1 Yesu kawukiti paliya kagenda kumkowa gwa Yudeya na kalokiti kumwambu kulushemba Yoridani. Lipinga lya wantu limgendera kayi, yomberi kawafunda handa ntambu ya katenda.

2 Su Mafalisayu wamgendera na wamkosiya kwa kumjera, "Hashi, lilagaliru lyetu limlekeziya muntu kumleka mdala gwakuwi?"

3 Yesu kawakosiya, "Musa kawalagalira malagaliru gaa?"

4 Nawombeli watakula, "Musa kalagaliriti mpalu kumpanani mdala gwakuwi lilembu lya kuleka na kamleki." 5 Yesu kawagambira, "Musa kawalembiriti lilagaliru ali toziya ya kukamala kwa myoyu yenu. 6 Kwa njira kwanja Mlungu pakayiwumbiti Isi, kawawumbiti mwana mpalu na mdala. Gambira malembu ntambu yagatakuliti, 7 Su, mpalu hakawaleki tati gwakuwi na mawu gwakuwi, hawaweri pamuhera na mdala gwakuwi, 8 woseri wawili hawaweri yumu. Kwa hangu womberi hawaweri kayi ndiri wawili ira yumu. 9 Su shakalemetiziyiti Mlungu, muntu nakashilekeniziya."

10 Pawingiriti kayi mnumba, wafundwa wakuwi wamkosiyiti shitwatira ashi. 11 Yomberi kawagambira, "Muntu yakamleka mdala gwakuwi na kumyuga gwingi, kankuhumba. 12 Viraa mdala yakamleka mpalu gwakuwi na kuyugwa na gwingi, kankuhumba."

13 Wantu wamjegiriti Yesu wana wadidini kawatulili mawoku, kumbiti wafundwa wawakalipira wantu. 14 Yesu pakawoniti hangu, kakalaliti kawagambira wantumintumi wakuwi, "Muwaleki wana awa wizi kwa neni, namuwalewalera, toziya Ufalumi wa Mlungu wa wantu gambira wana awa. 15 Nukugambirani nakaka, muntu yoseri yakanka ndiri Ufalumi wa Mlungu gambira mwana mdidini hapeni kingiri amu." 16 Shakapanu kawanka wana awa, kawakisikira na kawatekelera.

17 Yesu pakanjiti kayi mwanja gwakuwi, muntu yumu kamtugiriti na kamsuntamilira na kamkosiya, "Mfunda muheri, ntendi hashi mpati ukomu wa mashaka goseri?"

18 Yesu kamwankula, "Iwera hashi gushema muheri? Kwahera yakaweriti muheri kumbiti Mlungu gweka yakuwi. 19 Gulimana lilagaliru, ‘Naguhumba, nagulaga, naguwiwa, nagulaviya ukapitawu gwa kupayira, nagupaya, gumupanani ligoya tati na mawu gwaku.’"

20 Yomberi kamwankula, "Mfunda goseri aga nugakoliti kwanjira untemba wangu."

21 Yesu kamloliti na kamfira, kamgambira, "Gupungukiwa na shintu shimu, gugendi gukawuzi vintu vyaguweriti navi na mpiya guwapanani wahushu na gwenga hagutuli shigubakiru kumpindi, shakapanu gwizi gunfati." 22 Pakapikaniriti aga, kahinginikiti, moyu gumtama kagenda zakuwi toziya kaweriti kalunda.

23 Yesu kagalambuka aku na aku, kawagambira wafundwa wakuwi, "Ntambu gaa haiweri ikamala kwa walunda kwingira Muufalumi wa Mlungu!"

24 Wafundwa walikangasha nentu kwa visoweru vyakuwi. Yesu kawagambira kayi, "Wana wangu, vikamala nentu kwingira Muufalumi wa Mlungu! 25 Vikamala nentu mlunda kwingira Muufalumi wa Mlungu kuliku nkanyama ngamiya kupena mushitoboli sha sanziya."Nkanyama ngamiya

26 Wantumintumi wakuwi walikangasha nentu walikosiya, "Su gaa yakaweza kulopoziwa?"

27 Yesu kawalola kawagambira, "Kwa muntu iwezekana ndiri, kumbiti kwa Mlungu vitwatira vyoseri viwezikana."

28 Su Peteru kamgambira, "Na twenga hashi? Tuleka vyoseri, nakukufata!"

29 Yesu kawagambira, "Nakaka nukugambirani, kila muntu yakalekiti numba ama walongu ama dada ama mawu ama tati ama wana ama malambu toziya ya neni na kwa toziya ya Shisoweru Shiwagira, 30 hakanki nentu shaka ashi ama hakanki mala miya numba na walongu na wafunda na wamawu na wana na malambu pamuhera na kutabika. Shaka shiza hamuwanki ukomu wa mashaka goseri. 31 Kumbiti wavuwa yawaweriti wa kwanja hawaweri wa upeleru, na walii yawawera wa upeleru hawaweri wa kwanja."

