1 Kɛkɛ nɛ Yesu je lejɛ ɔ kɛ ho Yudea ni ɔmɛ a mi ya nɛ e tsa nɔ kɛ ya su Yordan Pa a se. Ni ɔmɛ pa bu ba na lɛ nɛ e tsɔɔ mɛ ni kaa bɔ nɛ e pɔɔ peemi ɔ.

2 Nɛ Farisi bi komɛ ba nɛ a ba ta e nya mi. A bi lɛ ke, "Anɛ nyumu ngɛ he blɔ nɛ e fieɔ e yo lo?"

3 Yesu hu bi mɛ ke, "Mɛni mlaa Mose wo nyɛ ngɛ gba puɛmi he?"

4 A ha lɛ heto nɛ a de ke, "Mose mlaa a ha he blɔ kaa nyumu ma nyɛ fie e yo faa. Nɔ pɛ nɛ nyumu ɔ maa pee ji kaa e ma ha yo ɔ fiemi womi."

5 Yesu bi mɛ ke, "Mɛni he je nɛ e de ja? I ngɛ nyɛ dee ke nyɛ tue mi nɛ ti tsɔ ɔ he je nɛ Mose wo nyɛ mlaa kaa kikɛ ɔ ngɛ ɔ nɛ. 6 Nyɛ nɛ, kɛ je adebɔ sisi jemi ɔ, Mawu bɔ nyumu kɛ yo. 7 Enɛ ɔ he je ɔ, nyumu ma si e tsɛ kɛ e nyɛ nɛ e maa pɛtɛ e yo he . 8 Nɛ mɛ ni enyɔ ɔmɛ a maa pee he lo kake, a pi ni enyɔ hu. 9 Lɔ ɔ he je ɔ, nɔ ko nɛ ko gba nɔ nɛ Mawu wo ngɔ tsa a mi."

10 Pee se benɛ e piɛ mɛ sɔuu ɔ, e kaseli ɔmɛ bi lɛ gba sane ɔ he munyu ekohu.

11 Nɛ e de mɛ ke, "Nɔ tsuaa nɔ nɛ e fieɔ e yo nɛ e ya ngɔɔ yo kpa a, e puɛ gba ngɛ kekle yo ɔ blɔ fa mi. 12 Nɛ ja a kɛ ke yo kua e huno nɛ e ya gba nyumu kpa a, e puɛ gba."

13 Ligbi ko ɔ, benɛ binyɛ komɛ wo a bimɛ kɛ ma Yesu ngɔ nɛ e jɔɔ mɛ ɔ, e kaseli ɔmɛ wo fɔli ɔmɛ a hɛ mi la nɛ a fie mɛ.

14 Se benɛ Yesu na a, e mi mi fu e kaseli ɔmɛ nɛ e de mɛ ke, "Nyɛ ha nɛ jokuɛwi ɔmɛ nɛ a ba ye ngɔ; nyɛ ko tsi mɛ blɔ, ejakaa mɛ mohu a nɔ ji Mawu Matsɛyemi ɔ nɛ. 15 I ngɛ nyɛ dee anɔkuale mi kaa nɔ tsuaa nɔ nɛ he we Mawu Matsɛyemi ɔ kaa jokuɛwi nɛ ɔmɛ ɔ, e be Matsɛyemi ɔ mi sɛe ligbi ko."

16 Kɛkɛ nɛ e wo jokuɛwi ɔmɛ kakaaka nɛ e wo e nine ngɔ pue a yi kpɛti nɛ e gbaa mɛ.

17 Nɛ benɛ e maa ho blɔ hiami ya a, nyumu ko wo fo kɛ ba na lɛ nɛ e ba kpla si ngɛ e nane nya nɛ e bi lɛ ke, "Tsɔɔlɔ kpakpa, kɛ ma pee kɛɛ nɛ ma na neneene wami?"

18 Yesu bi lɛ ke, "Mɛni he je nɛ o ngɛ mi tsɛe ke Nɔmlɔ kpakpa? Nɔ ko be nɛ hine nɔmlɔ kpakpa, ja Mawu pɛ. 19 Tsɛ o le mlaa amɛ: Koo gbe nɔmlɔ, ko puɛ gba, koo ju, koo ye lakpa odase, koo sisi nɔ ko, moo bu o tsɛ kɛ o nyɛ."

20 Nyumu ɔ ha Yesu heto nɛ e de ke, "I tɔ we kita nɛ ɔmɛ a ti kake po nɔ hyɛ."

21 Yesu hyɛ nɔmlɔ ɔ too nɛ e na e he suɔmi. Kɛkɛ nɛ e de lɛ ke, "Nɔ́ kake piɛ nɛ o pee we lolo. Mo ya jua o nihi tsuo nɛ o ngɛ ɔ nɛ o dla sika nɛ o ma na a kɛ ha ohiafohi nɛ o ma na ni ngɛ hiɔwe; konɛ o ba nɛ o ba nyɛɛ ye se."

