1-5 याकबा संघै ज़ुंण मिसर देशा लै आऐ तै, इज़राईले तिन्‍नां शोहरूए नाअं आसा ईंयां:

रूबेन, लेबी, शमौन, यहूदा,

इस्साकार, ज़बलून, बिन्यामीन,

दान, नप्ताली, गाद अर आशेर। ✝

युसुफ त गअ द मिसर देशै पैहलै ई एछी। याकबे आपणैं खिंबा दी ज़ुंण पैईदा हुऐ, तिंयां थिऐ सत्तर ज़ण्हैं।✝

6 तेखअ हुअ इहअ कि युसुफ अर तेऊए सोभ भरैर अर ज़ेतरै लोग तैहा पोस्ती दी थिऐ, तिंयां मूंऐं सोभै बारी-बारी आपणीं अमरा।✝

7 पर इज़राईले लुआदा रही आजू फुलदी-फल़दी लागी अर तिंयां रहै बलबान हंदै लागी। तिंयां हुऐ एतरै खास्सै कि तिन्‍नां करै भर्हुअ सारअ मिसर देश।✝

8 मिसर देशै बेठअ खास्सी साला बाद राज़गाद्दी दी राज़ करदअ आजू नऊंईं पोस्तीओ राज़अ, अर तेऊ राज़ै का निं युसुफे बारै थोघ आथी त।✝

9 तेऊ बोलअ आपणीं मिसर देशे परज़ा लै, "भाल़णीं दैआ! ईंयां इज़राईली मणछ हुऐ म्हारै देशै खास्सै, अर ईंयां च़ाल्‍लै हाम्हां का खास्सै बलबान हई।

10 "ज़ै हाम्हैं इना संघै सोठी-समझ़ी बर्ताअ नांईं करे, ईंयां रहणैं इहै ई बढदै लागी। आजू ज़ै म्हारै देशा संघै कुंण दुशमण जुध करे, ईंयां सका दुशमणा संघै मिली करै हाम्हां मिसर देशा का बागै काढी।"✝

11 एता लै किअ तिन्‍नैं इहअ कि इज़राईली मणछा लै डाहै तिन्‍नैं बगारी लादणैं आल़ै मेट ताकि तिंयां तिन्‍नां लै बगार लादी-लादी करै दुख दैए। तेखअ बणाईं तिन्‍नैं मिसर देशे माहा राज़ै लै पितोम अर रामसेस* नाओंए भढारा आल़ी नगरी।

12 ज़िहै-ज़िहै तिंयां इज़राईली मणछा लै दुख दैंदै रहै लागी, तिहै-तिहै रहै इज़राईली बझ़दै अर सारै दी बस्सदै लागी। एता भाल़ी डरै तिंयां इज़राईली का।

13 मिसर देशे लोगा पल़ी इज़राईली मणछा लै होर खास्सी हठ अर तिन्‍नें दैनी तिन्‍नां लै होर बी खास्सी बगार करनै।

14 इज़राईलीओ ज़िऊंण किअ तिन्‍नैं होर बी कठण, तिंयां डाहै तिन्‍नैं माट्टे गारा अर ईंटा बणाऊंदै, खेचे कई रंगे कामां करदै लाई, ज़ुंण बी काम तिंयां इज़राईली मणछा लै दैआ तै तेता कराऊआ तै तिंयां खास्सअ बूरअ बर्ताअ करी। इहअ करै हुऐ इज़राईली खास्सै दुखी।

15 मिसर देशे माहा राज़ै किअ इब्रानी मांझ़ै शिप्रा अर पूआ नाओंए दूई सुआऊई लै इहअ हुकम, 16 "ज़ेभै तम्हैं इब्रानी बेटल़ी सूंणें दाह लागी दी भाल़े, तेभै ज़ै शोहरू होए, तेऊ पाऐ मारी अर ज़ै होए शोहरी, तैहा दैऐ ज़िऊंदी रहणैं।"

17 पर तिंयां सुआऊई रहा ती परमेशरे डरा हेठै, अर तिन्‍नैं निं मिसर देशे राज़ैओ हुकम मनअ अर तिंयां दैआ ती शोहरू च़ुपच़ाप ज़िऊंदै रहणैं। 18 मिसर देशे माहा राज़ै शादी तिंयां आप्पू सेटा लै संघा पुछ़अ तिन्‍नां का, "तम्हैं डाहै इज़राईली बेटल़ीए शोहरू ज़िऊंदै! इहअ किल्है किअ तम्हैं?"✝

19 तिन्‍नैं सुआऊई दैनअ मिसर देशे माहा राज़ै लै ज़बाब, "इब्रानी बेटल़ी निं मिसर देशे बेटल़ी ज़ेही आथी, तिंयां आसा एही छ़ल़ैघ कि सुआऊई पुजणैं का आजी जाआ तिंयां सूई।"

20,21 परमेशरै किअ तिन्‍नां दूई सुआऊई संघै भलअ किल्हैकि तिन्‍नैं किअ परमेशरो अदर अर तिन्‍नां लै दैनी परमेशरै एही बर्गत कि तिन्‍नें हुई आजू आपणीं आद-लुआद।

इज़राईली मणछ रहै खास्सै हंदै लागी।

22 तेखअ दैनअ मिसर देशे माहा राज़ै आपणैं लोगा लै इहअ हुकम कि ज़ेतरै बी इज़राईलीए* शोहरू आसा हुऐ दै तिन्‍नां पाआ नील नदी दी डबेऊई करै मारी अर शोहरी छ़ाडै सोभी ज़िऊंदी।✝