1 Se jehanɛ ɔ e piɛ ligbi enyɔ pɛ nɛ a maa ye Hebemi kɛ Akpiti Ligbi ɔ. Nɛ osɔfo nikɔtɔma amɛ kɛ mlaa tsɔɔli ɔmɛ bɔni Yesu he ga hlami bɔ nɛ a maa pee nɛ a nu lɛ nɛ a gbe lɛ ngɛ laami mi.

2 Se a de a he ke, "E be hiɛ peemi ngɛ nyami be nɛ ɔ mi, bɔ nɛ pee nɛ basabasa nɛ ko ba te si."

3 Benɛ Yesu ngɛ Betania ngɛ Simon nɔ nɛ ngɛ hiɔ tsu nue we ɔ mi nɛ e ngɛ ni yee ɔ, yo ko ba je kpo ngɛ lejɛ ɔ kɛ e dɛ mi nu je via tɔ kake nɛ he jua wa saminya. Yo ɔ hia nu ɔ nya nɛ e plɛ kulaa ngɔ pue Yesu yi kpɛti.

4 Se nihi nɛ ngɛ lejɛ ɔ a ti ni komɛ na yo ɔ he abofu, ejakaa e pee mɛ kaa e da nu ɔ, nɛ a bɔni e he munyu tumi. E je a ti ni komɛ a nya nɛ a de ke, "Mɛni nɔ dami ji enɛ ɔ? 5 A ko nyɛ jua nu nɛ ɔ sika fuu nɛ a ma kɛ ya ke ohiafohi."

6 Se Yesu de mɛ ke, "Nyɛ ko hao yo ɔ. E tsu ni kpakpa kaa kikɛ ɔ ha mi nɛ nyɛ ngɛ e he mi kae? 7 Ohiafo ɔmɛ kɛ nyɛ ngɛ daa nɛ nyɛ ma nyɛ ye kɛ bua mɛ be tsuaa be nɛ nyɛ suɔ. Se ami lɛɛ i kɛ nyɛ be si hiɛ daa.

8 E pee nɔ nɛ e ma nyɛ; e pɔ ye nɔmlɔ tso ɔ nu ngɔ fɔ si kɛ ha ye pumi. 9 Nɛ i ngɛ nyɛ dee anɔkuale mi kaa he tsuaa he nɛ a maa fiɛ Manye Munyu ɔ ngɛ ngɛ je ɔ mi ɔ, a maa tsi nɔ́ nɛ e pee nɛ ɔ nɔ ta ngɔ tsɔɔ kɛ kai lɛ."

10 Kɛkɛ nɛ e kaseli nyɔngma kɛ enyɔ ɔmɛ a ti nɔ kake nɛ a tsɛɛ le ke Yuda Iskariot ɔ ho nɛ e ya na osɔfo nikɔtɔma amɛ bɔ nɛ pee nɛ e tsɔɔ mɛ Yesu se blɔ.

11 Benɛ a nu amaniɛ nɛ Yuda hɛɛ ɔ, e ngɔ a nya saminya nɛ a wo lɛ si kaa a ma ha lɛ sika. Nɛ lɔ ɔ he je ɔ, lɛ hu e bɔni ga tomi bɔ nɛ e maa pee nɛ e nine maa su Yesu nɔ kɛ ha mɛ.

12 Akpiti Ligbi ɔmɛ a mi kekle ligbi ɔ nɔ ɔ, benɛ a ngɛ Hebemi to bi ɔmɛ gbee ɔ, Yesu kaseli ɔmɛ bi lɛ ke, "Jije o maa suɔ nɛ wa ya dla kɛ to mo nɛ o ya ye Hebemi Ligbi ɔ ngɛ?" 13 Nɛ Yesu tsɔ e kaseli ɔmɛ a ti ni enyɔ nɛ e de mɛ ke, "Nyɛɛ ya Yerusalem ma a mi, nɛ ke nyɛ yaa a, nyɛɛ kɛ nyumu ko nɛ tloo nyu kɛ buɛ maa kpe. Nyɛɛ nyɛɛ e se. 14 We mi he nɛ e ma ya sɛ ɔ, nyɛɛ ya nɛ nyɛ ya de wetsɛ ɔ ke, ‘Wa Nutsɔ ɔ ke waa ba nɛ o tsɔɔ wɔ tsu mi he nɛ o dla kɛ to wɔ nɛ wa ma ba ye Hebemi ni ɔ ngɛ gbɔkuɛ nɛ ɔ.’ 15 Kɛkɛ ɔ, e maa tsɔɔ nyɛ asa ngua ko nɛ a dla kɛ fɔ si ngɛ hiɔwe tsu ɔ nɔ. Nyɛ ya to níhi a he blɔ nya ngɛ lejɛ ɔ kɛ ha wa ni yemi ɔ."