22 Nɛ nyumu ɔ nu munyu nɛ ɔ, e pee vii; nɛ e je lejɛ ɔ mɔbɔmɔbɔ, ejakaa e ngɛ níhi fuu.

23 Yesu hyɛ e kuɛ se mi nɛ e yaa, nɛ e plɛ nɛ e de e kaseli ɔmɛ ke, "Nyɛɛ hyɛ bɔ nɛ e he wa ha niatsɛmɛ ha kaa a maa sɛ Mawu Matsɛyemi ɔ mi!"

24 Yesu munyu ɔ pee e kaseli ɔmɛ a hɛ mi yaa. Se e ya nɔ nɛ e de mɛ ke, "Bimɛ, Mawu Matsɛyemi ɔ mi sɛmi ngɛ yee saminya ha nihi nɛ wo a hɛ ngɔ fɔ je nɛ ɔ mi ni nami nɔ. 25 E he wɛ ha afukpɔngɔ kaa e maa gu abui puɔ mi kaa bɔ nɛ e he wa ha niatsɛ kaa e maa sɛ Mawu Matsɛyemi ɔ mi."

26 Sekpɛ munyu nɛ ɔ ha nɛ e kaseli ɔmɛ a nya mi jɔ. Nɛ a bɔni a he bimi ke, "Lɛɛ mɛnɔ kulaa yi wami nɛ a ma he mɔ?"

27 Yesu hyɛ mɛ too nɛ e de mɛ ke, "Nɔmlɔ be enɛ ɔ nyɛe maa pee, se Mawu lɛɛ nɔ́ ko be nɛ he wa ha lɛ. E nyɛɔ nɔ tsuaa nɔ peeɔ."

28 Kɛkɛ nɛ Petro de lɛ ke, "Wa ngmɛɛ wa nɔ tsuaa nɔ he nɛ wa ba nyɛɛ o se."

29 Nɛ Yesu de lɛ ke, "I ngɛ nyɛ dee anɔkuale mi ke, nɔ ko be nɛ e si e we loo e nyɛmimɛ yihi loo nyɛmimɛ nyumuhi, loo tsɛ loo nyɛ loo bimɛ loo ngmɔ ngɛ ami kɛ Manye Munyu ɔ he nɛ a be lɛ nane mi toe ngwɔ he abɔ. 30 E ma na nɔ́ nɛ ɔmɛ ngwɔ he lafa ngɛ je nɛ ɔ mi, wehi kɛ nyɛmimɛ nyumuhi kɛ yihi, fɔli kɛ bimɛ kɛ zugba, nɔ nami kɛ dengme hulɔ, kɛ neneene wami ngɛ hwɔɔ se je nɛ maa ba a mi. 31 Se mohu nihi nɛ mwɔnɛ ɔ mɛ ji kekleekle bimɛ ɔ, a ma plɛ sekpɛ bimɛ hwɔɔ se, nɛ nihi nɛ ji sekpɛ bimɛ mwɔnɛ ɔ, a ma ba pee hlami sɛli."

32 Jehanɛ ɔ benɛ a pue nɔ kɛ yaa Yerusalem nɛ Yesu ngɛ hlami saii ha mɛ ɔ, kaseli ɔmɛ bɔni gbeye yemi. Kɛkɛ nɛ Yesu tsɛ mɛ nɛ e bɔni mɛ níhi nɛ maa ba e nɔ ngɛ Yerusalem ɔ demi.

33 E de mɛ ke, "Ke wa ya su Yerusalem ɔ, a maa tsɔɔ Nɔmlɔ Bi ɔ se blɔ nɛ a maa ngɔ lɛ kɛ wo osɔfo nikɔtɔma amɛ kɛ mlaa tsɔɔli ɔmɛ a dɛ. A maa bu lɛ gbenɔ fɔ nɛ a ma je e he gbi kɛ ha je mi bi ɔmɛ nɛ a gbe lɛ. 34 A maa ye e he fɛu nɛ a maa la lada kɛ pue e nɔ. A maa fiaa lɛ kpa nɛ a ma pue e hɛ mi si bɔ nɛ sɛ; nɛ nyagbe ɔ, a maa gbe lɛ. Se e nɔ ligbi nɛ ji etɛ ɔ se ɔ, e maa te si kɛ je gbeje."

35 Kɛkɛ nɛ Yakobo kɛ Yohane nɛ ji Zebedeo bi ɔmɛ ba Yesu ngɔ nɛ a ba de lɛ ke, "Nutsɔ, wa ma bi mo nɔ ko nɛ o pee ha wɔ."

