1 Usen kiet Jisọs ama okot mme mbet Esie duopeba obon ebiet kiet, onyuñ ọnọ mmọ odudu ndikara nsio nsio odudu ndiọi ekpo ye eke ndem ye odudu ndibin mmọ nsioño mme owo ke idem ye odudu ndikọk kpukpru udọñọ ñko. 2 Ndien Enye ama osioño mmọ ọdọñ man ekekwọrọ ikọ ebaña Obio Ubọñ Abasi, ekenyuñ ekọk udọñọ.

3 Enye ama ọdọhọ mmọ ete, "Ekukama ñkpọ ndomokiet eka isañ emi, ekukama esañ, ekukama ekpat, ekukama uyo, ekukama okuk, ekukama ukpuhọ ọfọñ. 4 Ufọk ekededi emi edidukde, eduñ do tutu mbufo ekpọñ obio oro.

5 Ebiet ekededi emi owo midarake mbufo, ekpọñ obio oro, enyuñ ekeñ ntan ikpat mbufo ke ini mbufo ekpọñde man ekpedi ñkpọ ntiense abaña mmọ." 6 Ntre ke mmọ eketọñọ isañ ukwọrọ ikọ ñkanade: eto ke obio iñwañ kiet eduk ke obio iñwañ efen, ekọk udọñọ ke kpukpru mme ebiet emi mmọ ekedukde.

7 Erọd, andikara Kalili, ama okop abaña kpukpru mme ñkpọ emi akakade iso, ndien ekikere ama etimede enye eti eti, koro ndusuk owo eketiñde ete ke ema enam Jọn eset ke ñkpa. 8 Ndusuk owo eketiñ ete ke Elaiya akam afiak edi, ndien mme mmọ eken nde eketiñ ete ke edi kiet ke otu mme oku Abasi ọkọtọñọ ntak edi edidu uwem.

9 Erọd ama ọdọhọ ete, "Nte idighe mma nsio Jọn ibuot, anie ndien edi enye emi ami ñkopde mme ñkpọ emi mbaña?" Ama ọdọñ enye ndikut Jisọs.

10 Ke mme asañautom duopeba oro ema ekenyọñ etiene Jisọs, mmọ ema ekebuk enọ Jisọs se mmọ ekenamde. Jisọs ama ada mmọ adaha ọkpọñ otu owo aka ke obio emi ekerede Bedsaida. 11 Edi otu owo ema ediọñọ ebaña ebiet emi Enye akakade ndien mmọ ema ebine Enye do. Enye ama adara mmọ, onyuñ ekpep mmọ ñkpọ abaña Obio Ubọñ Abasi, onyuñ ọkọk mbon owo udọñọ.

12 Ke ama ekebe ufọt uwemeyo, kpukpru mbet Esie duopeba ema ebine Enye enyuñ ekedọhọ Enye ete, "Nam otu owo emi esuana man mmọ ekpekeme ndika ke obio iñwañ ñkoyom udia ye itie nna, koro ebiet emi ñnyin idude emi asanarede ọkpọñ obio."

13 Jisọs ama ọbọrọ mmọ ete, "Mbufo enọ mmọ ñkpọ edia." Mmọ ema ebọrọ Enye ete, "Ñnyin inyene ñkpasip eboho uyo ition ye iyak iba, ibọhọke ñnyin inyene ndika ñkedep udia nnọ otu owo emi." 14 Ñkpọ nte ibat irenowo tọsin ition ekedu do. Ndien Jisọs ama ọdọhọ mme mbet Esie ete, "Enam mmọ esuhọde etetie ke otu ke otu, emi edide owo aba ye duop ke otu kiet." 15 Mme mbet ema enam nte Enye eketemede, ndien kpukpru owo ema etetie.

16 Jisọs ama emen ebok uyo ition ye iyak iba ndien emenede enyin ese ikpa enyọñ, ọnọ ekọm. Ndien Enye obuñ mmọ ke mbio ke mbio ọnọ mme mbet Esie enọ mme otu owo. 17 Ndien kpukpru owo ema eta, enyuñ eyuhọ, ndien mme mbet ema etañ mme mbai uyo emi ọkọsuhọde ọyọhọ akpasa duopeba.

18 Usen kiet kini emi Jisọs ọkọbọñde akam ke ndibe ke idem Esie, mme mbet Esie ema edu ekpere, do ke Enye okobup mmọ ete, "Mme otu owo oro edọhọ ete Ami ndi anie?"

19 Mmọ ema ebọrọ ete, "Ubak mmọ edọhọ ete ke Afo edi Jọn Baptist. Ubak edọhọ ete, Elaiya, tutu ye oro ekese mmọ edọhọ ete ke edi kiet ke otu mme ñkani mme Asiak Uduak Abasi eyo oko afiak edi emana."