16 Nɛ kaseli ɔmɛ pue blɔ kɛ ho ma a mi ya nɛ a ya na nɔ tsuaa nɔ kaa bɔ nɛ Yesu de mɛ ɔ, nɛ a ya pee Hebemi niye ni ɔ ngɛ lejɛ ɔ.

17 Gbɔkuɛ mi ɔ, Yesu kɛ e kaseli nyɔngma kɛ enyɔ ɔmɛ kulaa ho we ɔ mi ya. 18 Benɛ a pue si nɛ a ngɛ ni ɔ yee ɔ, Yesu de mɛ ke, "I ngɛ nyɛ dee anɔkuale mi ke, nyɛ ti nɔ kake nɛ e kɛ mi ngɛ ni yee amlɔ nɛ ɔ maa tsɔɔ ye se blɔ."

19 Munyu nɛ ɔ hao e kaseli ɔmɛ saminya nɛ a bɔni lɛ bimi kakaaka ke, "Ami i lo? Ami i lo?"

20 Yesu ha mɛ heto nɛ e de ke, "Nyɛ kaseli nyɔngma kɛ enyɔ ɔmɛ nyɛ ti nɔ kake i, nɔ nɛ e nine kɛ ye nine ngɛ kpee ngɛ kaa mi amlɔ nɛ ɔ i. 21 Anɔkuale ji kaa Nɔmlɔ Bi ɔ ma gbo kaa bɔ nɛ gbali ɔmɛ de ɔ, se due ha nɔ nɛ maa tsɔɔ e se blɔ ɔ. E ko hi kaa a fɔ we lɛ mohu!"

22 Nɛ benɛ a ngɛ ni ɔ yee ɔ, e wo abolo ɔ eko, nɛ e jɔɔ nɔ. E poo mi nɛ e ngɔ kɛ ha e kaseli ɔmɛ nɛ e de mɛ ke, "Nyɛ he nɛ nyɛɛ ye, ye Nɔmlɔ tso ji enɛ ɔ nɛ."

23 Lɔ ɔ se ɔ, e wo kplu kɛ e mi wai ɔ, nɛ benɛ e jɔɔ nɔ se ɔ, e wo ngɔ ha mɛ nɛ mɛ kulaa a nu eko. 24 Nɛ e de mɛ ke, "Enɛ ɔ ji ye muɔ nɛ ji Somi He ɔ nɛ ngɛ Mawu kɛ adesa kpɛti ɔ, nɛ a ngɔ pue si kɛ ha nihi fuu. 25 Nɛ i ngɛ nyɛ dee anɔkuale mi kaa i pa be wai nɛ ɔ eko nue hu kɛ ya si be nɛ i ma nu ekpa mimi ngɛ Mawu Matsɛyemi ɔ mi."

26 Enɛ ɔ se benɛ a la yi jemi la kɛ wo Mawu hɛ mi nyami ɔ, a je kpo kɛ ho Nuyoku ɔ nɔ ya.

27 Nɛ Yesu de mɛ ke, "Mwɔnɛ ɔ, nyɛ tsuo nyɛ ma kua mi. Ejakaa a ngma nɛ a de ke, ‘I ma fia to kpakalɔ ɔ nɔ́ kɛ fɔ si nɛ to ɔmɛ maa gbɛ kɛ fia.’ 28 Nɛ benɛ a tle mi si kɛ ba wami mi ekohu se ɔ, i ma sɛ nyɛ hlami nɛ i kɛ nyɛ ma ya kpe ngɛ Galilea."

