Atos 7

स्तिफनुसो प्रच़ार

1 तेखअ पुछ़अ माहा प्रोहतै स्तिफनुसा का, "ज़ुंण गल्‍ला मंऐं एभै शूणीं ईंयां गल्‍ला कै सच्च़ी आसा?"

2 स्तिफनुसै दैनअ ज़बाब, "भाईओ अर अदर करनै जोगी सैणैं मणछो, मेरी गल्‍ला शूणां। म्हारअ दाद-बाब आबराम ज़धू हारान गराऊंऐं बस्सणै का आजी सह तेऊ मेसोपोटामिया मुल्खै थिअ, तधू दैनअ आपणैं प्रतप्पा दी भरपूर परमेशरै तेऊ लै दर्शण। 3 तेऊ लै बोलअ परमेशरै इहअ, ‘तूह डेऊ आपणैं देश अर आपणैं टबरा छ़ाडी तेऊ देशा लै ज़ुंण मुंह ताखा रहैऊंणअ।’✝7:3 मूल. 12:1

4 "तेखअ आअ सह कसदीए देशा का निखल़ी हारान गराऊंआं लै। तेऊए बाब मरनै का बाद बसाऊअ सह परमेशरे तिधा का आणी एऊ देशा दी ज़हा दी आझ़काला तम्हैं आसा बस्सै दै।✝7:4 मूल. 12:5

5 "पर परमेशरै निं तेऊ लै इधी किछ़ ज़ैदात दैनी, इधी तैणीं कि खूरा टकैल़णा जोगी ज़ैगा बी निं तेऊ लै दैनी, पर परमेशरै किई करार, ‘मुंह करनअ अह देश ताह बाद तेरै आजू तेरी एछणैं आल़ी पोस्तीए हाथै।’ पर तेऊए निं तेभै तैणीं कोई बी आद-लुआद ती।✝7:5 मूल. 13:15; 15:18; 16:1; 24:7; बधा. 2:5; 11:5

6 "परमेशरै बोलअ इहअ कि तेरी आद-लुआद हणीं पराऐ देशै परदेसी, अर तिन्‍नां डाहणैं तिंयां गलाम बणाईं, अर च़ऊ शौआ साला तैणीं दैणअ तिन्‍नां लै दुख।

7 "तेखअ बोलअ परमेशरै इहअ, ‘ज़हा ज़ातीए तिंयां गलाम हणैं, तिन्‍नां लै दैणीं मुंह सज़ा। तेखअ करनी तिन्‍नां तिधा का छ़ुटी एऊ देशै मेरी च़ाकरी।’✝7:7 मूल. 15:14; लुआ. 3:12

8 "प्रभू किई तेऊ संघै खतैर करने करार। ज़ांऊं आबरामो शोहरू इसहाक पैईदा हुअ, तेऊ किअ आठुऐ धैल़ै तेऊओ खतैर। इसहाका का हुअ याकब अर याकबा का हुऐ बारा ज़ण्हैं पैईदा ज़हा लै हाम्हैं यहूदी दाद-बाब बोला।✝7:8 मूल. 17:10-11; 21:4

9 "याकबे होरी शोहरू ज़ुंण म्हारै दाद-बाब थिऐ तिन्‍नैं डाही आपणैं भाई युसुफा संघै ज़ीद अर सह पाअ मिसर देशा लै डेऊणैं आल़ै का बेच़ी। पर परमेशरै किई हर ज़ैगा युसुफे मज़त।✝7:9 मूल. 37:28; 39:2-3; 45:4

10 "युसुफ बच़ाऊअ तेऊए सोभी दुखा का अर मिसर देशे माहा राज़ै सेटा दैनअ तेऊ लै जश अर अक्ल, सह बणाअं तेऊ सारै मिसर देशै अर सोभी गल्‍लो राज़पाल।✝7:10 मूल. 39:21; 41:40,43,46; भज. 105:21

11 "तेखअ पल़अ मिसर देशै अर कनान देशै नकाल़। ज़ेता करै भारी खरी पल़ी अर म्हारै दादा-बाबा निं रोटी निस्सी ती भेटी।✝7:11 मूल. 41:54,55; 42:5 12 पर याकबै इहअ शूणीं कि मिसर देशै आसा नाज़, अर म्हारै दाद-बाब छ़ाडै पैहली बारी नाज़ा आणदै मिसर देशा लै।✝7:12 मूल. 42:2

