñ eda Enye eka ke ufọk ñkoññkan oku; ndien Pita ama etiene asaña ko nsan nsan. 55 Ema ebara ikañ ke esit okure ñkoññkan oku emi, ndien Pita ama etiene mme mmọ efen etie ewebe ikañ.

56 Ke ini ekpri eyen añwan kiet emi okoduñde do okokutde Pita nte ekewebede ikañ, enye ama owuk enyin ese enye onyuñ ọdọhọ ete, "Se owo oko okodu ye Enye."

57 Edi Pita ama akañ onyuñ ọdọhọ ete, "Eyenañwan, ami ndiọñọke Enye."

58 Ke esisit ini ama ekebe, eyen eren kiet ama okut Pita, onyuñ ọdọhọ ete, "Afo ñko edi owo mmọ kiet!" Edi Pita ama ọbọrọ ete, "Erenowo, ami ndighe."

59 Ñkpọ nte ini ñkanika kiet ama ekebe, erenowo efen, ama etiñ eyire ọkpọsọñ ete, "Eyighe ndomokiet iduhọ nte ke owo emi okodu ye Jisọs, koro enye ñko otode Kalili."

60 Edi Pita ama ọbọrọ ete, "Da owo, ami ndiọñọke se afo etiñde oro abaña." Nte enye okosuk etiñde mme ikọ emi, ekikọ unen ama ọkpọk.

61 Ọbọñ Jisọs ama ọwọñọde enyin ese Pita nnen nnen. Do ke Pita eketi mme ikọ emi Ọbọñ eketiñde ye enye, ete, "Mbemiso ekikọ unen ọkpọk mfin, afo eyekañ Mi ikata." 62 Ndien Pita ama ọwọrọ ọkpọñ esit okure akada ke añwa atua eyet etieti.

63 Mme mmọ emi ekekpemede Jisọs ema etọñọ nditọ Enye ndọk ye ndinyuñ mmia Enye. 64 Mmọ ema ebọp Enye ọfọñ ke enyin enyuñ ebup Enye ete, "Kut ñkukut, mme anie emia Fi." 65 Ndien mmọ ema etiñ mme ediwak ikọ emiom ye Enye.

66 Ke ndañnsiere esop mme mbuot mme Ju, emi esinede mme ikpọ oku ye mme ekpep mbet, ema esobo, ndien ema eda Jisọs ewọrọ edi ke iso mmọ. 67 Mmọ ema ebup Enye ete, "Edieke edide Afo edi Kraist (Andinyaña), tiñ nnọ ñnyin." Jisọs ama ọbọrọ ete, "Edieke Ami ntiñde nnọ mbufo, mbufo idinimke Mi ke akpanikọ. 68 Ndien edieke Ami mbupde mbufo, mbufo idibọrọke. 69 Edi ọtọñọde ke emi, eyenọ Eyen Owo itie ke ubọk nnasia Abasi Ete Andikpon ñkan."

70 Kpukpru mmọ ema ebup ete, "Nte Afo ndien edi Eyen Abasi?" Enye ama ọbọrọ, ete, "Mbufo emenen ke ndidọhọ ete ke Ami ndi Eyen Abasi."

71 Do ke mmọ ekedọhọ, ete, "Nsidi ntak emi ñnyin ikpeyomde mme ntiense efen? Ñnyin imokop mme ikọ emi ito ke idem inua Esie."