1 Bhambo Chapanga ngannobholila kabhele Mucha, 2 "Jhenje ndi mihilo jha mundo jhuna malohe mu lichiko lya kujhelebhulwa kwake. Kuhumii pu kulama naletwa kwa mpiya litambiko. 3 Mpiya litambiko najhenda panja jha kighono kuningukiya panja jha kighono. Anda malohe gheniya ghalamite, 4 mpiya litambiko nalaghalikiya bhando bhaleta ijhune ibhele, ijheketelwa na Chapanga ibhii ghome na kipande cha nkongo cha mweleze na mangoma gha limbelele gha lange ngele na lindabhe lya hichopo, ku nhwalo gwa mundo jwenio jwapakujhelebhulwa. 5 Mpiya litambiko nalaghalikiya bhachinja kijhune chimo mu kibhegha china mache ghambone gha chembwe. 6 Mpiya litambiko natola kijhune chenge chela chikibhii ghome na kipande cha lundabhe lwa mweleze na mangoma gha limbelele gha lange ngele na lindabhe lya hichopo, na kuchwiya yoha mu myahe jhi kijhune chenie chikichinjwite. 7 Peniya, namichila myahe jhenie mala chaba mundo jwenio jwa jhelebhulwa, peniya, nantangacha mundo jwenio ajheketelwa palonge jha Bhambo Chapanga. Kijhune chikibhii ghome chela nabhakileka kijhende panja jha muche. 8 Mundo jwenio napula ngobho yake, nachekula majhunjo ghake na kujhogha, jwenio najheketelwa palonge jha Bhambo Chapanga. Kubhoke peniya, nakelebhuka kukighono, nambo natama panja jha lihema lyake kwa machiko chaba. 9 Lichiko lya chaba nachekula kabhele majhunjo ghake ghoha na ndeo na ngopolelo. Peniya, napula ngobho yake nu kujhogha mache, na jwenie najheketelwa palonge jha Bhambo Chapanga.

10 "Lichiko lya nane naleta matohe gha mankambako gha mambelele mabhele ghangalemala na litohe limo lya limbelele lyankolo lyangalemala lya chaka chimo ghangalemala, kilo itato ya uhembe ghunakutema ghuhunyitwe na mahuta ku nhwalo gwa litambiko lya uhembe pamonga na mahuta gha micheitune kolobohe chita. 11 Mpiya litambiko jwapala kunnyelebhuha mundo jwenio, nanneta palonge jha Bhambo Chapanga pahina na litangala lya Lihema lyu Chapanga pamonga na ilebhe yaletite. 12 Mpiya litambiko natola litohe lya limbelele lyankambako limo na kumpiikiya litambiko lya kupepulila uhakaho pamonga na mahuta ghala gha micheitune. Natondobheya kunane kulangii ampikii Bhambo Chapanga. 13 Peniya, nanchinja limbelele lyenie, chehemo jha nyahinyahi, pibhachinjii inyama ibhapiya litambiko lya kupepulila uhakaho na litambiko lya kukomelekeya. Litambiko lyenie lya kupepulila uhakaho, ngita chibhii litambiko lya kupepulila uhakaho, yenio ndi ilebhe yake mpiya litambiko, nhwalo ihumii mu litambiko lya nyahinyahi hake. 14 Mpiya litambiko natola myahe jhandina kuhumii mu myahe jha litambiko lya kupepula uhakaho na kumpakaya mundo jwenie jwajhelebhulwa, upandi gwa ulelo gwa lichikilo lyake na lighumba lya mu lubhoko lwa ulelo na lighumba lyake lya mu lukongono lwa ulelo. 15 Peniya, mpiya litambiko napongola mahuta ghandina gha micheitune na kujhitii mu kighanja chulubhoko lwake lwangejha. 16 Ngachwiya lukonje lwake lwa ulelo mu mahuta ghighabhii mu kighanja chake cha ngejha, na kummichila mundo jwenio mala chaba nnonge jha Bhambo Chapanga. 17 Mahuta ghange ghighahighilike mukighanja chake nampakaya mundo jwenio jwajhelebhulwa, pa kilemeleme cha lichikilo lya ulelo na lighumba lya mu lubhoko lwa ulelo na lighumba lya mu lukongono lwake lwa ulelo, chehemo jhejhe pibhampakite myahe jha litambiko lya kupepulila uhakaho. 18 Mahuta ghighahighilike bhampakaya mundo jwenio pa muto. Yene, mpiya litambiko chantendela ujhelanicho palonge jha Bhambo Chapanga.