13 "ज़ांऊं तिंयां दुजी बारी नाज़ा आणदै डेऊऐ, तेखअ आअ युसुफ आपणैं भाई सम्हनै अर तेखअ मिलै युसुफे टबर बी मिसर देशे माहा राज़ै का।✝7:13 मूल. 45:1,3,16

14 "तेखअ शादै युसुफै आपणअ बाब याकब अर सारै टबर मिसर देशा लै। तिंयां सोभै तै पझत्तर ज़ण्हैं।✝7:14 मूल. 45:9-11,18-19; लुआ. 1:5; बधा. 10:22

15 "याकब डेऊअ आपणैं टबरा संघा निंईं मिसर देशा लै। खास्सी साला बाद सह बी मूंअ तिधी अर तेऊए लान्हैं ज़ुंण म्हारै दाद-बाब आसा तिंयां बी मूंऐं तिधी।✝7:15 मूल. 45:5,6; 49:33; लुआ. 1:6

16 "तिन्‍नें हस्तू पजैल़ै शकेम नगरी अर तिधी डाहै तिन्‍नैं तिंयां तैहा ज़ैगा घोरी दाबी, ज़ुंण आबरामै च़ंदी दैई शकेम नगरी हमोरे शोहरू का मोलै ती लई दी।✝7:16 मूल. 23:16,17; 33:19; 49:29,30; 50:13; ज़ैह. 24:32

17 "पर ज़ांऊं तैहा करार पूरै हणैंओ बगत आअ ज़ुंण परमेशरै आबरामा संघै किई ती, मिसर देशै हुऐ इज़राईली खास्सै। 18 ज़ांऊं मिसर देशै दुजअ राज़अ हुअ, तेऊ का निं युसुफे बारै थोघ आथी त।✝7:18 लुआ. 1:7-8

19 "तेऊ किई म्हारी ज़ाती संघै च़लाकी अर म्हारै दादा-बाबा लै दैनअ कष्ट कि तिन्‍नां पल़ै आपणैं शोहरू शोटणै अर तिंयां निं ज़िऊंदै रहै।✝7:19 लुआ. 1:9,10,18,22

20 "तेऊ ज़मानैं हुअ मोसा पैईदा, सह शोहरू त, परमेशरा का शुझुअ सह हेरनअ-शुणनअ बधिया अर सह रह चिई भिन्‍नैं आपणैं बाबे घअरै गुप्त।✝7:20 लुआ. 2:2

21 "ज़ांऊं तिंयां तेऊ शोहरू गुप्त डाही निं सकै, सह बहाऊअ तिन्‍नैं नदी दी। सह च़कअ मिसर देशे माहा राज़ेए देई, अर तैहा धाचअ सह आपणअ शोहरू बणाईं करै।✝7:21 लुआ. 2:5,10

22 "मोसा का सखाऊई मिसर देशे लोगे कई बिद्या, इहअ करै त सह गल्‍ला अर कामां दी शगती आल़अ। 23 ज़ांऊं सह च़ाल़्ही सालो हुअ, तेऊए मन्‍नैं आई एही कि हुंह डेऊं आपणैं इज़राईली भाई-बंधा सेटा मिलदअ,✝7:23 लुआ. 2:11

24 "तेऊ भाल़अ कि एक मिसर देशे मणछै किअ इज़राईली मणछा लै ज़ुल्म। सह बी डेऊअ तेऊ बच़ाऊंदअ अर मिसर देशे मणछा मारी करै लअ तेऊ इज़राईली मणछो बदल़अ।✝7:24 लुआ. 2:12 25 तेऊ सोठअ कि मेरै इना भाई समझ़णअ कि परमेशरा करनै मेरै हाथै गलामी का आज़ाद, पर तिन्‍नैं निं समझ़अ।

