1 "Anda mundo ipiya litambiko liliteta uteeke, na litambiko lyake ndi lya ng'ombi nkambaku amu jwankolo, bhahe, kinyama chenie kikoto kulemala palonge jhango. 2 Mundo jwenio nabheka lubhoko lwake pa muto gwa kinyama chenie nu kunchinja pannyango gwa Lihema lyukukonganikila. Akapiya matambiko bhana bha Alune nabhamichila myahe chehemo yoha ya kupiikiya litambiko. 3 Mahuta ghoha ghighajhenile jha matumbo gha kinyama cha litambiko lyenio lya uteeke, naghakomelekelwa ngita litambiko lya kumpiikiya Bhambo Chapanga kwa mwotu. 4 Kabhele nabhoha ndutumba yoha ibhele na mahuta ghake pamonga na chehemo jhambone jha kibhende. 5 Akapiya matambiko bhana bha Alune nabhakomelekeya chehemo jha kupiikiya litambiko pamonga na litambiko lya kukomelekelwa lilibhi panane jha hanjo ijhaka. Lyenie ndi litambiko lya kukomelekelwa kwa mwotu lilibhi na luhumba lwa kunhalalicha Bhambo Chapanga.

6 "Anda mundo apihite limbelele amu mbuhe kuhumii mulilongo ngita litambiko lya uteeke kwa Bhambo Chapanga, nanhaghula jwankambako amu jwankolo jwangalemala. 7 Anda mundo apiite litohe lya limbelele kubhehe litambiko lyake, bhahe, nanneta palonge jha Bhambo Chapanga, 8 nabheka lubhoko lwake pa muto gwa kinyama chenie nu kunchinja pa litangala lya Lihema lyukukonganikila. Akapiya matambiko bhana bha Alune nabhamichila myahe chehemo yoha jha kupiikiya litambiko. 9 Peniya, kuhumii mu litambiko lyene lya uteeke lyapiikilwa Bhambo Chapanga kwa mwotu, nampiikiya chehemo henge, mahuta ghake na nkela ghuna mahuta ghoha ghuhekitwe pahina na nng'ongo pamonga na mahuta ghoha ghighajhenile mu matumbo na mahuta ghoha ghighabhii mu matumbo, 10 na ndutumba ibhele na mahuta ghake pamonga na chehemo jhambone jha kibhende. 11 Mpiya litambiko naikomelekeya yenio yoha chehemo jha kupiikiya litambiko ngita chakulya chapiikilwa Bhambo Chapanga kwa mwotu.

12 "Anda litambiko lyake ndi mbuhe, bhahe, napiya palonge jha Bhambo Chapanga, 13 mundo jwenio nabheka lubhoko lwake pa muto gwa kinyama jwenio nu kunchinja palonge jha Lihema lya Bhambo Chapanga. Peniya yana ya Alune nabhamichila myahe jhake mu pande yoha jha kupiikiya litambiko. 14 Peniya, nabhoha mahuta ghoha ghighajhenile mu matumbo, 15 na ndutumba yoha ibhele pamonga na mahuta ghake pamonga na chehemo jhambone jha kibhende, nampiikiya Bhambo Chapanga ngita litambiko lya kukomelekelwa kwa mwotu. 16 Mpiya litambiko najhocha ilebhe yenio yoha chehemo jha kupiikiya litambiko ngita litambiko lya uhembe, chikipiwa kwa Bhambo Chapanga kwa mwotu, kupala luhumba lwake luhalalicha Bhambo Chapanga. Ku nhwalo mahuta ghoha ndi gha Bhambo Chapanga. 17 Ghongo ndi nhwilo gwa machiko ghoha kwa Akaichilahele na chehemo jhojhoha, kibheluko ade kibheluko pumpakutama mipalwa mukamula nhwilo gwenio. Mangalye jhe mahuta hilu myahe."