1 "Ngmaa kɛ ya ha Sarde asafo ɔ bɔfo ɔ ke:

Sɛ nɛ je nɔ nɛ hɛɛ Mawu mumihi kpaago kɛ dodoehi kpaago ɔ ngɔ ji enɛ ɔ nɛ:

I le mo kaa asafo nɛ hɛɛ biɛ gu, o ni tsumi ɔmɛ hí, nɛ o gbo ngɛ mumi mi. 2 Lɔ ɔ he je ɔ, o hɛ nɛ tsiɛ nɛ o wo o hemi kɛ yemi ɔ mi la, ejakaa bɔɔ ɔ nɛ piɛ ɔ hu miɔ nɛ e ma gbo. Nɛ i nɛ o ni tsumi ɔmɛ kaa a da ngɛ Mawu hɛ mi. 3 Mo kai nɔ́ nɛ a tsɔɔ mo nɛ o he ye kekle ɔ. Mo tsake o tsui nɛ o pɛtɛ he wawɛɛ. Ke o tsakee we ɔ, i ma ba o ngɔ tlukaa kaa julɔ, nɛ i ma ba gbla o tue; se o be lee ngmlɛfia nɔ nɛ i ma ba kulaa.

4 Se kɛ ɔ, ni komɛ ngɛ Sarde nɛ wui a tade ɔmɛ mu kɛ je ɔ mi ni yayamihi. Nimli nɛ ɔmɛ a kɛ mi maa nyɛɛ ngɛ tade hiɔhi a mi, ejakaa a sa ja. 5 Nɔ tsuaa nɔ nɛ maa ye kunimi ɔ, a maa wo lɛ tade hiɔ, nɛ i be e biɛ gbee ngɛ Wami Womi ɔ mi gblee, nɛ ma wo e biɛ ta ngɛ ye Tsɛ kɛ e bɔfo ɔmɛ a he mi.

6 Nɔ nɛ ngɛ tue ɔ, e nu nɔ́ nɛ mumi ɔ ngɛ asafo ɔmɛ dee ɔ.

7 Moo ngma womi nɛ ɔ kɛ ya ha Filadelfia asafo ɔ bɔfo ɔ nɛ o de lɛ ke,

Enɛ ɔ ji sɛ nɛ je nɔ klɔuklɔu ɔ kɛ anɔkualetsɛ ɔ ngɔ. Nɔ nɛ hɛɛ David safie ɔ. E ngaa nɛ nɔ ko nyɛ we blimi, nɛ e bliɔ nɛ nɔ ko nyɛ we ngami.

8 I le mo saminya, nɛ i le kaa o gbɔjɔ mohu se o kua we mi. Lɔ ɔ he je ɔ, i bli sinya kɛ ha mo, nɛ nɔ ko be nyɛe ma nga.

9 Moo bu tue! Jamɛ a Abosiami jali ɔmɛ nɛ deɔ ke Yuda bi ji mɛ, se lakpa nɛ a ngɛ yee ɔ, i ma ha nɛ a ba kpla si ngɛ o nane nya konɛ a le kaa i suɔ mo.

10 Akɛnɛ o to o tsui si nɛ o ye ye mlaa a nɔ ngɛ amanehlu mi tete he je ɔ, i ma baa o yi ngɛ nɔ́ nami nɛ maa ba je ɔ nɔ, nɛ a ma kɛ ka nihi tsuo ngɛ zugba a nɔ ɔ mi. 11 Hyɛ, i ma nɔuu! Lɔ ɔ he je ɔ, moo pɛtɛ o hemi kɛ yemi ɔ mi nɛ wa, konɛ nɔ ko nɛ ko kpɔ o jlasi ɔ ngɛ o dɛ.

12 Nɛ nɔ nɛ maa ye kunimi ɔ, i ma ha e pi si ngɛ Mawu we ɔ, nɛ e be lejɛ ɔ jee gbleegbleegblee. I ma ngma ye Mawu ɔ kɛ Yerusalem he ɔ biɛ, kɛ ami nitsɛ ye biɛ ngɛ e he, nɛ e ma plɛ Yerusalem he nɛ maa je hiɔwe kɛ ba a mi bi.

13 Nɔ nɛ ngɛ tue ɔ, e nu nɔ́ nɛ Mumi ɔ ngɛ asafo ɔmɛ dee ɔ.

14 Moo ngma kɛ ya ha Laodikea asafo ɔ bɔfo ɔ ke,

Enɛ ɔ ji sɛ nɛ je Amen, anɔkuale odase yelɔ kɛ Mawu adebɔ sisi jelɔ ɔ ngɔ:

15 I le bɔ nɛ o ngɛ ha. O be yluduu nɛ o be kɛlakɛla hulɔ. I na nɛ o ngɛ yluduu loo kɛlakɛla. 16 Se akɛnɛ o ngɛ kulɔkulɔ, nɛ o be yluduu loo kɛlakɛla he je ɔ, ma la mo ngɛ ye nya mi ngɔ pue he.

17 O deɔ ke, ‘Niatsɛ ji mi nɛ i ngɛ nɔ́ tsuaa nɔ, nɛ nɔ́ ko nɔ ko he hia we mi.’ Se o li kaa o ngɛ dengme mi, nɛ o ni ngɛ mɔbɔ hulɔ. Ejakaa ohiafo kɛ nɔmlɔ nɛ hɛɛ e he gu kɛ hɛ yuyuilɔ ji mo ngɛ mumi mi.

18 Lɔ ɔ he je ɔ, i ngɛ mo ga woe kaa o he sika tsu kpakpa nɛ a kɛ la tsu he kɛ je ye ngɔ; nɛ ja lɔ ɔ loko ji o maa pee niatsɛ anɔkuale mi. Nɛ jehanɛ ɔ hu o he tade hiɔhi kɛ je ye dɛ, tadehi nɛ a he tsɔ, bɔ nɛ pee nɛ o ko hɛɛ o he gu nɛ zo nɛ pee mo. Nɛ o na tsopa hu kɛ je ye dɛ nɛ o kɛ tsa o hɛ ngmɛ ɔ bɔ nɛ pee nɛ o hyɛ nɔ́ ekohu. 19 I pɔɔ nɔ fɛɛ nɔ nɛ i suɔ lɛ ɔ tue gblami. Lɔ ɔ he je ɔ, i ma gbla o tue, ja o tsake o subai nɛ o na Mawu níhi a he bua jɔmi.

20 Hyɛ, i daa si ngɛ sinya a nya, nɛ i ngɛ sie be fɛɛ be. Ke nɔ ko nu he kaa i ngɛ lɛ tsɛe nɛ e bli sinya a, i ma ba e ngɔ nɛ i kɛ lɛ maa ye ni, nɛ lɛ hu e kɛ mi maa ye. 21 I ma ha nɔ fɛɛ nɔ nɛ maa ye kunimi ɔ maa hi ye kasa nya ngɛ ye matsɛ sɛ ɔ nɔ, kaa hɔ nɛ i hi ye Tsɛ kasa nya ngɛ e matsɛ sɛ ɔ nɔ benɛ i ye kunimi ɔ. 22 Nɔ nɛ ngɛ tue ɔ, e nu nɔ́ nɛ Mumi ɔ ngɛ asafo ɔmɛ dee ɔ."