19 "Peniya, mpiya litambiko napiya litambiko lya kupepulila uhakaho na kuntende ujhelanicho mundo jwenio palonge jha Bhambo Chapanga kupala kumpepulila kwangajeketelwa kwake. Peniya, nachinja litohe lya limbelele lya litambiko lya kukomelekeya. 20 Mpiya litambiko napiya litambiko lya kukomelekeya lela na litambiko lya uhembe chehemo jha kupiikiya litambiko. Yene, mpiya litambiko nantendela mundo jwenio ujhelanicho na Bhambo Chapanga, na jwenie najheketelwa palonge jha Bhambo Chapanga.

21 "Nambo anda mundo jwenio ndi nhwocho, jwanga hoto kupiya ilebhe yenio, bhahe naleta litohe limo lya limbelele lyankambako libhehe litambiko lya malepo ghake, ku nhwalo gwa kunyelanicha mundo jwenie. Helehela naleta kilo jhimo jha uhembe ghunakutema ghuhangalinwe na mahuta ku nhwalo gwa litambiko lya uhembe na mahuta kolobohe chita. 22 Naleta ngunda bhabhele amu mapupo mabhele gha ngunda anda chahotola, jhumo abha jwa litambiko lya kupepulila uhakaho na jhonge ku nhwalo gwa litambiko lya kukomelekelwa. 23 Lichiko lya nane nannetela mpiya litambiko ilebhe yoha nnonge jha litangala lya Lihema lya Chapanga, ku nhwalo gwa kujhelebhulwa kwake nnonge jha Bhambo Chapanga. 24 Mpiya litambiko natola litohe lya nkambako lya limbelele lya litambiko lya kupepulila uhakaho pamonga na mahuta ghala kolobohe chita na kutondobheya kunane kulangii ampikii Bhambo Chapanga. 25 Mpiya litambiko nachinja litohe lya limbelele lya nkambako lya litambiko lya kupepulila uhakaho. Mpiya litambiko natola myahe jhandina na kumpakaya mundo jwenio jwajhelebhulwa, pa kilemeleme cha lichikilo lyake lya ulelo na mu lighumba lya mu lubhoko lwake lwa ulelo na lighumba lya mulukongono lwake lwa ulelo. 26 Mpiya litambiko napongola mahuta ghandina mu kighanja chake chu lubhoko lwa ngejha, 27 ku lukonje lwake lwa ulelo nachwiya mu mahuta ghighabhii mu kighanja chake cha ngejha na kummichii mundo jwenio mala chaba nnonge jha Bhambo Chapanga. 28 Mpiya litambiko nampakaya mahuta mundo jwenio jwajhelebhulwa pa kilemeleme cha lichikilo lyake lya ulelo na mu lighumba lya mu libhoko lya ulelo na lighumba lyake lya lukongono lwa ulelo. Nampakaya mahuta ghala ghighahighilike mu kighanja chake chehemo jhela pibhampakiya myahe jhilitambiko lya kupepulila uhakaho. 29 Mahuta ghighahighilike mulubhoko lwake nampakaya mundo jwenio pa muto, kupala kuntende ujhelanicho mundo jwenio nnonge jha Bhambo Chapanga. 30 Peniya, mpiya litambiko natola ngunda jhumo pakate jha ngunda amu ngunda ibhele kulengana na mundo jwenio chahoto kuleta. 31 Ngunda jhumo ku nhwalo gwa litambiko lya kupepulila uhakaho na jhonge ku nhwalo gwa litambiko lyu kukomelekeya, pamonga na matambiko gheniya, kukutenda yene, mpiya litambiko nantendela mundo jwenio ujhelanicho palonge jha Bhambo Chapanga. 32 Jhenie ndi mihilo kwa mundo jhojhoha jhuna malohe, jwangahoto kupiya matambiko ghala gha kunnyelebhuwa."