29 Se Petro de lɛ ke, "Ke nɔ tsuaa nɔ kua mo ɔ, ami Petro lɛɛ i be mo kuae gblee!"

30 Yesu de lɛ ke, "I ngɛ mo dee anɔkuale mi ke, nyɔ nɛ ɔ mi tutuutu ɔ, kungwɔ be nae ma kpa nɔ́ nɛ ji si enyɔne nɛ o ma ka kita si etɛ kɛ kua mi ke o li mi kulaa."

31 Se Petro ka pe kekle ɔ po nɛ e de ke, "Ke e maa ba mi kaa i kɛ mo wa gbo tete po ɔ, i be kpalee ngɛ ose!" Nɛ e kaseli ɔmɛ nɛ piɛ ɔ hu de ja a kɛ.

32 Benɛ a ya su he ko nɛ a tsɛɛ ke Getsemane ɔ, e de e kaseli ɔmɛ ke, "Nyɛɛ hi si ngɛ hiɛ ɔ nɛ ma ya sɔle nɛ ma ba."

33 Nɛ e tsɛ Petro kɛ Yakobo kɛ Yohane ngɔ piɛ e he; kɛkɛ nɛ e bɔni haomi ngɛ e mi saminya. 34 Nɛ e de ni etɛ ɔmɛ ke, "Ye susuma ngɛ haoe ngɛ ye mi kɛ yaa su gbenɔ mi tete. Nyɛɛ hi si ngɛ hiɛ ɔ nɛ nyɛɛ kɛ mi nɛ fɔ nyɔ."

35 E si mɛ nɛ e nyɛɛ kɛ ya e hɛ mi bɔɔ nɛ e ya ho hi si ngɛ zugba nɛ e sɔle nɛ e de ke, ke e maa hi ɔ ngmlɛfia yobu nɛ ma a nɛ e be ngɛ e yi.

36 Bɔ nɛ e kpa pɛɛ nɛ e de ji, "Tsaatsɛ, Tsaatsɛ , o nyɛɔ nɔ tsuaa nɔ o peeɔ, mo ha nɛ kplu nɛ ɔ nɛ be ngɛ ye yi. Se mohu tsa pi bɔ nɛ ami i suɔ se bɔ nɛ mo Tsaatsɛ o suɔ."

37 Se benɛ e kpale kɛ ba e kaseli etɛ ɔmɛ a ngɔ ɔ, e ba na kaa a hwɔ mahe. Nɛ e tsɛ Petro nɛ e bi lɛ ke, "Simon, lɛɛ nyɛ be nyɛe nɛ nyɛɛ kɛ mi maa fɔ nyɔ ngmlɛfia kake pɛ lo? 38 I ngɛ nyɛ dee ke, nyɛ tsuo nyɛɛ kɛ mi nɛ fɔ nyɔ ɔ nɛ nyɛɛ sɔle nɛ Nyatsɔlɔ ɔ nɛ ko ye nyɛ nɔ. Mumi ɔ ngɛ kplɛɛe mohu se he lo ɔ nɛ gbɔjɔ."

39 Enɛ ɔ se ɔ, e pa si mɛ nɛ e ho ya sɔle nɔ́ nɛ ji si enyɔ nɛ e de bɔ nɛ e de kekle ɔ nɔuu. 40 Nɛ e kpale kɛ ba a ngɔ ekohu nɛ e ba na mɛ nɛ a hwɔ mahe, ejakaa nyɔ gbe mɛ nɛ a hɛ ngmɛ jiɔ nɛ a li nɔ́ nɛ tete po nɛ a ma de.

41 E pa si mɛ nɔ́ nɛ ji si etɛ. Nɛ benɛ e kpale kɛ ba a, a hwɔ mahe pɔpɔɔpɔ. Yesu tsɛ mɛ nɛ e de mɛ ke, "Nyɛ ngɛ mahe ɔ hwɔe kɛ sa lo? Bɔ nɛ nyɛ hwɔ mahe ɔ e hiɛ. Ngmlɛfia a su. A tsɔɔ yayami peeli Nɔmlɔ Bi ɔ se blɔ. 42 Nyɛɛ te si nɛ waa ho. Ye se blɔ tsɔɔlɔ ɔ su hiɛ ɔ ta."

