1 Jehanɛ ɔ, anyɛmimɛ suɔli, i ngɛ nyɛ kaie kaa Manye Munyu ɔ nɛ i fiɛ kɛ ha nyɛ nɛ nyɛ he ye nɛ nyɛ hɛɛ mi kɛ ba si mwɔnɛ ɔ, e tsakee we. 2 Manye Munyu nɛ ɔ nɔuu a kɛ ma he nyɛ yi wami ke nyɛ pɛtɛ he saminya kaa bɔ nɛ i fiɛ kɛ tsɔɔ nyɛ ɔ. Ke pi ja a, lɛɛ nyɛ he ye yaka gu.

3 Ejakaa munyu nɛ he hia pe kulaa nɛ a kɛ ha mi nɛ i ba de nyɛ ɔ ji kaa Kristo gbo ngɛ wa he yayami ɔmɛ a he kaa bɔ nɛ a de ngɛ Ngmami ɔmɛ a mi ɔ; 4 nɛ a pu lɛ, nɛ a tle lɛ si ekohu kɛ je gbeje ngɛ ligbi nɛ ji etɛ ɔ nɔ kaa bɔ nɛ gbali ɔmɛ gba a. 5 E je e he si ngɔ tsɔɔ Petro, nɛ pee se ɔ, e je e he si ngɔ tsɔɔ e kaseli "ni nyɔngma kɛ enyɔ" ɔmɛ. 6 Enɛ ɔ se ɔ, e je e he kpo ngɔ tsɔɔ nyɛmimɛ Kristo se nyɛɛli pe lafa enuɔ ngɛ be kake mi. Jamɛatsɛ ɔmɛ a ti nihi fuu ngɛ, se ni komɛ hu gbo. 7 Jehanɛ ɔ, Yakobo na lɛ, nɛ pee se ɔ, bɔfo ɔmɛ tsuo na lɛ. 8 Benɛ mɛ tsuo a na lɛ se ɔ, e je e he kpo ngɔ tsɔɔ ami hu kaa nɔ ko nɛ a je blɔ fɔ lɛ sekpɛ konɛ lɛ hu e na lɛ. 9 Ejakaa nɔ wayo pe kulaa ji mi ngɛ bɔfo ɔmɛ a kpɛti, nɛ i sɛ kaa a tsɛɔ mi bɔfo tete po ngɛ yi mi nɛ i wa Mawu asafo ɔ he je.

10 Se ngɛ Mawu mi mi jɔmi kɛ e dloomi nya nɛ i ji nɔ nɛ i ji nɛ ɔ nɛ. Nɛ e mi mi jɔmi kɛ e dloomi ɔ pee we yaka gu, ejakaa i tsu ni wawɛɛ pe bɔfo ɔmɛ tsuo, nɛ tsa pi ami nitsɛ ye he wami nya ni tsumi i, se mohu Mawu nɛ ngɛ ni tsue ngɛ ye mi nɛ e kɛ wo ye hɛ mi nyami. 11 Se slɔɔto ko be ami nɔ nɛ tsu ni wawɛɛ kɛ mɛ wa kpɛti, ejakaa nɔ́ nɛ he hia ji kaa wɔ tsuo wa fiɛ Manye Munyu ɔ ngɔ tsɔɔ nyɛ nɛ nyɛ he ye.

