Apocalipse 5

Tobi ɔ kɛ womi kpo ɔ

1 Nɛ i na womi kpo ko ngɛ nɔ nɛ hii si ngɛ matsɛ sɛ ɔ nɔ ɔ hiɔ nine mi. A ngma ni ngɛ womi ɔ mi kɛ e se tsuo, nɛ a sɔu e nya kɛ nya sɔumi níhi kpaago. 2 Nɛ i na Mawu bɔfo ngua ko nɛ ngɛ ngmlaa kpae ke, "Mɛnɔ ji nɔ nɛ e sa kaa e tsɔ womi nɛ ɔ nya sɔumi ni ɔmɛ, nɛ e bli mi?" 3 Se nɔ ko nɔ ko be Hiɔwe loo zugba a nɔ loo ni gbogboe ɔmɛ a kpɛti nɛ ma nyɛ bli womi ɔ nya nɛ e maa hyɛ mi.

4 Nɛ i fo ya saminya, ejakaa a nɛ nɔ ko nɛ e sa nɛ e ma bli womi ɔ nya nɛ e hyɛ mi. 5 Kɛkɛ nɛ nikɔtɔma amɛ a ti nɔ kake de mi ke, "Ko fo ya! Hyɛ, Jata a nɛ je Yuda wɛtso ɔ mi ɔ, nɔ nɛ ji David bibimibibi ɔ ye kunimi. Lɛ ji nɔ nɛ ma nyɛ tsɔ womi ɔ nya sɔumi ni kpaago ɔmɛ nɛ e bli nya."

6 Nɛ i na Tobi ko kaa nɔ nɛ a gbe lɛ. E daa si ngɛ matsɛ sɛ ɔ kɛ hɛ kali ɔmɛ a kpɛti. Nɛ nikɔtɔmahi nyingmi enyɔ kɛ eywiɛ ɔ bɔle lɛ kɛ kpe. Tobi ɔ ngɛ koli kpaago kɛ hɛ ngmɛ kpaago nɛ tsɔɔ Mawu Mumi kpaago ɔmɛ nɛ a tsɔ kɛ mane je ɔ tsuo ɔ. 7 E ba, nɛ e ba ngɔ womi kpo ɔ ngɛ nɔ nɛ hii si ngɛ matsɛ sɛ ɔ nɔ ɔ hiɔ nine mi. 8 Benɛ e ngɛ womi ɔ hee ɔ, hɛ kali eywiɛ ɔmɛ kɛ nikɔtɔmahi nyingmi enyɔ kɛ eywiɛ ɔ kpla si ngɛ e hɛ mi. A ti nɔ tsuaa nɔ hɛɛ kpa saku kɛ sika tsu tɔhi nɛ a hyi tɔtɔɔtɔ kɛ la su ku womi tsopa. Enɛ ɔmɛ ji he tsɔli ɔmɛ a sɔlemi ɔmɛ.

9 Nɛ a ngɛ la he ko lae ke, "Mo nɛ e sa kaa o he womi kpo ɔ, nɛ o tsɔ e nya sɔumi ni ɔmɛ nɛ o bli nya, ejakaa a gbe mo. Nɛ o kɛ o muɔ ɔ kpɔ nɔ fɛɛ nɔ kɛ ha Mawu, kɛ je wɛtso fɛɛ wɛtso kɛ ma tsuaa ma mi. 10 Nɛ o to matsɛ yemi kɛ osɔfo yemi kɛ ha mɛ nɛ a sɔmɔ wa Mawu ɔ nɛ a ye matsɛ ngɛ zugba a nɔ."

11 Nɛ i na bɔfohi akpeakpe abɔ ngɛ ye ni nami ɔ mi. A bɔle matsɛ sɛ ɔ kɛ hɛ kali ɔmɛ kɛ nikɔtɔma amɛ. A ngɛ lae wawɛɛ ke, 12 "Tobi ɔ nɛ a gbe ɔ, e sa nɛ a ngɔ he wami kɛ ni nami kɛ nile kɛ nyɛmi kɛ agbo jemi kɛ anunyami kɛ gbaami kɛ ha lɛ."

13 Nɛ i nu nibɔ ni ɔmɛ kulaa nɛ ngɛ hiɔwe kɛ zugba a nɔ kɛ zugba a sisi kɛ wo mi ɔ a he nɛ a ngɛ ngmlaa kpae ke, "Nɔ nɛ hii si ngɛ matsɛ sɛ ɔ nɔ kɛ Tobi ɔ nɔ́ ji gbaami kɛ agbo jemi kɛ anunyami kɛ he wami kɛ je neneene kɛ ya neneene." 14 Nɛ he kali eywiɛ ɔmɛ ke, "Amen!" Nɛ nikɔtɔmahi nyingmi enyɔ kɛ eywiɛ ɔmɛ kpla si nɛ a ja lɛ.