43 E nya nɔɛ si nɛ Yuda nɛ ji e kaseli nyɔngma kɛ enyɔ ɔmɛ a ti nɔ kake ɔ ba je kpo kɛ e se nihi nɛ osɔfo nikɔtɔma amɛ kɛ mlaa tsɔɔli ɔmɛ kɛ ma mi nikɔtɔma amɛ tsɔ kɛ piɛ e he kɛ a dɛ mi ta yami hahi kɛ tso kpotihi.

44 Yuda kɛ nihi nɛ piɛ e he ɔ tu ngɔ to ke, "Ke wa ya su ɔ, nɔmlɔ nɛ i ma ya fua atuu nɛ i ma nya e he ɔ, lɛ tutuutu i, nyɛɛ nu lɛ nɛ nyɛ wo lɛ kɛ ho." 45 Lɔ ɔ he je benɛ a ba su he nɛ Yesu kɛ e kaseli ɔmɛ nɛ piɛ ɔ ngɛ ɔ, Yuda ya de ke, "Tsɔɔlɔ!" Nɛ e fua lɛ atuu. 46 Kɛkɛ nɛ ni ɔmɛ nu Yesu. 47 Se e kaseli ɔmɛ a ti nɔ kake hia ha nɛ e po Osɔfo Nɔkɔtɔma a tsɔlɔ ɔ tue.

48 Nɛ Yesu bi ni ɔmɛ ke, "Anɛ ojo fialɔ ji mi nɛ nyɛ ba mi numi kɛ nyɛ dɛ mi klaatehi kɛ tso kpotihi nɛ ɔ? 49 Daa nɛ i kɛ nyɛ ngɛ Sɔlemi We ɔ nɛ i hii ni ɔmɛ nɔ́ tsɔɔe ɔ, mɛni he je nɛ nyɛ nui mi? Se a ngɛ enɛ ɔmɛ tsuo pee konɛ nɔ́ nɛ a ngma a nɛ e ba mi."

50 Kɛkɛ nɛ e kaseli ɔmɛ tsuo tu fo si lɛ. 51 Se niheyo ko nɛ kɛ klala kpiti muɔ e mlɛ mi ɔ fie Yesu se; nɛ benɛ ni ɔmɛ na lɛ ɔ, a ka kaa a maa nu lɛ. 52 Se e kpa e klala kpiti ɔ ngɔ ha mɛ nɛ e tu fo kɛ si mɛ.

53 Nɛ ni ɔmɛ kpaka Yesu kɛ ho Osɔfo Nɔkɔtɔma a we ɔ mi ya nɛ osɔfo ngua amɛ kɛ ma mi nikɔtɔma amɛ kɛ mlaa tsɔɔli ɔmɛ kulaa a bua ngɛ lejɛ ɔ. 54 Petro fie ni ɔmɛ a se ngɛ se lokoo kɛ ya sɛ Osɔfo Nɔkɔtɔma a we ɔ mi, se e tlɔ kpo ɔ nɔ nɛ e ya futu tsɔli ɔmɛ nɛ ngɛ la hluie ɔ a kpɛti. 55 Nɛ osɔfo nikɔtɔma amɛ kɛ kpe he ɔ kulaa hla munyu pɔtɛɛ nɛ a ma ngɔ wo Yesu he konɛ a da nɔ kɛ bu lɛ gbenɔ fɔ se a nɛ eko. 56 Nihi fuu ba ye lakpa odase slɔɔtohi kɛ si lɛ, se a odase ɔmɛ sɔɛ.

57 Nyagbe mi ɔ, ni komɛ hu te si nɛ a ye lakpa odase kɛ si Yesu nɛ a de ke, 58 "Wɔ nitsɛmɛ wa nu paa nɛ e de ke, ‘Ami lɛɛ i ma hule Sɔlemi We nɛ ɔ nɛ a wo nine kɛ ma a, nɛ ligbi etɛ se ɔ, i ma ma ekpa nɛ tsa pi nine nɛ i ma wo kɛ ma.’ " 59 Se a odase ɔmɛ hu sɔɛ.

