2 शमूएल 5

दाबेद बणअ इज़राईल अर यहूदा दुही मुल्खो राज़अ

1 इज़राईले सोभ गोत्र हुऐ हेब्रोन नगरी दाबेदा सेटा कठा संघा लागै तेऊ लै बोल्दै, "हाम्हैं सोभै आसा एकी हाड-खिंबे। 2 ज़धू शाऊल राज़अ थिअ, तधू बी थिअ जुधे बगती इज़राईली लै सोभी का आजू तूह ई अर बिधाता आसा ताल्है इहअ बोलअ द, ‘मेरी परज़ा इज़राईलीओ फुआल अर तिन्‍नां प्रैंदै राज़अ हणअ तूह ई।’"

3 तैहा सभा दी किअ इज़राईली सोभी सैणैं अर दाबेदै आप्पू मांझ़ै करार अर बिधाता डाहअ तेतो शाजत। तेखअ किअ इज़राईली सैणैं दाबेदे मुंडै जैतूनो तेल तरैल़ी हेब्रोन नगरी अभिषेक कि ऐबै आसा सह सोभी इज़राईलीओ राज़अ। 4 ✝5:4 1 राज़. 2:11; 1 इति. 3:4; 29:27तधू ती दाबेदे अमर तिहा साले अर तेऊ किअ आजू च़ाल़्ही साला तैणीं राज़। 5 साता साला तैणीं किअ तेऊ हेब्रोन नगरी का यहूदा प्रैंदै राज़ अर तेत्ती साला किअ तेऊ एरुशलेम नगरी का सोभी इज़राईली प्रैंदै राज़।

6 ✝ 5:6 ज़ैह. 15:63; पांच़ 1:21 एरुशलेम नगरी तै जबेशी लोग बस्सै दै, राज़ै दाबेदै छ़ेल़अ आपणीं सैना लई तिन्‍नां संघै जुध। जबेशी सोठअ इहअ कि दाबेद निं म्हारी नगरी ज़िती सकदअ अर तिन्‍नैं बोलअ दाबेदा लै इहअ, "तूह निं म्हारी नगरी भितरी कधि एछी सकदअ! ज़ै हाम्हैं कांणै अर लाट्टै बी हंदै, तैबी काढणअ त तूह हाम्हां इधा का दरल़ाऊई।"

7 पर दाबेदै ज़ितअ तिन्‍नों सियोन नाओं गहल़ अर तेता नाअं आसा आझ़ तैणीं बी दाबेदपूर*5:7 दाबेदपूर दाबेदे नगरी पल़अ द। 8 दाबेदै बोलअ त तधू आपणैं आदमी लै इहअ, "इना जबेशी मारदै उखल़ा तम्हैं गहल़ा का पाणीं बागै निखल़णें नाल़ा बाती उझै। मुंह आसा इना लाट्टै अर कांणै मणछा का खास्सी नफरत।" तधा पोर्ही च़ली एही कहाबत, "कांणै अर लाट्टै निं मैहला भितरी एछी सकदै।"

9 सियोन गहल़ा गिम्मी बस्सअ दाबेद तिधी अर तैहा नगरी नाअं पल़अ, "दाबेदे नगरी।" तेऊ च़िणअ तैहा नगरी फेर भिई धारे पुर्बा बाखा बढेरी करै बडी गहल़। 10 दाबेद रहअ बलबान अर मशूर हंदअ लागी किल्हैकि स्वर्गे सारी सैने मालक बिधाता थिअ तेऊ संघा ज़हा का सारअ बल आसा।

11 सूर नगरीए राज़ै हिरामै छ़ाडै दाबेदा सेटा दूत अर तिन्‍नां संघै छ़ाडै तेऊ काठे अर पात्थरे कारीगीर अर राज़ै दाबेदे मैहल बणाणां लै केल़ुईए काठ। 12 तेखअ हेरअ दाबेदै ज़ाणीं कि बिधाता किअ इज़राईली प्रैंदै तेऊओ राज़ पाक्‍कअ अर आपणीं परज़ा इज़राईलीए तैणीं बढेरअ तेऊ मेरअ राज़।

13 हेब्रोन नगरी का एरुशलेम एछी डाही दाबेदै आप्पू लै होर बी बेटल़ी अर तेऊए हुऐ होर बी खास्सै शोहरू-शोहरी। 14 एरुशलेम हुऐ तेऊए लुआद, शम्मू, शोबाब, नातान, सुलैमान 15 ईभार, एलीशू, नपेग, ज़ापी, 16 एलीशामा, एल्यादा अर एलीपेलेत।

पलिश्ती का ज़ीत

17 पलिश्ती का गअ थोघ लागी कि दाबेद बणअ सारै इज़राईला प्रैंदै राज़अ। तिन्‍नैं डाही आपणीं सैना दाबेदा ढाकणा लै छ़ाडी। ज़ांऊं दाबेदा का ऐहा गल्‍लो थोघ लागअ, सह रहअ तेखअ गहल़ै। 18 पलिश्ती आऐ रपाईम खागै संघा गिम्मी सह सारी ज़ैगा।

19 दाबेदै पुछ़अ बिधाता, "हुंह पलिश्ती संघै मकाबलै लै डेऊं? ताह मुल्है तिन्‍नां का ज़ीत दैणीं?"

बिधाता दैनअ ज़बाब, "हाँ, डेऊ, मुंह हेरनअ तूह तिन्‍नां का ज़ताऊई!" 20 तेखअ डेऊअ दाबेद बाल-परज़ीम अर तिधी पाऐ तेऊ पलिश्ती मारी। दाबेदै बोलअ इहअ, "बिधाता घ्रोहल़ै मेरै दुशमणा लै पाणीं हर्हला ज़िहै।" तैही डाहअ तेऊ तैहा ज़ैगा नाअं बाल-परज़ीम*5:20 बाल-परज़ीम घर्होहल़ै 21 बच़ै दै पलिश्ती ठुर्है तिधा का अर तिन्‍नां का छ़ुटै तिन्‍नें देअआ-देबीए मैहरै तेतै अर दाबेद अर तेऊए आदमी आणै तिंयां झाल़ी।

22 तेखअ डेऊऐ पलिश्ती भिई रपाईम खागा लै संघा गिम्मी सह ज़ैगा भिई। 23 तेखअ डेऊअ दाबेद भिई बिधाता पुछ़दअ अर बिधाता बोलअ तेऊ लै इहअ, "तिन्‍नें मकाबलै लै निं मोहरै बाखा डेऊई, तूह मार तिन्‍नां लै घेरअ संघा रहअ बलसामे बूटा नेल़ तिन्‍नां लै ताखुई। 24 ज़ांऊं तूह बलसामे बूटा जैंदरी सैना हांढणे छ़ेल़ शुणें, तिधी पल़ै तम्हैं तिन्‍नां लै नभैऊशै चुटी। तम्हां आजू हणअ हुंह बिधाता आप्पै हांढदअ लागअ द अर तम्हैं हेरनै मुंह पलिश्ती का ज़ताऊई।" 25 ज़िहअ बिधाता हुकम किअ, दाबेदै किअ तिहअ ई अर पलिश्ती दरल़ाऊऐ तिन्‍नैं मारदी-मारदी गिबा नगरी पोर्ही गज़ेर नगरी तैणीं।