1 बिन्यामीन मुल्खै गिबाह नगरी थिअ एक मणछ। तेऊ नाअं त कीश। तेऊए बाब-दादू तै ईंयां: एबीएल, सरोर, बकरात अर अपीह। कीश थिअ बिन्यामीन गोत्रा का। तेऊ का थिई खास्सी ज़ैदात। 2 कीशो थिअ शाऊल नाओं एक ज़ुआन शोहरू। सह शोहरू त इज़राईली मांझ़ै सोभी का लाम्मअ कि होर लोग एछा तै तेऊए कान्हा तैणीं अर हेरनअ शुणनअ बी थिअ सह सोभी का बित्तअ।

3 कीशा का थिई गाधी अर एकी बारी लुक्‍की तिंयां, तेऊ बोलअ आपणैं शोहरू शाऊला लै, "तूह निंऊं आप्पू संघै एक दास संघा आण तिन्‍नां गाधी लोल़ी।" 4 तिंयां डेऊऐ एप्रैम धारा बाखे मुल्खै अर सारै शलीशा नाओंए मुल्खै लोल़ै पर तिंयां गाधी निं तिन्‍नां भेटी। तेखअ डेऊऐ तिंयां शालीम मुल्खै। तिधी बी निं तिन्‍नां तिंयां गाधी भेटी अर तिधा का पुजै तिंयां बिन्यामीन गोत्रे मुल्खा बाखा अर तिधी बी निं तिन्‍नां तिंयां गाधी भेटी। 5 खिरी डेऊऐ तिंयां सूप मुल्खा बाखा अर शाऊलै बोलअ आपणैं दासा लै इहअ, "च़ाल्‍ल ऐबै डेऊणअ घअरा लै फिरी, ज़ै हाम्हैं छ़ेक्‍कै घअरा लै नांईं फिरे, गाधी ता जाणअ बाब बिस्सरुई पर तेऊ पल़णअ म्हारअ हैल़अ-फिकर कि किधी रहै!"

6 तेऊ दासै बोलअ इहअ, "मालक, धिरअ भाल़ै! ऐहा सूप नगरी आसा एक बिधातो गूर मणछ अर तेऊओ करा सोभै अदर। ज़िहअ सह खोज़ा, तिंयां गल्‍ला निभा तेही ई। च़ाल्‍ल हाम्हां लणअ तेऊ सेटा डेऊई, हाम्हां पुछ़णअ तेऊ का, झ़ाणीं सह हाम्हां का खोज़ी हेरे कि हाम्हां म्हारी गाधी किधी भेटणीं।"

7 शाऊलै बोलअ तेऊ दासा का, "तेऊ पुछ़दै कै हाम्हां रित्तै हाथै डेऊणअ? नां हाम्हां का रोटी रही अर नां हाम्हां का तेऊ दैणा लै किज़ै होर आथी!" 8 दासै बोलअ शाऊला लै भिई, "मालक, मुखा आसा च़ंदीए च़ुआन्‍नी, तेता सका हाम्हैं तेऊ लै दैई अर तेखअ हेरनअ तेऊ हाम्हां का खोज़ी कि हाम्हां केथ बाखा डेऊणअ लोल़ै।"

9-11 शाऊलै बोलअ, "अब्बी हुअ ठीक! तै च़ाल्‍ल।" तेखअ डेऊऐ तिंयां तैहा नगरी लै ज़िधी सह बिधातो गूर रहा त। ज़ांऊं तिंयां नगरी बाखा उझै कुआल़ी तै हांढदै लागै दै, तिन्‍नां भेटी बाता ज़ुआन बेटल़ी फणैरा लै डेऊंदी। तिन्‍नैं पुछ़अ तिन्‍नां बेटल़ी का, "ऐहा नगरी कुंण पीर आसा?" पराणैं ज़मानै बोला तै इज़राईली तिन्‍नां लै पीर। ज़ै कुंण परमेशरा का पुछ़णअ च़ाहा त, सह बोला त, "पीरा सेटा एछणअ डेऊई।" 12,13 तिन्‍नैं बेटल़ी बोलअ, "हाँ, आसा, तम्हां सम्हनै भाल़ा पार आसा सह, ऐहा ई बाता डेओआ आजू, ज़ै तम्हैं छ़ेक्‍कै डेओए, तै हेरनअ तम्हां सह नगरीए प्रऊल़ी सेटा ठिमकी। ज़िहै ई तम्हैं नगरी भितरी डेओए, सह जाणअ तिधी तम्हां का शुझुई। आझ़ डेऊणैं सोभ लोग धारा प्रैंदै बेदी दी हूमा लै अर तैही आसा आझ़ सह बी आअ द। ज़ुंण प्राहुंणैं तै शादै दै, तिन्‍नां बी निं ताऊं तैणीं बल़ीदान किई दी शिखा खाणीं ज़ांऊं तैणीं सह तिधी निं पुजअ किल्हैकि बल़ीदाना लै बर्गत दैआ सोभी का आजी सह।"