12 Se ke nyɛ he nɔ́ nɛ wa fiɛ ngɔ tsɔɔ nyɛ ɔ ye kaa a tle Kristo si kɛ je gbeje ɔ, lɛɛ mɛni he je nɛ nyɛ ti ni komɛ deɔ ke ni gbogboehi a si temi ko be ɔ? 13 Ejakaa ke ni gbogboehi a si temi ko be ɔ, lɛɛ tse Kristo hu ngɛ gbeje kɛ ba si mwɔnɛ ɔ nɛ a tle we lɛ si mɔ. 14 Nɛ ke a tle we lɛ si ɔ, lɛɛ se nami ko be wa fiɛmi ɔ he, nɛ nyɛ hɛ nɛ nyɛ kɛ fɔ Mawu nɔ ɔ hu peeɔ yaka gu; 15 nɛ wɔ bɔfo ɔmɛ hu wa peeɔ lakpatsɛmɛ, ejakaa wa ye odase kaa Mawu tle Kristo si kɛ je gbeje. 16 Se ke e ngɛ mi kaa ni gbogboehi a si temi ko be ɔ, lɛɛ a tle we Kristo hu si; 17 nɛ ke ja a, lɛɛ nyɛ hemi kɛ yemi kaa Mawu ma he nyɛ yi wami ɔ peeɔ yaka, nɛ nyɛ ngɛ hɛ mi kpatami ɔ mi ngɛ nyɛ yayami ɔmɛ a he kɛ sa. 18 Nɛ ke ja a, lɛɛ nihi tsuo nɛ gbo ngɛ Kristo mi ɔ hu laa. 19 Nɛ ke wami nɛ ɔ mi kɛkɛ wa hɛ ngɛ Kristo nɔ ngɛ ɔ, lɛɛ wa ni ngɛ mɔbɔ pe nihi kulaa nɛ a bɔ.

20 Se anɔkuale ɔ ji Kristo te si kɛ je gbeje nɛ lɛ ji kekle nɔ nɛ te si ngɛ nihi nɛ maa te si kɛ je gbeje ligbi ko ɔ a kpɛti.

21 Nɛ kaa bɔ nɛ gbenɔ gu nɔ kake nɛ ji Adam nɔ kɛ ba je mi ɔ, ja a nɔuu si temi ɔ gu Kristo nɔ kɛ ba. 22 Adam yayami ɔ he je nɛ nihi kulaa gboɔ ngɛ. Ejakaa Adam mi nɛ a je, nɛ he fɛɛ he nɛ yayami ngɛ ɔ, gbenɔ ngɛ lejɛ ɔ. Se nihi kulaa nɛ ngɔ a he kɛ ha Kristo ɔ, a ma tle mɛ si ekohu. 23 Se nɔ tsuaa nɔ kɛ e be. Kekleekle ɔ, Kristo te si. Enɛ ɔ se ɔ, e maa kpale kɛ ba nɛ e ni ɔmɛ tsuo ma na wami ekohu ngɛ e bami ɔ mi.

24 Enɛ ɔ se loko ji je ɔ nyagbe ɔ maa ba. Kristo maa ye he nyɛli kulaa a nɔ kunimi, nɛ jamɛ a be ɔ mi nɛ e maa ngɔ matsɛ yemi ɔ kɛ ha Tsɛ Mawu. 25 Ejakaa Kristo maa ye matsɛ kɛ ya si be nɛ e maa ye e he nyɛli ɔmɛ kulaa a nɔ kunimi. 26 Nɛ nyagbe he nyɛlɔ ɔ nɛ e maa ye e nɔ kunimi ɔ ji gbenɔ. 27 Ejakaa Mawu ngɔ nɔ yemi kɛ níhi kulaa a nɔ he wami ngɔ wo Kristo dɛ. Se Tsɛ ɔ nɛ ngɔ nɔ́ nɛ ɔmɛ tsuo a nɔ yemi ngɔ ha lɛ ɔ, lɛɛ Kristo be e nɔ he wami. 28 Ke Kristo ye e he nyɛli ɔmɛ kulaa a nɔ́ kunimi ɔ, lɛ nɛ ji Mawu Bi ɔ, e maa ngɔ e he kɛ wo Tsɛ ɔ nɛ ngɔ nɔ́ ɔmɛ ngɔ wo e dɛ ɔ sisi konɛ Mawu nɛ pee nɔ tsuaa nɔ yi.

29 Ke ni gbogboehi be si temi ko ɔ, lɛɛ mɛni he je a baptisii nihi ngɛ ni gbogboehi a nane mi mɔ? Mɛni he je nihi haa a baptisii mɛ ngɛ ni gbogboehi a nane mi ke a be hɛ nɔ kami kaa a maa te si?

