1 Bhambo Chapanga ngannobholila Mucha, 2 "Malobholele bhando bhu ku Ichilahele kubhehe, anda mundo abhekite nachile jhukumpiya mundo kwa Bhambo Chapanga, mundo jwenio ahoto kupiya nachile jhake kukulepa mbijha jhibhekwitwe tela na mbijha chibhekwite ngita yene. 3 Munalome jwa yaka makome mabhelele ade yaka makome chita naghombolwa kwa ipande amchine ya madine gha feza kulengana ni kipemo cha Lihema lya Chapanga. 4 Anda mwikeghe, naghombolelwa kwa ipande makome matato gha madine gha feza. 5 Anda mundo jwenio jwa yaka nhwano ade makome mabhele naghombolwa kwa ipande makome mabhele gha madine gha feza, anda mwinkeghe ipande kome ya madine gha feza. 6 Anda mwana jwa mwehe ghumo ade yaka nhwano naghombolwa kwa ipande nhwano ya madine gha feza, anda mwana mwikeghe naghombolwa kwa ipande itato ya madine gha feza. 7 Anda mundo jwa yaka makome chita na kujhendelela, kwa munalome naghombolelwa ku ipande kome nu nhwano na kwa mwikeghe naghombolelwa kwa ipande kome ya madine gha feza.

8 "Nambo anda mundo jwenio jwabhekite nachile ndi nhwocho hake ahoto jhe kulepa malepo ghighabhekitwe, bhahe mundo jwenio napelekwa kwa mpiya litambiko. Jwenio naamulicha bei jhake tela na mundo jwenio jwabhekite nachile.

9 "Anda nachile jhenie ku nhwalo gwa kinyama, bhando bhimpiikiya Bhambo Chapanga litambiko, bhahe, kinyama chenie kibhaha kinyahinyahi. 10 Naijheketelwa jhe kujhangangana kinyama chenio kwa kinyama chenge chochoha, kinyama chambone kwa kinyama changanandela amu kinyama changanandela na kwa kinyama chambone. Anda bhatei yene inyama yoha ibhele na ibhaha ya nyahinyahi, kwa Bhambo Chapanga. 11 Anda nachile yene, akibhekii kinyama changajheketelwa kwa Bhambo Chapanga, yane changapalwa kumpiikiya Bhambo chapanga, kinyama chenie kipalwa kiletwa kwa mpiya litambiko, 12 na mpiya litambiko jwenio nakilingukiya kinyama chenie anda kibhi mbone amu kihakanaho. Bei jhapakulongela mpiya litambiko, ndi ipakubhe. 13 Nambo jwenie ipalwa kukighombola kinyama chenie, apalwa ajhonjekeya lipungu limo pakate jha makome nhwano jha bei jhi kinyama chenie.

14 "Mundo anda apiite nyumba jhake kubhehe jha Bhambo Chapanga, mpiya litambiko nailingukiya nyumba jhenie anda jhinakuhalala amu ihalii jhe. Bei jhipakulongelwa na mpiya litambiko, ibha jhejhe. 15 Anda mundo jwaipiite nyumba jhake apakuighombola, apalwa ajhonjekeya lipungu limo pakate jha mapungu nhwano gwa bei jhake, na nyumba jhenie naibha jhake.

