10 तेखअ लागअ दाबेद तिधा का हांढदअ, संघा ठुर्हअ शाऊले डरै तैहा ई धैल़ी गात नगरी लै। तिधी डेऊअ सह नगरीए राज़ै आकीशा सेटा। 11 आकीश राज़े कार-करिंदै बोलअ राज़ै आकीशा लै इहअ, "अह इज़राईल देशो राज़अ दाबेद निं आथी? अह सह ई निं आथी ज़हा लै बेटल़ी नाच़दी-नाच़दी एही गिह बोला ती,
‘शाऊलै मारै एक हज़ार,
दाबेदै मारै दस हज़ार।’"
12 इना गल्ला शूणीं पल़अ दाबेदा मन्नैं हैल़अ अर तेखअ लागी तेऊ गात नगरीए राज़ै आकीशा का डअर। 13 दाबेदै सोठी एक च़ाल अर तेऊ किअ सोभी नदरी इहअ दखाअ कि सह आसा बेगरअ हुअ द! सह रहअ दुआरे पाल्लै दी क्लीहरा दैंदअ अर आपणीं खाखा का थुके लाल़ा दाल़्ही दी छ़ाडदअ लागी। 14 तेखअ बोलअ आकीश राज़ै आपणैं कार-करिंदै लै, "लै अह ता बेगरअ आसा! तम्हैं किज़ू आणअ अह मुंह सेटा लै? 15 तम्हां कै मुंह सेटा बेगरै थोल़ै गऐ तै! कि तम्हैं पजैल़अ मेरै मैहलै बेगरी गल्ला करै मुंह हंतणा लै एक होर बेगरअ?"