33 Bhambo Chapanga ngannobholila kabhele Mucha na Alune, 34 "Kipinde chimpa kujhingii mu kilambo cha ku Kanaane chinimpe kubhehe chino, na pumbakuleta madowa mu lipamanda lya nyumba jhimo, mu kilambo chenie, 35 bhahe, nkolo nyumba jhenio, ipalwa annobholela mpiya litambiko kubhehe kibhii kilebhe kilandine ngita madowa mu nyumba jhake. 36 Mpiya litambiko nalaghalikiya ilebhe yoha ya mu nyumba jhenio, bhapiya panja kabula jwenie nukulingukiijhe, kupala kilebhe chochoha mu nyumba jhenie changatangachwa jhe kubhehe changajheketelwa palonge jha Bhambo Chapanga. Yenie mpiya litambiko najhingila kulingukiya nyumba jhenio, 37 nalingukiya madowa gheniya, anda madowa gheniya ghabhonikine mu lipamanda na ulembelekii malembelo gha lange jha likolo amu ngele na kubhonekana ghahelelii na kunhwininila mu lipamanda, 38 bhahe, mpiya litambiko napita panja na kudinda nnyango gwa nyumba jhenio kwa machiko chaba. 39 Lichiko lya chaba mpiya litambiko nahika na kulingukiya mu nyumba jhenio. Anda madowa ghenio ghajhenii mu mapamanda gha nyumba jhenie, 40 mpiya litambiko nalaghalikiya maghanga ghighabhii chehemo jhina madowa maghabhowe na kughataghii chehemo jhangajheketelwa na Bhambo Chapanga panja jha muche. 41 Undope gwa nyumba jhenio ukwendwa na ndunda yake itaghilwa chehemo jhangajheketelwa na Bhambo Chapanga panja jha muche. 42 Peniya, nabhatola maghanga mahyono na kuchenga chehemo jhibhatiluline, nabheniya, nabhakilima kabhele nyumba jhenio.

43 "Anda madowa ghenio ghabhujhii kabhele panyumba jhenio kuhumii pukubhoha maghanga gheniya na kung'amatula undope na kukilima kabhele, 44 mpiya litambiko ipalwa ahika kulingukiya. Anda madowa gheniya ghajheniii mu nyumba jhenio, gheniya ndi madowa ghukuhangabhana, mundo angatama jhe munyumba jhenie, nhwalo ijheketelwa jhe palonge jha Bhambo Chapanga. 45 Nyumba jhenio, ipalwa itilulwana na maghanga ghake na mikongo jhake na ndunda jha nyumba ipelekwa chehemo jhangajheketelwa na Bhambo Chapanga panja jha muche. 46 Kupeta gheniya, jhojhoha jwapakujhingii mu nyumba jhenio kubhoke pukudinda, nabha jwangajheketelwa jhe palonge jha Bhambo Chapanga ade kimiye. 47 Jhojhoha jwagholoka mu nyumba jhenio amu kulele chakulya mu nyumba jhenio, impala apula ngobho yake.

48 "Kuhumii pu kukilima nyumba yenio, mpiya litambiko alolite kubhehe madowa ghajhenii jhe, bhahe, mpiya litambiko natangacha kubhehe nyumba jhenio ijheketelwa palonge jha Bhambo Chapanga, ku nhwalo madowa ghajhomwike. 49 Kupala kujhelebhuha nyumba jhenio, nkolo nyumba naleta ijhune ibhele pamonga na kipandi cha mweleze na mangoma makele gha limbelele na lundabhe lwa nkongo gwa hichopo. 50 Mpiya litambiko nachinja kijhune chimo pi kibhegha china mache ghamaha gha chembwe. 51 Natola kipandi cha nkongo gwa mweleze na lindabhe lya hichopo na ng'ojhe ngele pamonga na kijhune chikibhii ghome na kuchwiya yoha mu myahe jhi kijhune chela chikichinjwitwe. Peniya, namichila nyumba jhenie myahe mala chaba. 52 Yene, ndi chaipalwa kujhelebhuha nyumba jhenio kwa myahe jha kijhune na mache ghambone gha chembwe na kijhune chikibhii ghome na lundabhe lwa nkongo gwa mweleze na lindabhe lya hichopo na ng'ojhe ngele. 53 Peniya, kijhune chela chikibhi ghome nabhakileka kijhende kumanyahe. Kukutenda yene, nyumba jhenio naijhelebhulilwa, na nibha ijheketilwe palonge jha Bhambo Chapanga."

54 "Jhenje ndi mihilo ku nhwalo gwa aina jhojhoha jha malohe, 55 malohe gha mu ngobho amu gha mu nyumba, 56 kutupa na lipute amu libaka linhuo amu likele, 57 kupala kulangii kilebhe ghane chikijheketilwa kwa Bhambo Chapanga. Jhenje ndi mihilo ku nhwalo jha aina yoha ya malohe."