1 Ikebighike, Jisọs ama asaña aka ke mme ikpọ obio ye mme ñkpri obio iñwañ onyuñ aka iso ndisuan Eti Mbuk Obio Ubọñ Abasi. Mme mbet Esie duopeba ema esaña ye Enye, 2 ye mme ndusuk iban emi Enye ọkọkọkde mmọ udọñọ onyuñ ebinde ndedehe spirit osioño mmọ ke idem: Meri emi ekekotde Makdalin, enye emi mme ndedehe spirit itiaba ekewọñọde enye ke idem, 3 Joana ñwan Khusa emi ekedide akama ukpọhọde ufọk Erọd, Susana, ye ediwak mmọ eken. Mme iban emi ekedi mme mmọ emi ekesiñwamde Jisọs ye mme mbet Esie eto ke mme inyene mmọ.

4 Ke ini ata akwa udim owo ekesuk ekade iso ndiboho, ndien mme owo eka iso ndidi ke obio ke obio mbine Jisọs, Enye ama etiñ ikọ ke ñke ete,

5 "Ọtọ iñwañ ama ọwọrọ aka iñwañ esie ndisuan ñkpasip. Nte enye asuande ñkpasip ke isọñ, ndusuk ñkpasip ema eduọñọ ke ọkpọusuñ, ndien edighi mmọ ke ikpat ndien mme inuen enyọñ etañ mmọ eta. 6 Ndusuk ñkpasip ekeduọñọ ke isọñ emi itiat odude ke idak. Mme ñkpasip ema etọñọ ndikọri, edi ikebighike bighi mmọ eyemede, enyuñ ekpaña, koro mmọ mikenyeneke mmọñ. 7 Ndusuk ñkpasip ema eduọñọ ke ufọt ñkukim ndien ñkukim ama ọkọri ofuk mmọ owot. 8 Edi ndusuk ema eduọñọ ke ata eti isọñ, ñkpasip mmọ emi ema ekọri enyuñ eñwum mfri utim ikikie, emi akawakde akan se eketọde." Ke ini emi Enye ama eketiñ mme ikọ emi ama, Enye ama emenerede uyo ọdọhọ ete, "Owo emi enyenede utọñ ndikop, yak enye okop."

9 Mme mbet Esie ema ebup Enye ete, mme ñke emi ewọrọ didie?

10 Enye ama ọbọrọ mmọ ete, "Enọ mbufo ukeme ndifiọk mme ndibe ñkpọ emi etukde Obio Ubọñ Abasi, edi Ami ntiñ ikọ ke ñke nnọ mme mmọ eken, man oto do ke edise mmọ ekukut, okposuk edi nte mmọ ekopde mmọ ekukeme ndifiọk se ọwọrọde."

11 "Emi edi se ñke emi ọwọrọde: Ñkpasip oro edi mme ikọ emi Abasi ọdọñde ọnọ mme owo. 12 Edi isọñ ọkpọusuñ oro emi ndusuk ñkpasip ekeduọñọde ada ọnọ mme esit emi ekopde ikọ Abasi, edi ke adañaemi idiọk owo oro (akama idomo) edide, enye eyip mme ikọ oro osioño ke esit owo, onyuñ akpan mme owo ndinim ke akpanikọ ñnyuñ mbọ edinyaña. 13 Mme mmọ oro ke isọñ itiat eda enọ mmọ emi edarade ndikpañ utọñ ñkop ikọ Abasi, edi nte edide, ndusuk ini etop ikọ oro itimke iduk mmọ esit, inyuñ isinke ọkpọsọñ oruñ man ọkọri. Mmọ ediọñọ ete ke etop ikọ oro edi akpanikọ, enyuñ eñwana ndinim enye ke akpanikọ ke ñkpọ nte esisit ini. Edi ke adañaemi ọkpọsọñ oyobio uwem ama ọtọñọ ndifume, mmọ etọñọ ndifiak edem.

14 Mme ñkpasip emi ekeduọñọde ke ikọt ñkukim eda enọ mmọ oro ekpañde utọñ ekop, enyuñ enim ikọ Abasi ke akpanikọ, edi ekem mbuọtidem akpa oto ke ntak inyene, udọñitọñ ererimbot ye mme ñkpọ efen emi enọde inemesit uwem emi.

15 Edi eti isọñ oro ada ọnọ mme anam akpanikọ, mme enyene eti esit. Mmọ ekpañ utọñ enọ ikọ Abasi ndien emum ekama enyuñ esuan mmọ suñ suñ tutu mmọ emi ekopde enim ke akpanikọ."

16 "Baba owo ndomokiet idomoke utueneikañ ndien emen edip ke idak ñkpana. Edi esiwak ndimen ndori ke enyọñ ñkpọ emi okoñde man otodo mme mmọ emi edukde edi ekut uñwana oro. 17 Koro baba ñkpọ ndomokiet emi edipde emi midiyarakede iduhọ, mme se efukde emi owo midiọñọke midinyuñ isioho iwut añwa añwa.

