1 "Mangatendekeya jhe inyagho yoyoha ya ichapanga yoyoha, mangakamuu jhe inyagho yabhe yukubhacha hilu inala amu inyagho ya maghanga ghighaokonywilwe mu kilambo chino, kupala mughajhinamila. Ne ndi Bhambo Chapanga, Chapanga gwino. 2 Maghakamula machiko ghango gha Kupomolela, nu kulitembekeya Lihema lyango lya nyahinyahi. Ne ndi Bhambo Chapanga.

3 "Anda muikamwile nhwilo gwango nu kukengama malaghalikilo ghango nu kubhehe, 4 peniya, nainkomela hula kipinde chikipalwa kilambo nakipiya mahuno ghamahele, na mikongo jha kumighonda naipambika uhoe gwake. 5 Nanyendelela kuhuna mahuno gha chakulya ade kipinde chukuhuna chabibo, na kipinde chukuhunwa chabibo ade kipinde chukupanda mbejho. Namma na chakulya chamahena nu kutama njelembo mu kilambo chino.

6 "Nanimpela uteeke mu kilambo nang'ogholoka changa jhoghopa kilebhe chochoha. Naniingangila kutale inyama ikale mu kilambo chino na kilambo chino naipitii ng'o ngondo. 7 Namabhenga akamakoko bhino na kwakoma ku upanga. 8 Na bhando nhwano bha kajhino nabhabhenga akamakoko miya jhimo, na bhando miya kuhumii kwino bhihoto kwabhenga akamakoko elufo kome. Akamakoko bhino nabhakomelekelwa palonge jhino kwa upanga. 9 Nanimpela mota nu kummeka mpatangana yana twe nu kujhonjekeka, na nenga nanilibheka nganganga Lilaghano lyango kwino. 10 Kipinde cha mahuno namma mwamela makalye mahuno gha makacho, kabhele naimpala ata ghala gha chaka chikipetite namughabhoha kupala kubheka mahuno mayono. 11 Na nenga chandatama pakate jhino mu lihema lya Chapanga, hilu naninnekangana jhe. 12 Nanenga namma pakate jhino nanenga namma Chapanga gwino na mangota namma mabhando bhango. 13 Ne ndi Bhambo Chapanga, Chapanga gwino, jhunimmohita kukilambo chuku Michile kupala mangabhe jhe akabhanda bhuku Michile. Nenga mohite lingolengole mu mitandala jhino nu kuntenda ntyanga changa jhoghopa."

14 Bhambo Chambanga ngajhendilila kulonge, "Nambo anda namunyokanikii jhe, amu kuikengama mihilo jhango, 15 mangota anda mpuchite kuikengama mihilo jhango, na kuichimwa malaghalikilo ghango nu kulepelela kuikengama mihilo jhango jhoha nu kulitwekuu lilaghano lyango, 16 bhahe, nenga nandenda kumbula kukunete kiholo kikolongwa chakuchitukila, na kunnetela malwalo gha kunkoma, na malwalo ghu kunkojholana miho na kuntenda nkombale. Nampanda mbejho nambo kibhii jhe chipakujhambulila, nambo akamakoko bhino ndi bhibhapa kulye. 17 Ne naning'alambuka kupala mangota mpomondwa na akamakoko bhino, nannongochwa na bhibhanchimwa. Nabhanyoghowa nakutila kongo abhii jhe mundo jhojhoha jwammutuwa.

18 "Nu kubhoke pukuhadabula yene, anda naunnyokonikiya jhe, bhahe, naninchwapula mala pachaba hake, ku nhwalo gwa uhakaho gwino. 19 Lighoho lino nanikikangila kutale kukutenda kunane kwa Chapanga okwo kubha kujhomo ngita choma, na hula naikoma jhe mukilambo chino na nnema gwino nubhaha nnyomo ngita shaba. 20 Nantumila makakala ghino jhajhe nhwalo mighonda naipiya jhe mahuno na mikongo jha kilambo chino naipambika jhe uhoe.

21 "Anda nnyendelii kubhehe akamakoko bhango nu kukana kunnyokanikiya, nanyonjekeya kabhele luhadabulo lwino mala pachaba kulenganii kujholoka kwa uhakaho gwino. 22 Naninnetela inyama ikale pakate jhino yenie naipukila yana ino nu kulye ipugho ino, na kumpongocha, na ndela jhino pabhe jhe bhando bhukupeta.

23 "Ata nyomolele kunhadabula mammela mingana kunnyokanikiya nenga, nambo michocha kungana nenga, 24 bhahe, na nenga naninkanangana mangota nu kwahadabula mala pachaba kuchocha, ku nhwalo gwa uhakaho gwino. 25 Chaninnetela ngondo kwino, jhipakwabula kupala kulepa mabhoho nhwalo mulitwekwii Lilaghano. Mangota mmutukila mu miche jhino, nambo chanimpelekela malwalo mabhoho nu kuntenda nnepelele kwa akamakoko bhino. 26 Chambongocha chakulya chino, na ata akakeghe kome nabhatelekela kiinja chimo tu kuunyii mabumunda. Nabhammaghulila ku ipemo, na ata nnyakila bhole namujhukuta jhe.