30 Nɛ wɔ nitsɛmɛ hu, mɛni he nɛ wa ngɛ amanehlu nae ngmlɛfia fɛɛ ngmlɛfia ngɛ mɔ? 31 E ji anɔkuale kaa i ngɛ gbenɔ hyɛe daa je nɛ maa na ngɛ ye hɛ mi, nɛ anɔkuale ɔ pɛ i ngɛ nyɛ dee nɛ ɔ nɛ, kaa bɔ nɛ i fiaa kɛ fɔɔ nyɛ hemi kɛ yemi nɛ ngɛ wae ngɛ Nutsɔ ɔ mi ɔ nɔ ɔ. 32 Ke se nɛ ma na ngɛ zugba nɛ ɔ nɔ he je i ɔ, lɛɛ e sɛ nɛ i kɛ Efeso tsɛmɛ nɛ a ji lohwe dikali hwuɔ ta mɔ. Nɛ ke ni gbogboehi be si tee ɔ, lɛɛ tse wa ma de wa he ke nyɛ ha wa je wa hɛ ja, waa ye ni nɛ waa nu ni, ejakaa hwɔɔ ɔ wa ma gbo kɛkɛ nɔ́ fɛɛ nɔ nya be.

33 Nyɛ ko ha nɛ nihi nɛ deɔ ni nɛ ɔmɛ nɛ a sisi nyɛ, ejakaa ke nyɛ bu mɛ tue ɔ, nyɛ hu nyɛ maa pee a ni peemi ni ɔmɛ. 34 Nyɛɛ kase nile nɛ nyɛ kpa yayami peemi. I ngɛ nyɛ enɛ ɔ dee nɛ ma kɛ gbe nyɛ zo kaa nyɛ ti ni komɛ pi Kristo se nyɛɛli kulaa nɛ a li nɔ́ ko nɔ ko ngɛ Mawu he.

35 Se eko ɔ, nɔ ko ma bi ke, "Kɛ ni gbogboehi maa pee kɛ te si kɛ je gbeje kɛɛ? Mɛni nɔmlɔ tso a ma kɛ te si kɛ ba?" 36 Mɛni kuasia munyu ji enɛ ɔ! Ke o du dumi wu ɔ, e puɛ́ tso nɔuu, ja e "gbo" loko e yi naa wami. 37 Nɛ ke wu ɔ puɛ nɛ e je ba a, e slo lɛ ngɛ wu ɔ nɛ o du ɔ he. Ejakaa ngma wu loo dumi wu gbigbli kɛkɛ nɛ o du, 38 se Mawu haa wu ɔ tso nɛ e suɔ, nɛ ja a nɔuu e haa wu tsuaa wu e tso. 39 Kaa bɔ nɛ e slo wu tsuaa wu kɛ tso tsuaa tso ɔ, ja a nɔuu kɛ e slo nimli hu a he lo. E slo lohwehi a he lo, e slo nyu mi lohi a he lo, nɛ e slo lohwe pɛlitsɛhi a ní.

40 E slo hiɔwe nɔmlɔ tsohi ngɛ wa nɔ́ ɔmɛ a he, nɛ e slo a he fɛu kɛ a hɛ mi nyami, ngɛ wa nɔ he. 41 E slo pu hɛ mi nyami, nɛ e slo hlami hu hɛ mi nyami; nɛ e slo dodoehi a hɛ mi nyami. E slo dodoe kake he fɛu kɛ hɛ mi nyami ngɛ dodoe kpa he fɛu kɛ e hɛ mi nyami he.

42 Ja a nɔuu kɛ e maa slo nɔmlɔ tsohi nɛ wa ma kɛ te si ɔmɛ ngɛ nɔmlɔ tsohi nɛ wa hɛɛ ngɛ zugba a nɔ nɛ gboɔ nɛ saa amɛ a he. Ejakaa mɛɛ a be gboe hu. 43 Wa nɔmlɔ tsohi nɛ wa hɛɛ piɔ ɔ nuɔ hiɔ nɛ a gboɔ; se a ma tle mɛ si ngɛ hɛ mi nyami mi. A gbɔjɔ nɛ a ngɛ gbenɔ muɔ nya, se ke a tle mɛ si ekohu ɔ, a ma na he wami saminya. 44 A gboɔ kaa nɔmlɔ tsohi, nɛ a teɔ si kaa mumi mi nɔmlɔ tsohi. Ejakaa bɔ nɛ adebɔ mi nɔmlɔ tsohi ngɛ ɔ, ja a nɔuu nɛ mumi mi nɔmlɔ tsohi hu ngɛ.

