Levítico 18

6 "Mundo jhojhoha jwa ku Ichilahele ipalwa jhe kunheghele mundo jwannongo gwake jwa pahina kupala kugholoka nako. Ne ndi Bhambo Chapanga. 7 Mangampe jhe hone tategwino kukugholoka na majhe gwino jwampapite. Mangampe jhe hone, jwenio ndi majhe. 8 Mangampe jhe hone tategwino, kukugholoka na limo lya litala lyake. Bheniya ndi akamajhe bhino. 9 Mangagholoka jhe na alombo bhino, abha bhikimama chimo amu jwabhelwike na majhe gwino jhonge. 10 Mangagholoka jhe na nchoko gwino, mwana jwa mwana gwino munalome amu mwikeghe, nhwalo mikipehone mabhene. 11 Mangagholoka jhe na alombo bhino jwabhelwike na jhumo pakate jha matala gha tate gwino, jwenio ndi alombo bhino. 12 Mangagholoka jhe na ninhenga gwino, nhwalo jwenio ndi alombo bha tate gwino. 13 Mangagholoka jhe na majhe gwino nkolo amu nchokombe, nhwalo bheniya ndi akalongo bha majhe gwino. 14 Mangagholoka jhe na nhwana jwa tate gwino nkolo amu nchoko, jwenio ndi majhe gwino hele. 15 Mangagholoka jhe na nhwana gwa mwana gwino, nhwalo jwenio ndi kamwana gwino, mangagholoka nako jhe. 16 Mangagholoka jhe na nhwana jwa alongo bhino, jwenio ndi nnamo gwino. 17 Anda nng’olwike na mwikeghe, mangagholoka jhe na ichikana yake amu ichokolo yake. Bheniya akalongo, kwahangalana mitenda ubhoho hake. 18 Mangatolana jhe na nnombo gwa nhwana gwino na nhwana gwino ammela abhii ghome, kilebhe chenio nakileta bhulo pakate jhabhe."

19 "Mangagholoka jhe na mwikeghe jwabhii piye. 20 Mangagholoka jhe na nhwana gwa nnyino jwa pahina, na yene mikilete gwangajheketelwa kukunyinamii Chapanga. 21 Mangampiya jhe mwana gwino jhojhoha kubhehe litambiko ku kichapanga chuwange Moleke. Nhwalo kukutenda yene namililigha liina lyango ne Nachapanga gwino. Ne ndi Bhambo Chapanga. 22 Mangagholoka jhe na munalome nnyino ngita chimigholoka na mwikeghe. Chenie ndi kilebhe chakichimwa Chapanga. 23 Mangagholoka jhe na kinyama kupala gwangajheketelwa kukunyinamii Chapanga, munalome amu mwikeghe jhojhoha angatenda jhe yene, kukutenda yene ndi gwangajheketelwa palonge jha Bhambo Chapanga.