1 Bhambo Chapanga ngannobholila Mucha ku kitombe chuku Chinae, 2 "Malobholela Akaichilahele kubhehe, ‘Pibhapa kuhika kukilambo chanapile ne Bhambo Chapanga, mangalema jhe, kila chaka cha chaba mikileka kilambo kipomolela ku ichima jha liina lyango ne Bhambo Chapanga. 3 Kwa kipinde cha yaka chita milema kilambo nu kupanda, nu kukulughalila michabibo jhino nu kuhuna mahuno ghake. 4 Nambo mu chaka cha chaba nng'onda upomolela, ndi chaka chukupomolela, ku nhwalo alaghii Bhambo Chapanga. Nkoto kupanda mbejho jhojhoha munng'onda gwino, amu kukulughila michabibo hino. 5 Chochoha chikimela chenie mangahuna jhe amu kutongola chabibo kubhoke mumikongo jhangapatula. Nakibhaha chaka cha kupomolela kwa nnema. 6 Chochoha chikimela chene kwa chaka cha kupomolela nakibhaha chakulya chino na akabhanda bhino akanalome na akakeghe na bhando bhino bhubhakamwi mahengo na akaghene bhibhatama pamonga na mwenga, 7 na ipugho hino na inyama yukumanyahe itama pakate jhino.’ "

8 Mibhalanga yaka chaba mala chaba, kupala mma na yaka makome ncheche na ticha. 9 Peniya, mu lichiko lya kome lya mwehe gwa chaba ndi Lichiko lino lya Ujhelanicho na Chapanga, namuntuma mundo kuhona lipenenga mu kilambo choha. 10 Chaka cha makome nhwano, ndi chaka cha Bhambo Chapanga cha chukwape akabhanda bhoha uhulo kukilambo choha, mu chaka chenio ilebhe yoha ichulwichwe ibhujhichwa kwa bhibhachulwiche amu kwa yana yabhe na mundo jhojhoha jwa chulwichwa ngita mmanda abhujhichwa kwa akalongo bhake. 11 Nhwalo chaka chenie cha makome nhwano nakibhaha ndi Chaka cha unyagho gwa ukombochelo kwino, mangapanda jhe mbejho hilu kuhuna chochoha chikimela chenie amu kuhuna chabibo yangakulughalila. 12 Chaka chenie ndi chaka cha unyagho kwino, nakibhaha chaka cha nyahinyahi kwino. Yene mangalye jhe imelite yene mu mighonda.

13 "Mu chaka chenie cha unyagho gwa ukombochelo chochoha chikichulwichwe, kipalwa abhujhichilwa kwa nkolo chake. 14 Kabhele anda muchuluchii kilebhe nnyino amu kuhemela kilebhe chochoha kwa nnyino, mangamponja jhe. 15 Bei jha nng'onda ipalwa ilengana na yaka ihighilile kabula jhukuika yaka makome nhwano, yukubhujhichilwa jwenie. 16 Yaka pibhehe yamahele nanyonjokeya bei anda yaka pibhehe michoko nampongocha bei, nhwalo chikibhujhichwa nakipemwa tela na mahuno ghighapakuhunwa. 17 Hilu mangaponjana jhe, nambo munnyoghopa Chapanga gwino. Ne ndi Bhambo Chapanga, Chapanga gwino."

18 "Ku yene, mikengama mihilo jhango, nu kuijhokanikiya mihilo jhango kupala ntama njelembo mu kilambo. 19 Kilambo nakipiya mahuno ghake na mangota nannya nu kujhukuta nu kutama mwenio njelembo.

20 "Nambo pange minhwachi, ‘Na tulya nike mu chaka cha chaba tukanikilwe kupanda amu kuhuna mahuno ghito?’ 21 Jhokanikiya! Ne chanikipela mota kilambo mu chaka cha chita na chenie nakipiya mahuno ghu kukwela kwa yaka itato. 22 Pumpakupanda mu chaka cha nane milya mahuno gha makacho nanyendelela kulye tugha ade mu chaka cha ticha pumpakutumbu kuhuna kabhele.