45 Ngmami ɔ deɔ wɔ ke, Adam nɛ ji kekle nɔmlɔ nɛ a bɔ ɔ hɛɛ adebɔ nɔmlɔ tso, se Kristo lɛɛ e pe ja, ejakaa e hɛɛ mumi mi nɔmlɔ tso nɛ haa nɔ yi naa wami.

46 Lɔ ɔ ji kaa kekleekle ɔ, wa nine su adesa nɔmlɔ tso ɔmɛ a nɔ loko Mawu ha wɔ mumi mi nɔmlɔ tso ɔmɛ. 47 A bɔ Adam kɛ zu, se Kristo lɛɛ hiɔwe nɛ e je. 48 Adesa tsuaa adesa hɛɛ Adam nɔmlɔ tso nɛ a bɔ kɛ zu ɔ eko pɛpɛɛpɛ, se nihi kulaa nɛ plɛ Kristo bimɛ ɔ, a maa hɛɛ Kristo nɔmlɔ tso nɛ je hiɔwe ɔ. 49 Nɛ kaa bɔ nɛ wa ti nɔ tsuaa nɔ hɛɛ Adam nɔmlɔ tso amlɔ nɛ ɔ, ja a nɔuu kɛ wa maa hɛɛ nɔmlɔ tso nɛ ngɛ kaa Kristo nɔmlɔ tso hwɔɔ se ko.

50 Anyɛmimɛ, nɔ́ nɛ i ngɛ nyɛ dee ji kaa, zugba nɛ ɔ nɔ nɔmlɔ tso nɛ hɛɛ he lo kɛ muɔ be Mawu Matsɛyemi ɔ mi nyɛe maa sɛ. Wa nɔmlɔ tsohi nɛ puɛɔ nɛ ɔ pi nihi nɛ maa hi si kɛ ya neneene. 51 Se i ngɛ nyɛ nyakpɛ laami sane nɛ ɔ dee ke, tsa pi wɔ kulaa nɛ wa ma gbo, se a ma ha wɔ tsuo nɔmlɔ tso he. 52 E maa ba mi tlukaa ngɛ hɛ ngmɛfia mi, benɛ a ma kpa nyagbe tɛtlɛmatlɛ ɔ nɛ nihi nɛ gbo ngɛ Kristo mi ɔ maa te si tlukaa kɛ nɔmlɔ tso hehi nɛ be puɛe hu gbleegbleegblee. Kɛkɛ ɔ, wɔ nihi nɛ wa hɛ ngɛ ɔmɛ hu wa ma na nɔmlɔ tso hehi tlukaa. 53 Nɛ wa zugba nɛ ɔ nɔ nɔmlɔ tsohi nɛ wa hɛɛ amlɔ nɛ ɔ nɛ gboɔ ɔ, a ma plɛ mɛ hiɔwe nɔmlɔ tsohi nɛ be puɛe se a maa hi si kɛ ya neneene.

54 Ke enɛ ɔ ba mi ɔ, kɛkɛ ɔ nɔ́ nɛ Ngmami ɔ de ɔ maa ba mi kaa, "A ye gbenɔ nɔ kunimi." 55 Mo gbenɔ, jije o kunimi yemi ɔ ngɛ? Mo gbeje, jije o kɛɛ ɔ ngɛ? Ejakaa yayami nɛ kɛ gbenɔ baa a be si hie hu, 56 nɛ mlaa nɛ jeɔ wa yayami ɔmɛ kpo ɔ be wɔ kojoe hu. 57 Se sina ha Mawu, nɔ nɛ ha wa ye kunimi kɛ gu wa Nutsɔ Yesu Kristo nɔ ɔ. 58 Lɔ ɔ he je ɔ, anyɛmimɛ, akɛnɛ nɔ mi mami ngɛ kaa wa maa ye kunimi ɔ, nyɛɛ da si kpɛii, nɛ nyɛ wlua nyɛ he ngɛ Nutsɔ ɔ ni tsumi ɔ mi be fɛɛ be, ejakaa si abɔ nɛ si temi ngɛ ha gbogboehi nɛ ɔ, nyɛ dengme gbomi ɔ be yaka pee.