1 Mafalisayu wamu na wafunda wa Malagaliru waweriti wankulawa Yerusalemu walivaga pawamzyengeta Yesu. 2 Wawona wafundwa wamu wa Yesu wankuliya shiboga kwa mawoku mahumba, yani wagulula ndiri mawoku gawu ntambu ya ifiruwiti.

3 Toziya Mafalisayu na Wayawudi woseri waliya ndiri shiboga mpaka wagululi mawoku gawu ntambu ya wamaniti, wakoliti shitiba sha wazewi wau. 4 Pawalawa mumasoku waliya ndiri shintu shoseri mpaka washigululi huti ntambu ya wavimani. Viraa vilii wakoliti vitiba vimonga, gambira vilii kugulula lwindi, viwiga na vyombu vya shaba.

5 Su Mafalisayu na wafunda wa Malagaliru wamkosiya Yesu, "Ntambu gaa wafundwa waku wakola ndiri vitiba vya wambuyi wawu, ira womberi waliya kwa mawoku mahumbu?"

6 Yesu kawankula, "Isaya mbuyi gwa Mlungu katungiti weri, mwenga mwawafyangu, gambira ntambu yakalembiti,

‘Wantu awa, wanjimira kwa visoweru hera, kumbiti mumyoyu mwau, wapatali na neni. 7 Kuntambikira kwawu kunfaa ndiri toziya wafunda vitiba vya wantu hera gambira malagaliru ga Mlungu.’ "

8 "Mwenga mugaleka malagaliru ga Mlungu na kukola vitiba vyenu."

9 Yesu kendereyiti kutakula, "Mwenga mulihola muherepa, kumbiti mugalema malagaliru ga Mlungu su muvikoli vitiba vyenu. 10 Musa kalagaliriti, ‘Guwapanani ligoya tati gwaku na mawu gwaku.’ Kayi katakuliti ‘muntu yoseri yakamuhigilanga tati ama mawu, muntu ayu hawamlagi.’ 11 Kumbiti mwenga mfunda, gambira muntu kana shintu sha kuwatanga tati ama mawu gwakuwi, kumbiti katakula shintu ashi ‘Kolibani’ mana yakuwi mafupu kwa Mlungu, 12 su mtakula kalazimika ndiri kuwatanga tati gwakuwi ama mawu gwakuwi. 13 Su, kwa ntambu ayi mbeziya shisoweru sha Mlungu toziya ya mafundu gamwanka. Kayi mtenda vitwatira vivuwa vya ntambu ayi."

14 Yesu kalishema kayi lipinga lilii lya wantu. Kawagambira, "Mpikaniri woseri, muvimani. 15 Kwahera shintu shashimwingira muntu shashiweza kumtenda kaweri muhumba. Kumbiti shashimlawa muntu ashi ndo shashimtenda muntu kaweri muhumba. 16 Muntu pakana makutu, kapikaniri."

17 Pakalilekiti lipinga lya wantu na kwingira mnumba, wafundwa wakuwi wamkosiya mana ya mfanu wakatakuliti. 18 Yesu kawagambira, "Hashi, ata mwenga mwelewa ndiri? Hashi muvimana ndiri handa shintu shashimwingira muntu kulawa kunja, shimtenda ndiri muntu kaweri muhumba, 19 Toziya shimwingira ndiri mumoyu, kumbiti shingira mumtima, shakapanu shilawa kunja munshimba?" Kwa kutakula hangu, Yesu kavipungiti viboga vyoseri.

20 Kendereyiti kulonga, "Shashilawa munshimba mwamuntu ndo shimtenda kaweri muhumba. 21 Toziya mumoyu mwa muntu mulawa maholu madoda na uhumba na upoka na kulaga shakapanu 22 undiyandiya na lwaliya na vidoda na upyotu na utindira na weya na mahigilangu na shinika na lipungasesi. 23 Madoda aga goseri galawa munshimba mwa muntu, ndo hagamtendi muntu kaweri muhumba."

24 Yesu kawuka paliya, kagenda mulushi lwa Tiru. Aku kingira mnumba na kafiriti ndiri muntu yoseri kavimani, kumbiti kaweziti ndiri kulififa. 25 Peniti mdala yumu, mweni nafunda gwakuwi kaweriti na washamshera, kapikaniriti visoweru vya Yesu. Palaa paliya kiza kamsuntamalira pamagulu pakuwi. 26 Mdala ayu kaweriti Mgiriki, mwenikaya gwa Silofainiki. Su kamluwa Yesu kamlaviyi nafunda gwakuwi shamshera kadoda. 27 Yesu kamgambira, "Guleki huti wana wikuti. Toziya iherepa ndiri kutola shiboga sha wana na kuwasila wang'ang'a."

28 Kumbiti mdala uliya kamwankula, "Yina Mtuwa, kumbiti ata wang'ang'a wapasi pavitalawanda waliya shiboga shawalekiti wana!"

29 Yesu kamgambira, "Toziya ya shisoweru ashi shagulongiti, gugendi ukaya, shamshera kamlawa kala muhinga gwaku!"

30 Su kagenda ukaya kwakuwi, kamwona mwana kagonja mulisaga na shamshera kamlawiti kala.

31 Shakapanu Yesu kawuka mulushi lwa Tiru, kapitira Sidoni, kasoka litanda lya Galilaya kwa kupitira mukowa lushi lilongu. 32 Su wamjegera muntu kana majogu viraa bebi, wamluwa kamtulili mawoku. 33 Yesu kamtura kutali na wantu. Katula vyala vyakuwi mumakutu mwa muntu uliya. Katema mata na kumshinkula lulimi. 34 Shakapanu kalola kumpindi kwa Mlungu, kapumula na kumgambira, "Efata," mana yakuwi, "Guvuguki!"

35 Palaa makutu gakuwi gavuguka na lulimi lwakuwi luyoposoka, kanja kutakula weri. 36 Yesu kawabeliziya nawamgambiziya muntu yoseri vitwatira avi. Kumbiti ntambu yakawabeleriti, ndo ntambu yawendereyiti kubwera shisoweru ashi. 37 Wantu walikangasha nentu. Watakula, "Katenda vyoseri viheri, kawatenda wanamajogu kupikanira na bebi kutakula!"