20 Ntem ke Enye okobup mmọ ete, "Mbufo edọhọ ete Ami ndi anie?" Pita ama ọbọrọ ete, "Afo edi Andinyaña Kraist, Eyen Abasi."

21 Jisọs ama oduri mmọ utọñ ete yak mmọ ekutiñ ntem enọ baba owo kiet.

22 Ndien Jisọs ama ọdọhọ, ete, "Eyen owo enyene ndibọ ufen ke ediwak usuñ. Ndien mme mbuot, mme ikpọ oku, ye mme andikpep mbet eyesin Enye, ndien eyewot Enye, ndien eyemenede Enye ke usen ita efiak enam Enye odu uwem."

23 Ndien Enye ama ọdọhọ mmọ kpukpru ete, "Edieke owo ndomokiet oyomde nditiene Mi, enye enyene ndisin idem esie, onyuñ emen Krọs esie ke usen ke usen etiene Mi. 24 Koro owo ekededi emi oyomde ndinyaña uwem esie, ọyọduọk enye, edi owo ekededi emi ọduọkde uwem esie ke ntak Mi eyenyaña uwem owo oro enim enọ enye. 25 Nso udori idu do edieke owo enyenede ofuri ererimbot edi ọduọk idem esie?

26 Edieke owo ndomokiet okopde but abaña Mi ye mme ikọ Mi, Eyen owo eyenyuñ okop but abaña enye ke ini Enye edidide ke Ubọñ Esie ye ke Ubọñ Ete Esie ye eke mme ndisana enjel. 27 Ami ntiñ akpanikọ nnọ mbufo nte, ke ekese mme mmọ emi edade mi iditabike ñkpa tutu mmọ ekut Obio Ubọñ Abasi."

28 Ke ñkpọ nte usen itiaita ema ekebe, ke Enye ama eketiñ mme ikọ emi, Jisọs ama ada Pita, Jọn ye Jems aka ke enyọñ obot ndibọñ akam. 29 Nte Enye akakade iso ndibọñ akam, iso Esie ama ọkpuhọde, ndien ọfọñidem Esie akabade ayama nte emereñ mereñ. 30 Owo iba Moses ye Elaiya, 31 ema ewọrọ ewut idem enyuñ eneme nneme ye Jisọs. Mmọ ekeneme ebaña ñkpa Esie, emi ekekperede ndisu ke Jerusalem.

32 Pita ye mme nsaña esie eken ema edu ke mba idap eti eti, edi ke ini emi mmọ ema ekedemere, mmọ ema ekut uyama Esie ye owo iba emi ekadade ye Enye.

33 Ke ini emi owo iba emi ema ekekpọñ Jisọs, Pita ama ọdọhọ Jisọs ete, "Andikpep, ọfọn ñnyin ika iso ndidu mi. Yak ñnyin ibọp atayat ita; ibọp kiet inọ Fi, kiet enyene Moses ndien kiet enyene Elaiya." Enye iketimke ifiọk se enye eketiñde.

34 Edi ke adaña emi Enye osuk etiñde emi, obubit ikpa enyọñ ama ọsuhọde ada mbukpọñ esie ofuk mmọ. Ndien ndik ama omum mmọ ke emi obubit enyọñ okofukde mmọ. 35 Ndien uyo oto ke ikpaenyọñ ọdọhọ ete, "Emi edi Eyen Mi Ami mmekde; ekpañ utọñ enọ Enye."

36 Ke ini uyo oro ama okodop, mmọ ema ekut nte Jisọs akadade ikpọñ. Mme mbet ema edip ñkpọ emi, ikoñyuñ itiñke inọ baba owo kiet ke ini oro se mmọ ekekutde.

37 Ke udiana usen, ke ini emi mmọ ekesuhọrede ke enyọñ obot, ata akwa otu owo ema esobo ye Enye. 38 Owo kiet ke otu owo oro ama ofiori okot Enye ete, "Andikpep, mmekpe Fi ubọk nte yak Afo osuk enyin ese eyen mi, koro enye edi ñkpasip eyen kiet emi ami ñnyenede. 39 Ndien idiọk spirit oro ama omum enye ndien enye ke ndo ndo oro okuni, anam enye ọduọ unam, efot onyuñ ọwọrọ enye ke inua, inyimeke ndiyak enye, ndien oyom ndiwot enye. 40 Mma ñkpe mme mbet Fo ubọk nte yak ebin spirit emi esio enye ke idem edi mmọ ikekemeke."