16 "Anda mundo apiite kipande chake cha nng'onda gwa uliche kubhehe gwa Bhambo Chapanga, bei jhake jhibhekwite tela na mbejho ipalwa kupandwa munng'onda gwenio, kwa kilo makome mabhele ya chaile bei jhake ibha ipande amuchine gha maghanga gha madine gha feza. 17 Anda mundo aupiite nng'onda gwake chaka cha Unyagho gwa kukombokela yaka makome nhwano, bei jhipalwa jhibha jhejhejhene. 18 Nambo anda mundo jwapiite nng'onda gwake kubhoke pa Unyagho gwa kukombokela yaka makome nhwano, mpiya litambiko nabheka bei jhake tela na yaka iighalii kuiki chaka cha Unyagho gwenio na bei ipalwa ipongochwa. 19 Anda jwenie jwapiite kubhehe gha Bhambo Chapanga apala kuighombola, bhahe, apalwa ajhonjekeya lipungu limo pakate jha mapungu nhwano jha bei jhake, na nng'onda gwenio naubha gwake kabhele. 20 Nambo anda apahi jhe kuughombola amu mpiya litambiko anchuluchile mundo jhonge, bhahe, nng'onda gwenio uhoto jhe kughombolelwa kabhele. 21 Nng'onda upalwa ughombolwa chaka cha unyagho gwa kombokela yaka makome nhwano yane, ubha nyahinyahi, ngita nng'onda chiupiitwa kwa Bhambo Chapanga, gwenio ubha gwa mpiya litambiko.

22 "Kabhele anda mundo apiite nng'onda gwake gwahemile kubhehe gwa Bhambo Chapanga, yane gwangabhe nng'onda gwa uliche gwake, 23 na mpiya litambiko naamulicha bei jha nng'onda gwenio ku kulenganii na yaka iighalile kuiki chaka chu unyagho gwa ukombokelo gwa yaka makome nhwano, na mundo jwenio ipalwa kulepa bei jhake mulichiko lyenio ngita kilebhe nyahinyahi kwa Bhambo Chapanga. 24 Nambo mu chaka chu Unyagho gwa ukombokelo kwa yaka makome nhwano, nng'onda gwenio abhujhichilwa jhola jwachulwiche.

25 "Kila bei ibhekitwe tela na bei jha ipande ya madine gha feza itumika mu Lihema lya Chapanga. Utopaho gwa gilamo miya ibhele gha madine gha feza.

26 "Ipalwa jhe kukipiya kibheluko chukulobhoka chi kinyama, nhwalo chenie ndi cha Bhambo Chapanga, abha ng'ombi amu limbelele. 27 Kinyama changajheketelwa palonge jha Bhambo Chapanga kupihwa litambiko palonge jha Bhambo Chapanga, jhuna kinyama chake ipalwa kuhemela kwa bei jhibhekitwe, na ajhonjekeya lipungu limo kate jha mapungu nhwano gha bei jhenio. Anda aghombwilwe jhe, kinyama chenie nakichuluchwa kwa bei jhibhekitwe.

28 "Nambo kilebhe chochoha chikibhekitwe kwa Bhambo Chapanga, ibhaha mundo amu kinyama amu nng'onda gwa ubhujhilo, kihoto kuchuluchwa amu kughombolelwa. Chochoha chikipiitwe kubhehe cha Bhambo Chapanga ndi kinyahinyahi hake. 29 Mundo jhojhoha jwabhekitwe kilebhe kibhohojwapiite akomwa, kupala angakighombo jhe. Mundo jwenio apalwa akomwa."

30 Zaka ya mahuno libha lya mahuno amu uhoe gwa mikongo, ndi yoha ya Bhambo Chapanga, ndi nyahinyahi kwa Bhambo Chapanga. 31 Anda mundo apala kughombola zaka ya litambiko, apalwa kujhonjekeya zaka jha bei jhake. 32 Ku nhwalo gwa ipugho pibhalangwa, kila kinyama cha kome ndi cha Bhambo Chapanga. 33 Mundo jhojhoha apalwa jhe kukonya anda kinyama chenie kihalile amu kihalii jhe hilu kinyama chenie mangajhangangana jhe na kinyama chenge. Anda nnyangangine na kinyama chenge, inyama yoha ibhele naibha nyahinyahi, naighombolelwa jhe.

34 Gwenio ndi nhwilo Bhambo Chapanga gwannaghalikiya Mucha pi kitombe chuku Chinae, kupala bhalobholela Akaichilahele.