1 Peniya, Bhambo Chapanga ngannobholila Mucha, 2 "Malobholela bhando bhuku Ichilahele, bhannetela mahuta ghighaminyitwe mbone gha micheitune, ku nhwalo jha lumule lwenio lujhendelela kujhaka machiko ghoha. 3 Alune napamba mule yenio nkate jha Lihema lya Chapanga, panja jha lipanjiya lya Lichanduko lya Lilaghano kupala ijhaka nnonge jhango kilo ndaa ade lukela. Ghongo ndi nhwilo ghukukamuu machiko ghoha ghangapeta mu ibheluko ino. 4 Alune naibheka mule yenie panane jha kinala chukubheke mule ya chaabo jhambone ijhaka machiko ghoha nnonge jha Bhambo Chapanga.

5 "Tola uhembe ghunakutema, kilo kome ni ibhele nu kujhocha mabumunda kome na mabhele. 6 Mabumunda gheniya ghabhekwa michitale mibhele panane jha mecha jha chaabo jhambone jhibhii nnonge jha Bhambo Chapanga, kila nchitale mabumunda chita. 7 Mu kila nchitale mmeka ubane gwambone ghunungila, ibhaha chehemo jha litambiko lya kukomelekeya kupala libhaha litambiko lya ukombokelo kwa Bhambo Chapanga. 8 Kila Lichiko lya Kupomolela Alune naibheka mabumunda gheniya mumichitale telatela nnonge jhango ne Bhambo Chapanga, ku nhwalo gwa bhando bhuku Ichilahele, jhenio ndi mihilo jha machiko ghoha ghangapeta. 9 Jhenio naibha jha Alune na yana mundo, bheniya nabhalya, nhwalo lyenio ndi litambiko lilipihwa kwa nenga Bhambo Chapanga kwa mwotu. Lyenie ndi lipungu lyabhe lya machiko ghoha ghangapeta"

10 Lichiko limo ngaipitila bhulo kukighono, kangombo jhumo mwana jwa majhe jwaku Ichilahele na tate mundo jhuku Michile, ngakomina na munalome jhumo Mwichilahele. 11 Bhahe, kangombo jwenio majhe mundo akemitwa Shelomote bite Dibile jwa likabila lya Dane, jwenio ngalighita nu kulibheka nhwilo liina lya Bhambo Chapanga. Bhando bhibhakibha peniya ngabhampelika kangombo jwenio kwa Mucha, 12 na jwenio ngannindila nkate ade Bhambo Chapanga papakunnobholela chukuntenda kangombo jwenio.

13 Bhahe, Bhambo Chapanga ngannobholila kabhele Mucha, 14 "Ntola kangombo jwenio nu kumpiya panja jha kighono, na bhando bhoha bhubhajhohine palighita nabhatondobheya mabhoko ghabhe panane jha muto gwake, na peniya, bhando bhoha nabhankoma ku kumbula maghanga. 15 Namwe malobholela bhando bhuku Ichilahele kubhehe mundo jhojhoha jwapa kunnigha Chapanga gwake, nahadabulwa tela na uhakaho gwake. 16 Mundo jhojhoha abhehe nkolo kilambo amu aghene jwannigha Bhambo Chapanga, bhando bhoha nabhankoma ku kumbula maghanga.

17 "Mundo jhojhoha anda ankomite nnyake najwenio ipalwa akomwa, 18 na mundo jhojhoha jwapakukoma kinyama cha nnyake apalwa alepa kukuleta kinyama chenge chikibhi ghome, kulepechela kinyama chikikomitwe. Nhwilo ghongo ndi ughome kwa ughome.

19 "Mundo jhojhoha jwankochwii nnyake, na jwenio ipalwa akocholelwa ngita chankochwi nnyake. 20 Anda antwekwi kihupa na jwenio helahela atwekulwa kihupa ngita chenio chikitwekwilwe na liho kwa liho na lino kwa lino. Kila mundo jwannemwiye nnyake ipalwa na jwenie alepechelwa helenaha. 21 Mundo jwakikoma kinyama cha nnyake ipalwa kulepa kinyama chikibhi ghome, nambo mundo jhojhoha anda ankomite mundo jhonge ipalwa na jwenie hele akomwa. 22 Mabhoha mikamula mihilo jhenje abha nng'ene amu nkolo kilambo. Ne ndi Bhambo Chapanga, Chapanga gwino."

23 Peniya, Mucha ngabhalobholila Akaichilahele gheniya ghoha, ngabhampelika mundo jhola jwannighite Bhambo Chapanga panja jha kighono, ngabhankomita kwa kumbula maghanga. Akaichilahele ngabhatehila telatela ngita Mucha chalaghalikilwa na Bhambo Chapanga.