1 Peniya, Bhambo Chapanga ngannobholila Mucha, 2 "Malobholela Akaichilahele kubhehe, ‘Mundo jhojhoha pakate jha Akaichilahele amu aghene jwaitama pakate jhino, anda ampiite litambiko mwana mundo jhojhoha kwa ichapanga jhuwange Moleke, mundo jwenio ipalwa akomwa. Bhando bha peniya, nabhankoma ku kumbula maghanga.’ " 3 Nenga naninkana mundo jwenio, nu kummeka kutale na bhando bhake, ku nhwalo ampiite jhumo jwa yana mundo litambiko kwa ichapanga Moleke nu kulihakaya Lihema lyango, na liina lyango lya nyahinyahi. 4 Anda akolo kilambo bha peniya nabhanhadabula jhe mundo jwenio ku kunkoma, 5 ne namwete naninkana mundo jwenio ni ibheluko yake. Nanimmeka kutale mundo jwenio na bhando bhake, pamonga na bhoha bhangahobholeka kwango kwa kuijhinamii kichapanga Moleke.

6 "Anda mundo jhojhoha abhajhende bhibhalondo na akahabhe, kupala kulondola, naninkana mundo jwenio na kummeka kutale na bhando bhake. 7 Mikijhelebhule, nnyeketelwe kwango, ku nhwalo ne ndi Bhambo Chapanga, Chapanga gwino. 8 Mikamula mihilo jhango na kujhokonikiya. Ne ndi Bhambo Chapanga jhuninnyelebhula.

9 "Mundo jhojhoha jwampe likoto tate mundo amu majhe mundo, ipalwa akomwa. Nhwalo ampii likoto tate mundo amu majhe mundo, yene, namanya jwene.

10 "Anda munalome agholwike na nhwana jwa mundo jwa pahina, bhipalwa bhoha bhabhele bhakomwa. 11 Munalome anda agholwike nu jhumo pakate jha matala gha tate mundo, impe hone tatemundo, bhoha bhabhele bhipalwa bhakomwa. Kilebhe chenio nabhamanya bhene. 12 Munalome jhojhoha anda agholwike na kamwana mundo, bhoha bhabhele bhipalwa bhakomwa. Bhatehi kilebhe kibhoho hake, ghighapala kwakole nabhamanya bhene. 13 Anda munalome jhojhoha agholwike na munalome nnyake kukuntenda mwikeghe, bhoha bhabhele bhipalwa kukomwa, nhwalo bhatehi kilebhe chikichimwicha, ghighapala kwakole nabhamanya bhene. 14 Anda munalome atolii mwikeghe na nkohano mundo mwikeghe, gwenio ndi ulemo, bhoha bhatato bhipalwa bhakomelekelwa kwa mwotu, nhwalo bhatehi ubhoho. Ntenda yene kupala ubhoho ungabhe jhe pakate jhino mangota. 15 Anda munalome jhojhoha agholwike na kinyama ngita chagholoka na mwikeghe, ipalwa akomwa, na kinyama chenio kipalwa kikomwa. 16 Anda mwikeghe akiheghilii kinyama nakupala kugholoka nako ngita chagholoka na munalome, mwikeghe jwenio apalwa akomwa na kinyama chenio helahela kikomwa, ghighapala kwakole nabhamanya bhene.

17 "Munalome jhojhoha anda antolii nnombo mundo, abha mwana gwa tate mundo amu majhe mundo na kugholoka nako, chenio ndi kilebhe chikuchimwa. Bhipalwa bhabhekwa kutale na ndanga jhake. Nhwalo munalome jwenio ampii hone nnombo mundo, chikipakunkolela nakimanya jwene. 18 Anda munalome agholwike nu mwikeghe jwabhii piye, bhoha bhabhele bhipalwa kubhekwa kutale na bhando bhabhe, nhwalo bhoha bhabhele bhatwekwii mihilo jha kujheketelwa na gwangajheketelwa palonge jha Bhambo Chapanga.

19 "Mangagholoka jhe na nnombo gwa majhe gwino hilu nihenga gwino, nhwalo kilebhe chenie kipakwape hone akalongo bhino bha pahina. Bhoha bhibhatenda gheniya ghighapala kwakole nabhamanya bhene. 20 Anda mundo agholwike na nhwana gwa tate mundo nkolo amu nchokombe, impe hone tate mundo nkolo amu nchokombe, bhoha bhabhele nabhabha na malemwa, bhoha nabhahwa changa yana. 21 Anda munalome antolile mwikeghe jwa nnongo mundo, ampe hone nnongo mundo, gwenio ndi gwangajheketelwa kwa Chapanga, bhoha bhabhele nabhahwa changa yana.

22 "Mipalwa kukamuu na kuikengama mihilo jhango jhoha, andajhe kilambo chu ku Kanaane chinnimpeleka nakinkana. 23 Mangakengama jhe homo ya bhando bhi kilambo chinabhengita palonge jhino mu kilambo chimitama, bhando bheniya bhatehila gheniya, nanenga nganachimwa hake. 24 Nambo nalobholile njwe, namikitola kilambo chabhe, nanimpela kilambo chenie kibhehe chino, kilambo chikibholii kukulema nu kukoleka inyama. Ne ndi Bhambo Chapanga, Chapanga gwino ninhagwii kuhumii bhando ilambo henge. 25 Ku yene, mipalwa mmanya kupembuu pakate jha kinyama chikijhetelwa palonge jha Bhambo Chapanga na changajheketelwa palonge jha Chapanga. Anda mpapiye a kimanya amu kijhune amu chochoha chikikwabha pa nnema chinongila kijheketelwa jhe palonge jhango, bhahe, mangota nanyeketelwa jhe nnonge jha Bhambo Chapanga. 26 Ne Bhambo Chapanga ndi nanyahinyahi, mangota nimmekitengine kulate na bhando bha ilambo henge, kupala mma bhando bhango, namma nyahinyahi.

27 "Munalome amu mwikeghe jhojhoha jwalondola amu nhwabhe, apalwa akomwa kukumbula maghanga. Bhoha bhabhele munalome na mwikeghe, ghighapala kwakole nabhamanya bhene."