4 पलिश्ती दला दी त गात नगरी का गोलियाथ नाओं दैंत्तर मर्ध खास्सअ शूरबीर कोई नौ फुट लाम्मअ। तेऊ दैनी इज़राईली लै मकाबलै करने धमकी।
33 शाऊलै दैनअ दाबेदा लै ज़बाब, "तूह किहअ करै सका तेऊ पलिश्ती जोधै संघै जुध करी? तूह आसा अज़ी होछ़अ अर सह आसा होछ़ी उझै शूरबीर जोधअ।"
37 ज़ै बिधाता हुंह सिह अर भाल्लू का बच़ाऊअ, तेऊ हेरनअ हुंह एऊ पलिश्ती का बी बच़ाऊई।"
शाऊलै बोलअ दाबेदा लै, "ठीक आ, तै डेऊ, बिधाता लोल़ी ताह संघै रहअ।"
40 दाबेदै च़की आपणीं फुआला बणें शोठी संघा होथअ उंधै गाडा लै, गाडा का च़कै तेऊ पांज़ च़िफलै गोल़ पात्थर संघा डाहै काछ़ा बाखा आपणैं थैल्लू दी। दुजै हाथै च़की पात्थरै बाहणें फर्णैक्की संघा डेऊअ गाडा पार एक्कै ज़ण्हअ पलिश्ती गोलियाथा बाखा।
45 दाबेदै दैनअ पलिश्ती गोलियाथा लै ज़बाब, "तूह आसा मुंह संघै जुधा लै तलबार, बर्छ़ै अर कटार पाई आअ द, पर हुंह आअ तेऊ स्वर्गे सारी सैने मालक बिधाता नाओंऐं ज़हा का सारअ बल आसा, ज़ुंण सारी इज़राईली सैनो परमेशर आसा, तंऐं आसा तेऊ ई लै मकाबलै करने धमकी दैनी दी।
49 दाबेदै काढअ आपणीं काछ़ा बाखा थैल्लू का एक पात्थर संघा लाअ आजू फर्णैक्की दी। तेऊ लाअ फर्णैक्की फरेऊई करै पलिश्ती गोलियाथे माथै इहअ ज़ोरै नशाणअ कि पात्थर खुभअ माथै भितरी अर गोलियाथा बुल़्हअ फर्नैक्कअ धरनीं उटी बाखा।