27 "Kabhele kubhoke pa gheniya, ghoha mamela minyokanikia jhe nu kujhendele kungana, 28 bhahe, na nenga ninkanangana mangota kwa lilaka hake, na kunhadabula kupeta mala chaba kwa makakala kuchocha ku nhwalo jha uhakaho gwino. 29 Njala naibhaha ngolongwa muno kwino, ade namijhakila yana ino inalome na ikeghe. 30 Nanhangabhana chehemo jhino jha kujhinamii ku itombe, nandilulana chehemo jhino jhukuhukilikii ubane na kutaghii malelo ghino panane jha inyagho ya ichapanga ino. Na nenga naninchimwangana hake. 31 Naniitenda miche ino kubhehe mahame na kuhangabhana chehemo jhino panyahinyahi pukunnyinamii nenga Bhambo Chapanga, na luhumba lwambone lwa matimbiko ghino na lujheketelwa ng'o. 32 Chanhangabhana kilambo chino, ade akamakoko bhibhahami mwenio nabhankangacha. 33 Chaninnetela ngondo jhipakuntenda mpechangine na kujhenda mu ilambo yuughene. Kilambo chino nakihangabhanwa na miche naihighilika kubhehe mahame. 34 Mangota namma mu mabhoko gha akamakoko bhino, peniya, kilambo pikipala kuhanganila kupomole kwake kipinde kilambo pikipala kubhehe mu ukebha. Kilambo nakipomolela nu kuhanganila kupomolela kwake. 35 Kipinde choha kilambo pipakubhehe mu ukebha kilambo naihanganila kupomolela kwake nukuhanganila kupomolela kwake kipinde chenie kipatikine jhe mu kupomolela kwino pumatamita mwenio."

36 "Na bhando bhange pakate jhino bhibhapakuighala mu ilambo ya akamakoko bhabhe chanatenda kujhoghopa umiojho jhabhe, ilambo ya akamakoko bhabhe ata lihamba pilipakugwehe nammutuka. Nabhabhutuka ngita mundo chabhutuka ngondo. Nabhabhutuka nu kugwe na abhii jhe mundo jwabhabhutuya. 37 Nabhagwelelana ngita mundo jwatila ngondo ata abhii jhe jwammengabhenga. Nabhabhe jhe ni makakala ghoghoha ghakwahoto akamakaoko bhino. 38 Nanyomokela mu ilambo ya bhando bhange, bhando bha kilambo chenio nabhantenda muhweghe. 39 Anda bhange pakate jhino bhalamite mu kilambo cha akamakoko bhino nabhakombala nu kuhwegha ku nhwalo gwa uhakaho gwabhe, na ku nhwalo gwa uhakaho gwa akanahota bhabhe.

40 "Nambo anda ibheluko ino ngabhajheketile kuuleka uhakaho gwabhe nu kung'alambukila nenga na uhakaho gwa akanahota bhabhe panane jha malemwa ghibhateila kwa nenga, na kungana kwabhe nenga, 41 ngabhamanye ku nhwalo gwa nike, nganakanita na kwapeleka kukilambo cha akamakoko bhabhe, anda chakaka mwojho jhabhe gwa lighoho utembekiye na kunyeketela uhakaho nu kung'alambukila, 42 bhahe, nanenga nanilikomboka lilaghano lyango lyamekite na Ulahimo na Ichaka na Yakobu, na kukomboka kilambo chela chanalaghila. 43 Kipinde chibhapakubhe panja jha kilambo chabhe, kilambo chenie nakihanganila kupomolela kwake, pikipala kubhehe muukebha, pibhakibha kuughene. Kipinde chenie, bheniya nabhahadabulwa na bheniye nabhalela 44 Nambo pamonga na gheniya ghoha pibhakubhehe mu kilambo cha akamakoko bhabhe, nenga chanaleka jhe, amu kwachimwa amu kwakomelekeya njwe, nu kutweku lilaghano lyango. 45 Nambo Kunhwalo gwabhe chanilikomboka lilaghano lyandeile nu akanahota bhabhe bheniya nganabhohita kukilambo chuku Michile, bhando bha ilambo henge bhakalolagha, kupala mma Chapanga jwabhe. Ne ndi Bhambo Chapanga."

46 Jhenie ndi mihilo na malaghalikilo ghapeilwa Mucha na Bhambo Chapanga kwapela bhando bhuku Ichilahele ku kitombe chuku Chinae.