26 "दुजै धैल़ै ज़ांऊं तिन्‍नां आप्पू मांझ़ै झ़गल़अ पल़अ, सह आअ तिधी अर तिन्‍नां लागअ आप्पू मांझ़ै मेल़-ज़ोल़ डाही रहणा लै समझ़ाऊंदअ, ‘ओ मणछो, तम्हैं ता आप्पू मांझ़ै भाई-भाई आसा, तम्हैं किल्है आसा एकी-दुजै लै ज़ुल्म करदै लागै दै?’ 27 पर ज़ुंणी आपणैं इज़राईली भाई लै बूरअ किअ, तेऊ किअ सह इहअ बोली दूर, ‘तूह कुंणी बणाअं म्हारअ पांच़? 28 तूह कै मुंह बी तिहअ ई च़ाहा मारी पाणअ ज़िहअ तंऐं हिझ़ सह मिसर देशो मणछ पाअ मारी?’✝7:28 लुआ. 2:13,14

29 "ऐहा गल्‍ला शूणीं ठुर्हअ मोसा डरै तिधा का अर सह लागअ मिद्यान देशै परदेसी हई रहंदअ अर तिधी हुऐ तेऊए दूई शोहरू।✝7:29 लुआ. 2:15-22; 18:3-4

30 "ज़ांऊं पूरी च़ाल़्ही साला बिति, मोसा भाल़अ एक स्वर्ग दूत अर परमेशरै किई तेऊ स्वर्ग दूता बाती मोसा संघा सीनाई धारा नेल़ रेगीस्तानै एकी ज़ल़दै झ़ाकल़ा का गल्‍ला।✝7:30 लुआ. 3:1 31 मोसा हुअ एता तेऊ ज़ल़दै झ़ाकल़ा भाल़ी रहैन, ज़ांऊं सह तेता नेल़ डेऊअ, परमेशरै किई तेऊ संघै एही गल्‍ला,✝7:31 लुआ. 3:2-3

32 "‘हुंह आसा सह परमेशर ज़हा तेरै दाद-बाब आबराम, इसहाक अर याकब मना तै।’ मोसा का छ़ुटी काम्मणीं अर इधी तैणीं कि तेऊ निं तेऊ भाल़णें हिम्मत रही।

33 "तेखअ बोलअ प्रभू तेऊ लै, ‘आपणैं खूरा का खोल्ह इना पोलल़ै पोर्ही किल्हैकि ज़हा ज़ैगा तूह खल़्हुअ द आसा, सह ज़ैगा आसा पबित्र।✝7:33 लुआ. 3:5 34 मंऐं हेरी आपणैं लोगे बूरी दशा मिसर देशै भाल़ी अर तिन्‍नें धका अर लेरनअ हेरअ मंऐं शूणीं। तैही आसा हुंह तिन्‍नां बच़ाऊंदअ होथअ द, ऐबै एछ तूह, मुंह छ़ाडणअ तूह मिसर देशा लै।’✝7:34 लुआ. 2:24; 3:7-10

35 "ज़हा मोसा गूरो तिन्‍नैं इहअ बोली बरोध किअ, ‘तूह कुंणी बणाअं म्हारअ पांच़?’ सह ई बणाअं परमेशरे तिन्‍नां लै छ़ड़ैऊंणैं आल़अ सैणअ, अर स्वर्ग दूता बाती ज़हा झ़ाकल़ा दी तेऊ परमेशरे दर्शण हुऐ सह छ़ाडअ परमेशरै तिन्‍नां गलामी का छ़ड़ैऊंणा लै।✝7:35 लुआ. 2:14; 3:2

36 "एऊ ई मणछै किऐ मिसर अर लाल समुंदर रेगीस्तानै च़ाल़्ही साला तैणीं नुआहरै काम अर नछ़ैण रहैऊई करै किऐ तिंयां मिसर देशे गलामी का आज़ाद।✝7:36 लुआ. 7:3; 14:21; गण. 14:33

37 "अह आसा सह ई परमेशरो गूर मोसा ज़ुंणी इज़राईली लै बोलअ, ‘परमेशर बिधाता काढणअ थारै भाई-बंधा मांझ़ा का तम्हां लै मुंह ज़िहअ एक गूर।’✝7:37 बधा. 18:15-18