32 Su, Yesu pamuhera na wantumintumi wakuwi waweriti munjira kugenda Yerusalemu na Yesu kaweriti kankuwalongolera. Wafundwa wakuwi waweriti wankulikangasha, na wantu yawawafatiti waweriti na lyoga. Yesu kawatola kayi kumbwega walii wafundwa wakuwi lilongu na mbili, kanja kuwagambira galii hagampati. 33 "Mpikaniri! Twankugenda Yerusalemu na aku neni Mwana gwa muntu hawantuli kwa watambika wakulu na wafunda wa Malagaliru, womberi hawantozi kuhowa na hawanaviyi kwa wantu yawawera ndiri Wayawudi. 34 Womberi hawamtenderi lidufiya na hawantemeri mata na hawasyatangi ntomondu na kumlaga. Kumbiti pagasoka mashaka matatu hakazyuki."

35 Su Yakobu na Yohani wana gwa Zebedayu wamgendera Yesu wamgambira, "Mfunda tufira gututenderi shintu shatufira kukuluwa."

36 Yesu kawakosiya, "Mfira nuwatenderi shishi?"

37 Wamwankula, "Gutujimiri kukala yumu uwega waku wa kumliwu na yumonga uwega waku wakumshigi pagulivaga mushibanta sha ukwisa waku."

38 Yesu kawagambira, "Muvimana ndiri shamluwa! Hashi, mweza kulandira lwindi lwanandira lwa ntabiku, ama mweza kubatizwa ntambu ya ubatizu wa neni?"

39 Wamwankula, "Yina tuweza."

Yesu kawagambira, "Lwindi lwanandira hamlandiri nakaka na hawambatizwi ntambu yanfira kubatiziwa, 40 kumbiti vyaneni ndiri kusyagula ayu hakalikali kumliwu ama kumshigi kwaneni, mpenyu azi ndo kwa walii yawatandilitwi kala."

41 Wafundwa wamonga walii lilongu, pawapikaniriti aga, wawakalaliliti Yakobu na Yohani. 42 Yesu kawashema, kawagambira, "Muvimana handa walii yawaholiti waweri wakolamlima wa isi zimonga wawagolokera wantu wawu kwa makakala na wakulu awa wawalanguziya makakala gawu. 43 Kumbiti kwa mwenga nayiwera hangu, ira yakafira kaweri mkulu, hakaweri ntumintumi gwenu. 44 Na muntu pakati penu yakafira kaweri mkulu, hakaweri ntumintumi gwa woseri. 45 Toziya Mwana gwa muntu kiza ndiri wamtenderi, kumbiti kuwatendera na kulavia ukomu wakuwi uweri ukombola wa wantu wavuwa."

46 Su wasoka Yeriku, Yesu na wafundwa wakuwi pamuhera na lipinga likulu lya wantu, pakaweriti kankulawa mulushi alu, kweniti kana lwisi mluwa yawamshema Baritulumayu mwana gwa Timayu, kaweriti kalivaga mbwega mwa njira. 47 Baritulumayu pakapikaniriti handa Yesu gwa Nazareti kankupita pahala palii, kabotanga, "Yesu, Mwana gwa Dawudi gumoneli lusungu!"

48 Wantu wavua wamkalapira, "Gunyamali." Kumbiti yomberi kongera kushema, "Mwana gwa Dawudi gumoneri lusungu!"

49 Yesu kagolokiti, katakula, "Mumshemi."

Su wamshema kana lwisi ulii, wamgambira, "Gulikakamaziyi! Gugoloki, yomberi kakushema."

50 Yomberi kasa lihabiti lyakuwi, kakopoka, kamgendera Yesu.

51 Yesu kamkosiya, "Gufira nukutenderi shishi?"

Kanalwisi ulii kamgambira, "Mfunda nduwa mpati kuwona."

52 Yesu kamgambira, "Gugendi, njimiru yaku ikuponiziya."

Pala palii kana lwisi ulii kaweza kuwona na kamfata Yesu munjira.