6 ज़ांऊं ईशैई अर तेऊए शोहरू आऐ, शमूएले सोठअ तेऊए शोहरू एलीआबा लै, "अह ज़ुंण मणछ इधी आसा खल़्हुअ द, बिधाता हणअ अह ई छ़ांटअ द।" 7 पर बिधाता बोलअ शमूएला लै, "तूह निं इहअ भाल़अ लागै कि अह आसा हेरनअ बित्तअ अर खास्सअ लाम्मअ। मंऐं अह आथी छ़ांटअ द किल्हैकि हुंह निं तेऊ साबै भाल़दअ ज़िहै मणछ भाल़ा। मणछ भाल़ा बाघलअ रूप पर हुंह भाल़ा मणछो दिल कि सह किहअ आसा।"
11 तेखअ पुछ़अ शमूएलै ईशैई का, "सोभ एछी गऐ कि तेरै होर शोहरू बी आसा?"
ईशैई दैनअ ज़बाब, "नांईं, सोभी का कान्हअ आसा एक होर, सह आसा भेडा-बाकरीए हेल़्ही फुआल डेऊअ द।"
शमूएलै बोलअ ईशैई लै, "तेऊ आण ओर्ही शादी, ज़ेभै तैणीं सह इधी निं पुजे, तेभै तैणीं निं हाम्हां रोटी खांदै बेशणअ।" 12 ईशैई छ़ाडै फुआला बणां लै आदमी संघा शादअ सोभी का कान्हअ शोहरू तेऊ नाअं त दाबेद। सह थिअ मोट्टअ-धोटअ अर हेरनअ बित्तअ, तेऊए आछी भाल़णेंओ बी लागा त लोभ। बिधाता बोलअ शमूएला लै, "अह आसा सह! उझ़ू जैतूनो तेल तरैल़ एऊए मुंडै।" 13 शमूएलै तरैल़अ तेऊए मुंडै शींगा का जैतूनो तेल अर तेऊए होर भाई तै तिधी भाल़ै लागै दै। तेभी आई बिधाते पबित्र आत्मां दाबेदा लै संघा बस्सी तेऊ दी। तेखअ डेऊअ शमूएल रामाह नगरी लै फिरी।