38 "अह आसा सह ई ज़ुंणी रेगीस्तानै टोली मांझ़ै तेऊ स्वर्ग दूता संघै सीनाई धारा तेऊ का गल्‍ला किई अर म्हारै दादा-बाबा संघै थिअ। तेऊ ई भेटै ज़िऊंदै बैण कि हाम्हां सेटा लै पजैल़े।✝7:38 लुआ. 19:1-6; 20:1-17; बधा. 9:10-11

39 "पर म्हारै दादै-बाबै निं तेऊए गल्‍ला मनणी च़ाही, पर तेता का उंबल़ै च़ाहा तै तिंयां मिसर देशा लै फिरी डेऊणअ।✝7:39 लुआ. 23:20,21; गण. 14:3,4

40 "तिन्‍नैं बोलअ मोसा गूरे भाई हारणा लै, ‘हाम्हां लै सैग इहअ देअ ज़ुंण हाम्हां आजू-आजू हांढी मिसर देशा लै बापस निंए। किल्हैकि अह मोसा ज़ुंणी हाम्हैं मिसर देशा का छ़ड़ैऊई आणै, कुंण ज़ाणें कि उझै धारा प्रैंदै तेऊ लै किज़ै हुअ होए!’✝7:40 लुआ. 32:1,23

41 "तधू बणाअं तिन्‍नैं एक सुन्‍नेंओ बाछ़ू अर तेऊए मुहुर्ती सम्हनै किअ बल़ीदान अर आपणैं तेऊ हाथे कामां लै दैनी तिन्‍नैं जाचा।✝7:41 लुआ. 32:4,6 42 तैही फरेऊई परमेशरै तिन्‍नां बाखा पिठ अर तिन्‍नां दैनअ कज़ेही करनै कि तिंयां लागै सरगे ग्रहे पूज़ा करदै। ज़िहअ परमेशरे गूरै कताबा दी आसा लिखअ द,✝7:42 जेर. 7:18; 8:2; 19:13

‘इज़राईलीओ, थारै दाद-बाब नढैऊऐ मंऐं च़ाल़्ही साला उज़र रेगीस्तानै,

तिन्‍नां तेतरी साला निं मंऐं तिन्‍नां का पशू बल़ी अर नाज़ बल़ी मांगी!

43 तम्हैं इज़राईली मणछै बुल़्ही आप्पू संघै मोलक देअए बेदी, थारै तारै रफान देअए मुहुर्ती

अर तिंयां मुहुर्ती ज़ुंण तम्हैं आप्पू लै पूज़ा करना लै बणाईं ती।’

"‘तैही, छ़ाडणैं मुंह तम्हैं गलामी दी बाबेल देशा का बी दूर।’✝7:43 आम. 5:25-26

44 "ज़धू म्हारै दाद-बाब रेगीस्तानै थिऐ, तिन्‍नैं किई परमेशरे च़ाकरी तेऊ खिम्भा दी ज़िधी परमेशर एछा त। सह रहैऊआ त ऐहा गल्‍ला कि परमेशर आसा तिन्‍नां संघै। तिन्‍नैं बणाअं सह खिम्भ ठीक तिहअ ज़िहअ परमेशरै आपणैं गूर मोसा लै खोज़अ त। अह खिम्भ त ठीक तेऊ ई साबै बणाअं द ज़ुंण परमेशरै मोसा का धारा प्रैंदै रहैऊअ त।✝7:44 लुआ. 25:1-40; 27:21; गण. 1:50

45 "सह ई खिम्भ आणअ म्हारै दादै-बाबै पराणैं ज़मानैं ज़ैहसू संघै इधा लै बी, ज़ेथ तिन्‍नैं तेऊ ज़मानैं होरी ज़ाती दी कबज़अ किअ त, ज़ुंण लोग परमेशरै म्हारै दादा-बाबे सेटा का दूर किऐ, अर सह रहअ राज़ै दाबेदे ज़मानैं तैणीं।✝7:45 ज़ैह. 3:14-17; 18:1; 23:9; 24:18

46 "तेऊ लै किई परमेशरै क्रिप्पा; तैही किई तेऊ अरज़ कि मुंह बणाणअं याकबे परमेशरा लै भबन।✝7:46 2 शमू. 7:2-16; 1 राज़. 8:17-18; 1 इति. 17:1-14; 2 इति. 6:7-8; भज. 132:5

47 "पर सुलैमानै बणाअं परमेशरा लै भबन।✝7:47 1 राज़. 6:1,2,14; 8:19-20; 2 इति. 3:1; 5:1; 6:2,10

48 "पर परम प्रधान परमेशरै निं हाथा करै बणाऐं दै भबनै रहंदअ, ज़िहअ कि परमेशरे गूरै ईशायाह आसा बोलअ द,

49 ‘प्रभू बोला इहअ, "स्वर्ग आसा मेरी राज़गाद्दी अर

पृथूई आसा मेरै पैरा हेठे च़ौकी!

