1 Coríntios 5

Paulo fa nɔ fiemi ngɛ sɔlemi ɔ mi

1 Nɔ tsuaa nɔ ngɛ ajuama bɔmi nɛ ngɛ nyɛ kpɛti ɔ he munyu tue. Enɛ ɔ ji yayami nɛ a nɛ ngɛ wɔ jali ɔmɛ tete a kpɛti. Nyɛ ti nɔ ko nɛ ngɛ asafo ɔ mi ngɛ e tsɛ yo ngɔe. 2 Mɛni he je nɛ nyɛ ngɛ nyɛ he nɔ woe ke nimli klɔuklɔu ji nyɛ mɔ? Mɛni he je nɛ nyɛ yi kɔmɔ konɛ a je nɔ nɛ tsu kikɛmɛ a zo ni nɛ ɔ kɛ je asafo ɔ mi?

3 I be nyɛ ngɔ ngɛ nɔmlɔ tso mi mohu, se i susuu kikɛmɛ a zo ni nɛ ɔ he, nɛ ngɛ Nutsɔ Yesu Kristo biɛ mi ɔ, i susu nɔ́ nɛ sa kaa a pee ajuama bɔlɔ ɔ. 4 Lɔ ɔ ji kaa nyɛ tsɛ asafo ɔ kpe ngɛ Nutsɔ Yesu Kristo biɛ mi, nɛ ma piɛ nyɛ he ngɛ mumi mi; 5 nɛ nyɛɛ fie zotsɛ ɔ kɛ je asafo ɔ mi, nɛ nyɛɛ ngɔ lɛ ngɔ wo Abosiami dɛ nɛ e kpata e he lo ɔ hɛ mi konɛ a he e klaa yi wami ngɛ wa Nutsɔ Yesu bami ligbi ɔ nɔ.

6 E ji gbeye sane kaa nyɛ ngɛ fiae kaa nyɛ he tsɔ be mi nɛ kikɛmɛ a yayami nɛ ɔ ngɛ nɔ yae ngɛ nyɛ kpɛti. Anɛ nyɛ li kaa ke nyɛ ti nɔ kake ngɛ yayami pee ɔ, e yayami ɔ ma sa nyɛ tsuo kulaa lo? 7 Lɔ ɔ he je ɔ, nyɛ je yayami peelɔ ɔ we konɛ nyɛɛ hi si ngɛ he tsɔmi mi, ejakaa a gbe Kristo nɛ ji Mawu Tobi ɔ ngɛ wa he. 8 Lɔ ɔ he je ɔ, nyɛ ha waa ye lɛ nɛ waa wa ngɛ Kristo jami mi, nɛ wa kpa yayami peemi. Nyɛ ha nɛ waa ye anunyami kɛ anɔkuale abolo nɛ he tsɔ ɔ.

9 I de nyɛ ngɛ womi nɛ i ngma nyɛ kekle ɔ mi ɔ ke nyɛɛ kɛ yayami peeli nɛ ko bɔ. 10 Se tsa pi ajuama bɔli nɛ he we wa Manye Munyu ɔ yi loo hɛ tsuli kɛ juli kɛ wɔ jali a he munyu nɛ i ngɛ nyɛ tue, ejakaa ja nyɛ si je ɔ mi loko ji nyɛɛ kɛ mɛ be bɔe. 11 Nɔ́ nɛ i ngɛ tsɔɔe ji kaa nyɛɛ kɛ nɔ ko nɛ ji nyɛmi ngɛ Kristo mi se e pee e he ajuama bɔlɔ loo hɛ tsulɔ loo ojo fialɔ loo amimi yelɔ loo wɔ jalɔ loo da delɔ loo nɔ jelɔ nɛ ko bɔ, nɛ nyɛɛ kɛ jamɛatsɛ ɔ nɛ ko ye ni tete po.

Wa he kojomi

12 Wa be he blɔ nɛ wa kojoɔ ni nɛmɛ nɛ be wa kpɛti ɔ. Se wa ngɛ he blɔ nɛ wa kojoɔ asafo ɔ mi bimɛ nɛ ngɛ yayami pee ɔ nɛ waa kɛ mɛ yeɔ saminya. 13 Mawu pɛ ji nɔ́ nɛ kojoɔ ni nɛmɛ nɛ be wa kpɛti ɔ. Nyɛ nitsɛmɛ nyɛɛ kojo nyumu ɔ nɛ nyɛ je lɛ kɛ je asafo ɔ mi.