18 Ntre ekpeme idem mbufo ke usuñ nte ekpañde utọñ, koro owo kiet ekededi emi enyenede, kpa enye ke edidian efen inọ, ndien owo ekededi emi minyeneke kpa se enye ekerede ete ke imọ imenyene, eyebọ enye."

19 Ekem eka Jisọs ye nditọ eka Esie edi ndikut Enye, edi mmọ ikekemeke ndisaña ñkpere Enye ke ntak otu owo. 20 Owo ama edidọhọ Jisọs ete, "Eka fo ye nditọ eka fo ke añwa eda ke eyom ndikut Fi." 21 Enye ama ọbọrọ ete, "Eka Mi ye nditọ eka Mi edi kpukpru mmọ emi ekopde ikọ Abasi enyuñ eda esin ke edinam."

22 Usen kiet, Jisọs ama ọdọhọ mme mbet Esie ete, "Eyak ñnyin iduk ke ubom ibe ika edem inyañ ñkpọdiọhọ mmọñ emi." Ke ntre mmọ ema eduk ubom enyuñ ewat ewọrọ. 23 Ke usuñ, nte mmọ ewatde ebe inyañ, Enye ọsuhọde ana ede idap, ọduọk odudu. Ndien ke ini emi Enye osuk edede idap ofum ama ọtọñọ ndifume. Ata ọkpọsọñ oyobio otibe emi ekekperede ndifuk ubom ye mmọ, ndien mmọ ema edu ke ñyomonsia.

24 Kpukpru mmọ ema ebumede enyuñ edemere Enye ke idap, enyuñ edọhọ ete, "Andikpep, ñnyin imọñ isip!" Enye ama adahada onyuñ asua ọnọ oyobio ye mbufit mmọñ; oyobio ama odobo ndien kpukpru ñkpọ ema edu ke ifure. 25 Enye ama obup mme mbet Esie ete, "Enye mbuọtidem mbufo-o?" Ke ndik ye ñkpaidem mmọ ebup kiet eken ete, "Anie edi owo emi? Enye owuk mme ofum ye mmọñ, ndien mmọ esuk ibuot enọ Enye, enyuñ ekop uyo Esie."

26 Ntre ke mmọ ekewat ekebehe ke edem inyañ eken ke idut mme Kerasenesi emi odude ke edem ñkpọdiọhọ mmọñ Kalili. 27 Nte Jisọs ọkọdọkde obot, owo kiet emi okotode obio oro emi mme ndiọi spirit ekeyọhọde enye ke idem edisobo ye Enye. Ke ata anyan ini owo emi ikesineke ọfọñ ke idem mme ndiduñ ke ufọk, edi enye okoduñ ke udi. 28 Ke ini enye okokutde Jisọs, enye ama ofiori onyuñ ọduọ Enye ke ukot ke ofofiori ke ọkpọsọñ uyo, "Nso itibe Fi ye Ami Jisọs, Eyen Ñkoññkan Abasi Ibom? Mekpe Fi ubọk kutuhọde mi!"

29 Koro Jisọs ama owuk mme ndedehe spirit emi ete ewọñọ owo emi ke idem. Ediwak ini ndedehe spirit emi esimumde enye, esinam enye ekibi ñkpọkọbi ubọk ye ukot emi esidade ekọbi enye ke idak ukpeme. Ndien mme ndedehe spirit emi ema esida enye eyo eka ke mme ndobo ebiet. 30 Jisọs ama obup enye ete, "Afo ekere didie?" Enye ọbọrọ ete, enyiñ mi edi "Udim", koro ata ediwak ndedehe spirit ema eduk enye ke idem. 31 Ndien, mmọ esuk eka iso ndikpe Jisọs ubọk ñyire ete, yak Enye okubin mmimọ ọdọñ ke obube.

32 Otu edi ema edu ke mben obot ekpere ke edia udia. Mme ndedehe spirit emi ema ekpe Jisọs ubọk ete, yak Enye ayak mmimọ ikoduk mme edi emi ke idem ndien Jisọs ama enyime ọnọ mmọ. 33 Ke ini emi mme ndedehe spirit emi ekewọñọde owo emi ke idem, mmọ ema ekeduk ke idem mme edi oro, ndien ofuri udim edi emi ema efeñe esuhọde ekedọñọ ke ñkpọdiọhọ mmọñ enyuñ ekpaña. 34 Ke ini mme andibọk mme edi emi ekekutde ñkpọ ntibe emi, mmọ ema efeñe eduk obio ekesuan etop emi, ye ke mme obio iñwañ.