23 "Mangachulucha jhe nnema nhwalo nnema ndi gwango nenga na mangota akaghene tugha na hele akapeta ndela mu kilambo chango.

24 "Nnema gwoha ghupakutola kubhehe gwino mipalwa kukombola nnema yane kuheme kabhele. 25 Anda nnongo gwino ndi nhwocho, ngachulwicha nng'onda gwake, nnongo mundo jwa pahina hake aghombola nng'onda gwenio. 26 Anda mundo jwenio akwetii jhe nnongo mundo jwa pahina jwapala kughombola, nambo kubhoke peniya, ahoto kupata mbijha, ahoto kughombola nng'onda gwake. 27 Nabhalanga yaka kubhoke pachulwicha nu kulepa, chikijhonjikike amujhichila mundo jwahemile, jwenio napalwa amujhichila nng'onda gwake. 28 Nambo anda abhichepa kughombola, bhahe nnema gwenio nauhighala kwa jwahemi ade chaka cha Unyagho gwa ukombochelo gwa yaka makome nhwano. Mu chaka chenie ipalwa nng'onda gwenio bhamujhichila nkolo nng'onda.

29 "Kabhele anda mundo achulwiche nyumba jhake jhu kutama jhibhii mu muche ghutindikilwe mapamanda, jwenio ahoto kughombola mu chaka chimo kubhoke mu kuchulucha kwake. Kwa chaka chenio choha ahoto kuighombola. 30 Anda nyumba jhenio ibhii nkate jhikilambo chikitindikilwe mapamanda ikombolii jhe mu chaka chimo, bhahe naibha jhake jwahemile machiko ghoha ghangapeta na kuibheluko yake yoha hilu nabhujhicha jhe mu Chaka cha Unyagho gwa ukombokelo gwa chaka cha makome nhwano. 31 Nambo chenda yangatindikilwa lipamanda, nibhalangwa ngita mighonda. Peniya, ihoto kughombolelwa kwa kipinde cha chaka chimo nu kumujhichila nkolo nyumba mu Chaka cha Unyagho gwa ukombokelo gwa chaka cha makome nhwano. 32 Pamo na gheniya, nyumba jhibhii kubomane bhibhatama Akalabhe jhichulwichwe ihoto kughombolelwa kipinde chochoha. 33 Anda Nnabhe alepalile kughombola nyumba jhake ichulwichwe kwa kipinde cha chaka chimo mumuche ghubhatama Akalabhe, bhahe nyumba jhenie ibhujhichwa kwa nkolo jhake mu Chaka cha Unyagho gwa ukombokelo gwa chaka cha makome nhwano. Ku nhwalo yenio bhapeilwa kubhehe yabhe pakate jha Akaichilahele machiko ghoha ghangapeta. 34 Nambo chehemo jha kuluchi inyama ya itindila miche ya Akalabhe yangachuluchwa jhe, nhwalo peniya bhapeilwe ku nhwalo gwa bheniya machiko ghoha ghangapeta.

35 "Anda nnongo gwino Mwichilahele jwatama pakate jhino abhii nhwocho, ahoto jhe kukitangatila jwene, mipalwa untangatila ajhendelela kutama pamonga na mwenga, ngita chintangatila nng'ene amu mpeta ndela jwabhii kwino. 36 Mangapala jhe annepa nyonjekeo kwa chela chunnyaike. Nambo munyinamila Chapanga kupala nnongo gwino apata kutama pamonga na mwenga. 37 Mangankopecha jhe mbijha kwa nyonjekelo amu kumpe chakulya kupala annepa nyonjekelo. 38 Nkombokela kubhehe ne ndi Bhambo Chapanga, Chapanga gwino, jwanimmohita kuhumii kukilambo chuku Michile kupala nimpelengane kilambo chuku Kanaane, kupala nenga mmehe Chapanga gwino.