36 Yesu bi mɛ ke, "Mɛni i lo?"

37 A de lɛ ke, "Wa suɔ nɛ hwɔɔ se ɔ o ha nɛ wa ti nɔ kake nɛ hi o hiɔ nɔ nɛ nɔ kake hu nɛ hi o muɔ nɔ ngɛ o Matsɛyemi ɔ mi."

38 Se Yesu de mɛ ke, "Nyɛ li nɔ nɛ nyɛ ngɛ bie ɔ. Anɛ nyɛ ma nyɛ nɔ́ nami kplu nɛ i yaa nu ɔ maa nu lo? Aloo nyɛ ma nyɛ nɔ́ nami baptisimi nɛ a maa baptisi mi ɔ nya maa da lo?"

39 A ha lɛ heto nɛ a de ke, "Ee, wa ma nyɛ!" Yesu ha mɛ heto ke, "Nyɛ ma nyɛ maa nu ye kplu ɔ nya nyu, nɛ nyɛ ma nyɛ maa da ye baptisimi ɔ hu nya. 40 Se mohu ɔ, kaa nɔ ko maa hi ye hiɔ nɔ aloo e maa hi ye muɔ nɔ ɔ lɛɛ tsa pi ami nɛ i haa jamɛ a he blɔ ɔ, Mawu nɛ e ngɔ haa nihi nɛ e dla kɛ to ha mɛ ɔ."

41 Benɛ kaseli kpa amɛ nɛ piɛ ɔ na le nɔ́ nɛ ni enyɔ ɔmɛ ya ngɛ bie ɔ, a na a he abofu saminya. 42 Se Yesu tsɛ e kaseli ɔmɛ tsuo nɛ e de mɛ ke, "Nyɛ le kaa ngɛ je mi bi ɔmɛ a kpɛti ɔ, matsɛ ɔmɛ kɛ ni ngua amɛ yeɔ a sisi bi ɔmɛ a nɔ kaa nyɔguɛhi. 43 Se e be ja ngɛ nyɛɛ nyɛ kpɛti. Nyɛ ti nɔ nɛ ngɛ hlae kaa e maa ye tsɛ aloo e maa pee nyɛ kpɛti nɔkɔtɔma a, e pee e he sɔmɔlɔ kɛ ha nyɛ tsuo. 44 Nɛ nɔ nɛ ngɛ hlae nɛ a tsɛ lɛ ngua pe kulaa a, e pee e he nɔ fɛɛ nɔ sɔmɔlɔ. 45 Ejakaa Nɔmlɔ Bi ɔ tete ɔ, e bɛ nɛ a sɔmɔ lɛ. Se mohu e ba nɛ e ba sɔmɔ nɛ e ngɔ e wami kɛ fɔ si ngɛ nihi fuu a yi wami hemi he."

46 A tsa nɔ kɛ ya su Yeriko ma a mi. Nɛ pee se benɛ e kɛ e kaseli ɔmɛ ngɛ kpo jee ngɛ ma a mi ɔ, nihi fuu fie e se. Nɛ ni balɔ ko nɛ a tsɛɛ lɛ Bartimeo, nɛ ji Timeo bi ɔ nɛ e hɛ ngmɛ yu ɔ hii si ngɛ blɔ ɔ he ngɛ ni bae.

47 Benɛ Bartimeo na le kaa Yesu nɛ je Nazaret ɔ nɛ bee ɔ, e bɔni ngmlaa kpami ngɛ dee ke, "Yesu, David Bi, moo na mi mɔbɔ!"

48 Se ni komɛ nɛ ngɛ lejɛ ɔ ke e yi ke e pee kɔ. Se si abɔ nɛ a ngɛ e yi kee ke e pee kɔ ɔ, si abɔ nɛ e ngɛ ngmlaa kpae ngɛ dee ke, "David Bi, moo na mi mɔbɔ!" ji lɔ ɔ nɛ.

49 Kɛkɛ nɛ Yesu ho da si nɛ e de ke, "Nyɛ tsɛ lɛ ha mi!" Nɛ a tsɛ hɛ ngmɛ yuyuilɔ ɔ nɛ a de lɛ ke, "O he ngɛ ni. Moo te si nɛ o ba, e ngɛ mo tsɛe!" 50 Nɛ Bartimeo je e yi nɔ tade ɔ nɛ e sake lɛ kɛ fɔ he nɛ e te si tsa, nɛ e tataa si kɛ ya na Yesu.

51 Nɛ Yesu bi lɛ ke, "Mɛni o ngɛ hlae nɛ ma pee ha mo?" E ha lɛ heto ke, "Tsɔɔlɔ, mo ha nɛ ma hyɛ nɔ!"

52 Yesu de lɛ ke, "Moo ho, o hemi kɛ yemi tsa mo!" Yesu nya mɛ si nɛ nyumu ɔ bɔni nɔ́ hyɛmi; nɛ e fiɛ Yesu sɛ ke ho.