तम्हैं मुल्है किहअ घअर सका बणाईं?

सह कुंण ज़ैगा हणीं ज़िधी हुंह बस्सणअ?"’

50 "‘ईंयां सोभै गल्‍ला कै मंऐं आपणैं हाथै आप्पै निं आथी बणाईं दी?’✝7:50 ईशा. 66:1-2

51 "हे हठू अर काना-मन्‍नें टौणैं लोगो, तम्हैं करा सदा पबित्र आत्मों बरोध। ज़िहअ थारै दाद-बाब करा तै, तम्हैं बी करा तिहअ ई।✝7:51 लुआ. 32:9; 33:3-5; लेब. 26:41; गण. 27:14; ईशा. 63:10; जेर. 6:10; 9:26

52 "परमेशरे गूरा मांझ़ै कहा ज़ण्हैं लै निं थारै दादै-बाबै कष्ट दैनअ? तिन्‍नैं पाऐ पराणैं ज़मानैं ओर्ही तेऊ धर्मीं मणछ मसीहा एछणें समादा दैणैं आल़ै मारी अर ऐबै हुऐ तम्हैं बी तेऊ मसीहा ढाकणैं आल़ै अर मारनै आल़ै।✝7:52 2 इति. 36:16 53 तम्हैं आसा तिंयां ज़हा लै स्वर्ग दूतै बधान सभाल़अ, पर तेऊ साबै निं तम्हैं च़लै आथी।"

स्तिफनुस पात्थरा करै मारनअ

54 ज़ांऊं यहूदी मणछै अर तिन्‍नैं होरी स्तिफनुसे ईंयां गल्‍ला शूणीं तिन्‍नां आई बेघै खास्सी रोश्शै। तिंयां सोभै लागै रोश्शै तेऊ लै दांदा किल्‍लदै!✝7:54 आयू. 16:9; भज. 35:16; 37:12; 112:10

55 पर तेऊ भाल़अ पबित्र आत्मां करै भर्हुई स्वर्गा बाखा अर तेऊ का शुझुई परमेशरा का झ़ामण लागअ द अर प्रभू ईशू शुझुअ तेऊ का परमेशरे दैहणीं बाखा सोभी का बडी पदबी दी। 56 तेऊ बोलअ, "भाल़ा, मुखा शुझिआ स्वर्ग घुआल़ी अर मणछो शोहरू ईशू परमेशरे दैहणीं बाखा सोभी का बडी पदबी दी।"

57 तेखअ किऐ तिन्‍नैं ज़ोरै-ज़ोरै लैल़ा पाई आपणैं कान बंद अर रोश्शै पल़ै तिंयां सोभ तेऊ च़िक्‍कदै चुटी। 58 तिन्‍नैं काढअ सह एरुशलेम नगरी का बागै अर तेऊ लै लागै सोभ पात्थरै बाहंदै अर तिन्‍नैं शाजत डाहै आपणैं च़ोल़ै शाऊल नाओंऐं एकी मर्धे खूरा सेटा खोल्ही।

59 तिंयां सोभ रहै स्तिफनुसा लै पात्थरै बाहंदै लागी अर सह रहअ इहअ बोली प्राथणां करदअ लागी, "हे प्रभू ईशू, मेरी आत्मां ढाक आप्पू का।"✝7:59 भज. 31:5

60 तेखअ बोलअ तेऊ ज़ान्हूं टेक्‍की करै ज़ोरै, "हे प्रभू, एऊ पाप करनैओ दोश निं इना लोल़ी लागअ" अर इहअ बोली शोटै तेऊ प्राण।