39 "Anda nnongo gwino Mwichilahele jwatama pamonga na mwenga abhii nhwocho, akichulwiche kwino, mangantenda jhe antumikila ngita mmanda. 40 Natama na mwenga ngita ntumiche jwalepwa amu mpeta ndela. Nantumikila ade kuika chaka cha Unyagho gwa ukombokelo gwa chaka cha makome nhwano. 41 Chaka chenie ipalwa jwenio na yana mundo bhalekekelwa, jwenie abhujha kwa akalongo mundo na uliche gwa akatate mundo, 42 ku nhwalo Akaichilahele ndi akatumiche bhango, bheniya nganabhohita kukilambo chuku Michile, bhahe, bhangachuluchwa jhe ngita akabhanda. 43 Mangantende jhe ukokotoko kwa akalongo bhino kwa Akaichilahele, nambo munyinamila Chapanga gwino. 44 Anda mipala kwapata akabhanda akakeghe na akanalome, mihoto kwahemela kubhoke kwa bhando bhi ilambo henge ya pahina. 45 Kabhele, mihoto kwahemela akabhanda kuhumii kwa akaghene bhibhatama pamonga na mwenga na akalongo bhabhe bhibhabhelwike mu kilambo chino, namangota nabhabha bhino. 46 Anda mabhene nhwile, akabhanda bheniya mihoto kwakamuya kwa yana ino bhabhaha uliche gwabhe machiko ghoha ghangapeta. Bheniya mihoto kwatenda akabhanda bhino, nambo ku nhwalo gwa nnongo gwino Mwichilahele mangantende jhe kukokotoko.

47 "Anda nng'ene amu mpeta ndela jwaitama pakate jhino abhii na ilebhe mbwe na nnongo gwino abhii nhocho nu kukichulucha kwa nng'ene amu kwa mpeta ndela amu kwa jhumo pakate jha akalongo bhake, 48 ahoto kughombolelwa kubhoke pakichulwicha. Jhumo pakate jha nnongo mundo ahoto hele kunkombola. 49 Njomba mundo ahoto kunkombola, amu mwana jwa njomba mundo amu nnongo mundo jwa pahina mulukolo lwake, ahoto helahela kukikombola jwenie anda abhii nu uhotolo gwa kutenda yenio. 50 Jwenio pamonga na jwanhemile jhola nabhatenda, nabhabhalanga yaka kutumbulii pakichulwicha ade chaka chu Unyagho gwa kukombokela gwa yaka makome nhwano. Bei jhukuchuluchwa kwake ibha tela na kibhalango cha yaka yake yantumikile. Kipinde chakibha mmanda jwa munahota gwake nakipemwa ngita kipinde cha ntumiche jwalepwa. 51 Anda kibhalango cha yaka ade chaka chu Unyagho gwa kukombokela cha yaka makome nhwano ndi yamahena hake, bhahe alepa bei ngolongwa kupeta bei jhukunhemela. 52 Kabhele anda ihighilike yaka yandina tugha ade chaka chu Unyagho ghukukombokela kwa chaka cha makome nhwano, abhalangilwa yaka kulengana na yaka ihighilike nu kulepa chiipalwa. 53 Kipinde choha chapakubhehe kwa munahota gwake ipalwa ahengelwa ngita ntumiche jwalepwa kila chaka. Jwenio jwanhemile angantende jhe ukokotoko. 54 Nambo anda mundo jwenio na akalongo mundo bhankombwii jhe kwa ndela jhenie, bhahe, nalekekelwa mu chaka cha Unyagho gwa ukombokelo gwa yaka makome nhwano. 55 Akaichilahele ndi akatumiche bhango, nhwalo nganabhohita ku kilambo chuku Michile. Ne ndi Bhambo Chapanga, Chapanga gwino.