2 Ke usen itiokiet ema ekebe Jisọs ama ada Pita, Jems ye Jọn ọdọk aka enyọñ ñkoñkoñ obot, ebiet emi mmọ ekedude ikpọñ. Do, Enye ama ọkpuhọrede mbiet Esie ke iso mmọ. 3 Ndien ọfọñidem Esie esem onyuñ afia eti eti onyuñ eye akan nte ubọk owo ndomokiet ke isọñ ekpeyetde. 4 Ntem ke Elaiya ye Moses ekebiọñọrede enyuñ etọñọ nditiñ ikọ ye Jisọs.
5 Pita ama ọdọhọ Jisọs ete, Andikpep, "Ọfọn ñnyin ndidu mi. Ñnyin iyebọp atayat ita mi, kiet enyene Fi, kiet enyene Moses, kiet onyuñ enyene Elaiya."
6 Enye ikọfiọkke se ekpetiñde koro ndik ama anam mmọ ata eti eti. 7 Edi ke adañaemi enye osuk akade iso etiñ mme ikọ emi, obubit enyọñ ama ofuk mmọ, ndien uyo oto ke obubit ikpa enyọñ etiñ ọdọhọ ete, "Emi edi edima Eyen Mi. Ekpañ utọñ enọ Enye."
8 Ndien idaha oro mmọ ema ese ekanade, edi ikekwe baba owo ndomokiet ibọhọke Jisọs ikpọñ ọkọsuhọ ye mmọ.
9 Nte mmọ ekesuhọrede ke obot, Jisọs ama oduri mmọ utọñ ete ekutiñ se mmọ ekekutde enọ owo ndomokiet tutu ekem ini emi Eyen owo edisetde ke ñkpa. 10 Ntre ke mmọ ekemum Enye ekama — ke esit mmọ, edi ema eneme ke otu mmọ ebaña se ediset ke ñkpa emi Enye eketiñde abaña ọwọrọde.
11 Mmọ ema ebup Enye ete, "Ntaha mme andikpep ibet edọhọde ete ke Elaiya enyene ndibem iso ndi, mbemiso Andinyaña edi-e?" 12 Jisọs ama ọbọrọ mmọ ete. "Elaiya enyene ndibem iso ndi ke akpanikọ, ñnyuñ nditim kpukpru ñkpọ nnim. Edi nsidi ntak emi ewetde ete ke Eyen Owo enyene ndibọ ndodobi ufen, mme owo enyuñ esin Enye-e? 13 Edi ntiñ nnọ mbufo nte ke Elaiya ededi, ndien mme owo ema enam ye enye kpukpru se mmọ ekemade, asaña ekekem nte Ñwed Abasi eketiñde abaña Enye."