41 Jisọs ama ọbọrọ ete, "O! mbufo emana unana mbuọtidem ye ukwañ emana, Ami ndibighi ye mbufo adaña didie? Ndinyuñ nduñ ye mbufo mbighi didie? Da eyen fo di mi."

42 Kpa ke idem ini oro eyen emi asañade edi, ndiọi spirit oro ema emen enye etọ ke isọñ nte owo emi ọduọde unam. Edi Jisọs ama asua ọnọ ndedehe spirit oro, onyuñ anam idem ọsọñ eyen oro, ndien Enye omum enye ọnọ ete esie.

43 Idem ama akpa kpukpru mmọ kabaña odudu Abasi emi mmọ ekekutde. Kadaña emi kpukpru owo ekesuk edude ke ñkpaidem ebaña kpukpru se Jisọs akanamde, Jisọs ama ọdọhọ mme mbet Esie ete, 44 "Ekpañ utọñ eti eti ke se Ami ñyomde nditiñ nnọ mbufo; eyetap Eyen owo esin ke ubọk mme owo." 45 Edi mme mbet Esie ikọfiọkke se ikọ Esie ọkọwọrọde. Ama edibe mmọ man oto do mmọ ekudiọño se ọwọrọde, ndien ndik ikeyakke mmọ ebup Ọbọñ Jisọs ebaña se mme ikọ Esie ewọrọde.

46 Eneni ama ọtọñọ ke otu mme mbet abaña mme anie ke otu mmọ edikpon ikan.

47 Ke Jisọs ama ọkọdiọñọ ekikere esit mmọ, Enye ama omum ekpri eyen owuk ke ñkañ Esie. 48 Ndien Enye ama ọdọhọ mmọ ete, "Owo ekededi emi adarade ekpri eyen emi ke enyiñ Mi adara Mi, ndien owo ekededi emi adarade Mi adara Enye emi ọkọdọñde Mi. Koro enye emi edide usuhọde ke otu mbufo enye oro okpon akan." 49 Jọn ama ọdọhọ ete, "Andikpep, ñnyin ima ikut owo kiet nte enye ebinde ndedehe spirit osioño ke Enyiñ Fo, ndien ima idomo ndibiọñọ enye, koro enye idighe kiet ke otu ñnyin."

50 Edi Jisọs ama ọbọrọ ete, "Ekubiọñọ enye, koro owo kiet ekededi emi miñwanake ye mbufo, ada ye mbufo."

51 Adaña nte ini emi akanade nte eda Enye edọk enyọñ akasañade ekpere, Jisọs ama ebiere onyuñ ọtọñọ isañ ndika Jeruselem.

52 Ndien Enye ama ọdọñ mme isuñ ebem Enye iso; Mmọ ema ekeduk ke obio iñwañ Sameria kiet man eketim mme ñkpọ ebeñe Enye. 53 Edi mme mmọ emi ekedude do ikedarake Enye koro Enye okosuk akade iso ndika Jeruselem.

54 Kini mme mbet Jisọs, Jems ye Jọn ekekutde ñkpọ emi, mmọ ema ebup Enye ete, "Ọbọñ, nte Afo omoyom ñnyin ikot ikañ oto ke enyọñ ọsuhọrede edi edisobo mme mmọ emi?" 55 Edi Jisọs ama ọwọñọde enyin onyuñ asua ọnọ mmọ. 56 Ndien mmọ ebe eka ekpri obio iñwañ efen. 57 Nte mmọ ekesañade ke usuñ, owo kiet ama ọdọhọ Jisọs ete, "Ami ñnyene nditiene fi ñka ebiet eke Afo akaka."

58 Jisọs ama ọbọrọ enye ete, "Mme ebua ikọt enyene mme ndudu, ndien mme inuen enyọñ enyene mme efọk, edi Eyen Owo inyeneke ebiet emi Enye ebride ibuot."

59 Enye ama ọdọhọ owo efen ete, "Tiene Mi." Edi owo oro ama ọbọrọ ete, "Ọbọñ, yak mi ñka kaña ñkebuk ete mi."

60 Jisọs ama ọbọrọ enye ete, "Yak mme akpa ñkpa ebuk mme akpaña ñkpa mmọ edi afo ka ke kwọrọ baña Obio Ubọñ Abasi."

61 Owo efen onyuñ ọdọhọ ete, "Ami ñyetiene fi, Ọbọñ, edi yak mi ñka kaña ñkekọm mbon ufọk mi." 62 Jisọs ama ọbọrọ ete, "Owo baba kiet emi esinde ubọk esie ke ufuñisọñ ndien enye ese edem idotke ke utom Obio Ubọñ Abasi."