60 Kɛkɛ nɛ Osɔfo Nɔkɔtɔma a te si da si nɛ e bi Yesu ke, "O be munyuhi abɔ nɛ a kɛ ngɛ o he woe nɛ ɔ eko kulaa nya jee lo?" 61 Se Yesu ha we lɛ heto nɛ Osɔfo Nɔkɔtɔma a kpale bi lɛ ke, "Mo ji Kristo, Mawu Bi ɔ lo?"

62 Yesu ha heto nɛ e de lɛ ke, "Ami tutuutu i, nɛ nyɛ maa na Nɔmlɔ Bi ɔ ngɛ Mawu hiɔ nine nɔ nɛ e kpale kɛ ma zugba a nɔ ngɛ hiɔwe bɔ kuu ɔmɛ a mi."

63 Kɛkɛ nɛ Osɔfo Nɔkɔtɔma a gba e he tade nɛ e de ke, "Mɛni odase kpa wa pa ngɛ hlae? 64 Nyɛ nitsɛmɛ nyɛ nu musu bɔmi munyu nɛ e tu ɔ. Kɛ nyɛ ngɛ dee kɛɛ?" Kɛkɛ nɛ kpe ɔ kulaa bu Yesu gbenɔ fɔ.

65 Amlɔ ɔ nɔuu ɔ, ni komɛ bɔni lada sumi kɛ e nɔ puemi, nɛ a fi e hɛ mi nɛ a bɔni lɛ nɔ́ simi. Ke a si lɛ nɔ́ ɔ, kɛkɛ a de lɛ ke, "Moo kla koo! Mɛnɔ si mo nɔ́ ɔ?" A ye e he fɛu, nɛ Osɔfo Nɔkɔtɔma a we bi ɔmɛ kongo lɛ.

66 Benɛ enɛ ɔ ngɛ nɔ yae ɔ, Petro ngɛ kpo ɔ nɔ ngɛ la hluie. Osɔfo Nɔkɔtɔma a we ɔ mi sɔmɔli yi ɔmɛ eko ba na Petro nɛ e ngɛ la hluie. 67 E hyɛ lɛ too nɛ e bi lɛ ke, "Tsɛ mo hu o kɛ nyumu nɛ ɔ nɛ je Nazaret ɔ nɛ nyɛɛ?"

68 Se Petro de lɛ ke, "E be mi! I li nɔ nɛ o ngɛ dee nɛ ɔ!" Kɛkɛ nɛ e si lejɛ ɔ kɛ ho se ya. Nɛ nɔuu ɔ, kungwɔ kpa nɔ

69 Se yoyo ɔ ngɛ lɛ hyɛe kɛ sa nɛ e de ni ɔmɛ nɛ daa si ngɛ lejɛ ɔ ke, "A ti nɔ kake ji lɔ ɔ nɛ!"

70 Se Petro kplɛɛ we nɔ lolo. Be bɔɔ se ɔ, ni ɔmɛ nɛ ngɛ lejɛ ɔ bɔni Petro demi ekohu ke, "Bɔ tsuaa bɔ nɛ ji ɔ, a ti nɔ kake ji mo. Ejakaa Galilea nɔ ji mo, nɛ o munyu tumi hu ngɛ ja a tsɔɔe paa."

71 Jehanɛ ɔ, Petro bɔni mɛ gbiɛmi kɛ kita kami ke, "Kpaoo, e be mi! I li Nɔmlɔ nɔ nɛ he munyu nɛ nyɛ ngɛ tue nɛ ɔ!"

72 Se Petro nya mɛ si nɛ kungwɔ kpa nɔ́ nɛ ji si enyɔ. Kɛkɛ nɛ Petro kai munyu nɛ Yesu tu ke, "Loko ji kungwɔ ma kpa nɔ́ nɛ ji si enyɔ ɔ, o ma kua mi si etɛ ke o li mi ɔ" Nɛ Petro hia ya.