14 शाऊल अर तेऊओ दास डेऊऐ तेभी नगरी लै, ज़ांऊं तिंयां नगरीए प्रऊल़ी भितरी डेऊऐ, तिन्‍नैं भाल़अ शमूएल उझै धारा बाखा डेऊंणा लै तिन्‍नां बाखा एछदअ लागअ द। 15 तैहा का पिछ़ली धैल़ी त बिधाता शमूएला का इहअ खोज़ी हेरअ द, 16 "काल्‍ला छ़ाडणअ मुंह ऐहा ई बेला बिन्यामीन गोत्रा का ताह सेटा एक मणछ, तेऊओ करै तूह मेरी परज़ा इज़राईलीओ सैणअ हणां लै अभिषेक। तेऊ बच़ाऊंणै इज़राईली पलिश्ती का। मंऐं भाल़ी कि मेरी परज़ा आसा खास्सै दुख ज़िरदी लागी दी अर मंऐं हेरी तिन्‍नां लै झींण करी।"

17 ज़ांऊं शमूएला का शाऊल शुझुअ, बिधाता बोलअ तेऊ लै इहअ, "अह आसा सह ई मणछ ज़सरै बारै मंऐं ताखा खोज़अ त। अह ई हणअ मेरी परज़ा प्रैंदै राज़ करनै आल़अ।"

18 तेखअ लागअ शाऊल नगरीए प्रऊल़ी सेटा शमूएला का पुछ़दअ, "मुखा खोज़ इहअ कि इधी पीरो घअर किधी आसा?"

19 शमूएलै बोलअ, "हुंह आसा पीर, मुंह संघै च़ाल्‍ल उझै धारा लै, आझ़ खाणीं तम्हां दुही मुंह संघै रोटी। काल्‍ला दोत्ती दैंऊं हुंह थारै सोभी सुआलो ज़बाब ज़ुंण थारै दिलै आसा, संघा लागै तम्हैं डेऊंदै। 20 ज़ुंण चिई धैल़ै आजी तेरी गाधी आसा लुक्‍की दी, तेतो बी निं तूह फिकर करै, तिंयां आसा भेटी गई दी। पर हुंह आसा इधी ऐहा गल्‍ला खोज़दअ कि सारै इज़राईले आशा आसा ऐबै ताह अर तेरै खिंबा दी लागी दी।"

21 शाऊलै दैनअ ज़बाब, "हुंह आसा बिन्यामीन गोत्रा का ज़ुंण इज़राईली दी सोभी का होछ़अ गोत्र आसा। मेरअ खिंब बी निं तेऊ गोत्रा दी खास मनअ-तनअ द आथी! तेखअ किल्है सोठा तूह मुल्है एही बडी गल्‍ल?"

22 तेखअ निंयं शमूएलै शाऊल अर तेऊओ दास एकी बडी पांडा लै ज़िधी सह पूज़ा-गाज़ा करा त, तिधी तै होर बी खास प्राहुणैं कोई तिह ज़ण्हैं बेठै दै अर शमूएलै बशैल़अ शाऊल तिधी सोभी का ज़ेठी ज़ैगा। 23 शमूएलै बोलअ तिधी बोटिऐ लै, "ज़ुंण गुल़छ़ू मंऐं ताल्है डाही डाहणां बोलअ थिअ, तेऊ आण ओर्ही।" 24 तेऊ बोटिऐ आणअ शिखा लै काटै दै पशूओ गुल़छ़ू संघा डाहअ शाऊले मुंहां आजू। तेखअ बोलअ शमूएलै इहअ, "एता भाल़, अह त ताल्है डाही डाहअ द। एऊ खा। अह त इधी तेरी ई तैणीं बच़ाऊई डाहअ द कि तूह एता इधी होरी प्राहुंणैं संघै खाए।"

शाऊलै खाई तैहा धैल़ी शमूएला संघै रोटी। 25 ज़ांऊं तिंयां धारा का उंधै नगरी लै होथै, शमूएलै निंयं शाऊल घअरा प्रैंदै दल़बै लै संघा छ़ैअ तेऊ लै च़ैन, तेऊ संघै किई गल्‍ला-बाता अर 26 शाऊल सुत्तअ तिधी।

दोत्ती-दोत्थी बोलअ शमूएलै शाऊला लै दल़बै प्रैंदै इहअ, "खल़अ उझ़ू, हुंह दैंऊं ताह सबाही।" शाऊल उझ़ुअ खल़अ संघा डेऊअ सह शमूएला संघा बागै।

27 ज़ांऊं तिंयां उंधै होथदी नगरीए पुंझ़ै पुजै, शमूएलै बोलअ शाऊला लै, "आपणैं दासा बोल हाम्हां का आजू डेऊंणा लै।" सह दास डेऊअ तिन्‍नां का आजू अर शमूएले बोलअ शाऊला लै, "थोल़ी घल़ी रह इधी खल़्हुई, हुंह खोज़ूं ताखा परमेशर किज़ै बोला।"