35 Ndien mme enyene obio ema ewọñọ eka ndikut se iketibede. Ke ini mmọ ekesimde Jisọs, mmọ ema ekut owo emi mme ndedehe spirit ekewọñọde enye ke idem nte etiede ke mben ukot Jisọs, ema esine enye ọfọñ, enye onyuñ ọdiọñọ idem esie, ndien ndik ama anam mmọ. 36 Mme mmọ emi ekekutde ema etiñ enọ mmọ nte ekesañade ekọk owo emi mme ndedehe spirit emi ekedukde enye ke idem. 37 Ndien kpukpru mme mmọ emi eketode ke ñkanñkuk Kerasenesi ema edọhọ Jisọs ete, yak ọkpọñ isọñ mmimọ, koro mmọ ekop ndik eti eti. Do Enye ama oduk ubom onyuñ ọkpọñ mmọ.

38 Owo oro ekebinde mme ndedehe spirit esioño enye ke idem ama ekpe ubọk nditiene Jisọs, edi Jisọs ama ọdọhọ enye ọnyọñ, onyuñ ọdọhọ enye ete,

39 "Fiak nyọñ ufọk mbufo, ñnyuñ tiñ baña se Abasi anamde ọnọ fi." Ntre ke owo emi ọkọnyọñ onyuñ eketiñ ke ofuri obio kpukpru se Jisọs akanamde ọnọ enye.

40 Ke ini Jisọs ama ọkọnyọñ edi ke edem ñkpọdiọhọ mmọñ eken, mme otu owo ema edara ndikut Enye, koro mmọ ekeyeyom ndikut Enye.

41 Kpa ke ndo ndo oro, owo emi ekekotde Jeriọs, andikara ufọk ukpepñkpọ mme Ju ama edi ediduọ Jisọs ke ukot, onyuñ ebeñe Enye ete yak Enye edi ufọk imọ. 42 Koro ñkpasip eyenañwan esie kiet, emi ekedide eyen isua duopeba akada ke idaha ñkpa. Nte Jisọs okosuk odude ke usuñ, otu owo ema ekpere ndifik Enye ñwot.

43 Ndien ñwan kiet ama odu ke otu oro emi iyip ọkọwọrọde ke isua duopeba, ndien owo ndomokiet ikekemeke ndikọk enye. 44 Enye ama asaña ọdọk edi ke edem Jisọs ndien ama otuk mben ewura Esie ndien ndo ndo oro uwọrọ iyip esie ama etre.

45 Jisọs ama obup ete, "Anie otuk Mi?" Kpukpru owo ema ekañ, edi Pita ama ọbọrọ ete, "Andikpep, mme owo ke edediọñ ewak, enyuñ ekeme ndituk fi."

46 Edi Jisọs ọdọhọ enye ete, "Enyene owo emi okotukde Mi. Koro Ami mọdiọñọ nte ke odudu ọwọrọ Mi ke idem."

47 Edi ke ini ñwan oro okutde ete imọ ikemeke ndidibe, enye ama ọwọrọ edi, ke ñnyekidem, ediduọ Jisọs ke ukot, onyuñ etiñ ke iso kpukpru owo ntak emi akanamde enye otuk Jisọs ye nte udọñọ esie okurede ke ndo ndo oro.

48 Ndien Jisọs ama ọdọhọ enye ete, "Eyen mi añwan, mbuọtidem fo ọkọk fi, nyọñ ke emem."

49 Kadaña emi Jisọs okosuk akade iso nditiñ ikọ, owo ama oto ke ufọk Jeriọs, enyemi edide ada ibuot ke ufọk akam, edi, edidọhọ enye ete, "Kufina Andikpep aba, eyen fo akpa."

50 Edi ke ini Jisọs okokopde, Enye ama ọdọhọ Jeriọs ete, "Kufehe ndik, kam nim ke akpanikọ, ndien eyen fo eyekop nsọñidem."

51 Ke ini Enye ama ekesim ufọk Jeriọs, Enye ikenyimeke owo ndomokiet asaña ye Enye oduk ufọk, ke mibọhọke Pita ye Jọn ye Jems ye ete ye eka eyen añwan oro. 52 Ndien kpukpru owo ke etuaña ke enyuñ eseme eyen añwan oro. Jisọs ama ọdọhọ ete, "Etre eyet, enye emi ikpahakpa edi edede." 53 Kpukpru mmọ ema esak Enye, koro mmọ ema efiọk ete ke eyen añwan oro ama akpa.

54 Edi Jisọs omum enye ke ubọk, onyuñ ọdọhọ ete, "Eyen mi añwan dahada ke enyọñ" 55 Spirit esie ama afiak edi, ediduk enye ke idem, ndien enye ama adahada inikiet ndien Jisọs ama ọdọhọ mmọ ete yak enọ enye udia adia. 56 Idem ama akpa ete ye eka eyen añwan emi, edi Jisọs ama owuk mmọ ete ekutiñ se itibede enọ owo ndomokiet.