1 Gasigariti mashaka mawili pamberi pa kusoka mumsambu gwa Pasaka na mabumunda gawalekera ndiri simika. Watambika wakulu wa numba ya Mlungu na wafunda wa malagaliru waweriti wankusakula njira ya kumbata Yesu wamlagi. 2 Su watakula, "Tuleki kumbata mumsambu gwa Pasaka, toziya wantu hawatendi ndewu."

3 Yesu kaweriti Betaniya mnumba mwa Simoni mungumbula. Pawaweriti pashintalawanda wankuliya shiboga, mawu yumu yakaweriti na supa ya lipaki lya utuli wa beyi nkulu kiza. Kaimega supa ayi na kamumiminira Yesu lipaki mumtuwi.

4 Wantu wamu waweriti panu wakalaliti, walitakuliziyana, "Iwera hashi kwananga lipaki linunkira ali? 5 Megaweziti kuwuza kwa mpiya za shibenamgongu sha shinja shimu, na kuwapanana wahushu!" Wamkalipira mawu ayu. 6 Kumbiti Yesu kawagambira, "Mumleki, iwera hashi kumgaziya? Kantendera shintu shiherepa. 7 Hamuweri na wahushu mashaka goseri, hamuwezi kuwatanga shaka shoseri shamfira. Kumbiti neni hapeni weri na mwenga mashaka goseri. 8 Yomberi katenda ntambu yakaweziti, kayitilira nshimba yangu lipaki lya utuli kuyitandira kwa kusira. 9 Nukugambirani nakaka, poseri muisi Shisoweru Shiwagira pashibweruwa, shitwatira ashi shakatenditi hashikandwi ntambu ya kulihola."

10 Shakapanu Yuda Isikariyoti, yumu gwa walii lilongu na mbili, kagenditi kwa watambika wakulu su kamgalambuki Yesu. 11 Watambika wa numba ya Mlungu pawapikaniriti shisoweru ashi, wasekelera, wamlagaliti kumpanana mpiya. Su, Yuda kanja kusakula lupenyu lwa kumgalambuka kwa Watambika wakulu.

12 Lishaka lya kwanja lya Msambu gwa Mabumunda yagawalekerwa ndiri simika, shaka sheni mwanakondolu gwa Pasaka pakalikitulwa, wafundwa wakuwi wamkosiyiti, "Gufira tukutandiri koshi shiboga sha Pasaka?" 13 Su Yesu kawalagalira wawili wa wafundwa wakuwi pakawagambira, "Mgendi mlushi, na amu hamuliwoni na mpalu yumu yakalitwika vulu ya mashi. Mumfati 14 mpaka mnumba yakingiri, mwakamgambiri mweni kaya, ‘Mfunda kalonga sha koshi shuwogu sheni handiyi Pasaka pamuhera na wafundwa wangu?’ 15 Yomberi hakawalonguziyi shuwogu shikulu mligolofa amu vyoseri wavitandira kala, mtutandiri amu." 16 Wafundwa wawuka, wagenda mlushi, wawona kila shintu weri ntambu yakawagambiriti Yesu. Su watandira shiboga sha pasaka. 17 Payiweriti pamihi, Yesu kiziti pamuhera na wafundwa wakuwi lilongu na mbili. 18 Pawaweriti pashitandawala wankuliya, Yesu katakuliti, "Nakaka nukugambirani, yumu gwenu yakaliya pamuhera naneni, hakang'alambuki." 19 Panu wafundwa wakuwi wanja kulihola, yumu yumu wamkosiyiti, "Hashi, neni?" 20 Yesu kawagambira, "Yumu gwenu mwenga lilongu na mbili, yakashwika libumunda pamuhera naneni mubakuli. 21 Nakaka Mwana gwa muntu hakahowi handa Malembu Mananagala ntambu yagatakuliti kwakuwi, kumbiti shondi kwakuwi muntu ulii yakamgalambuka Mwana gwa muntu! Hayiweri kwa muntu ulii handa mekayiwuki ndiri!"

22 Pawaweriti wankuliya, Yesu katoliti libumunda, kalonga mayagashii Mlungu, kalimega na kawapanana wafundwa wakuwi pakalonga, "Mtoli mlii, ayi ndo nshimba ya neni." 23 Shakapanu katola lwindi lwa divayi, kalonga mayagashii Mlungu, kawapanana, woseri walanda mulwindi alu. 24 Kawagambira, "Agu ndo mwazi gwangu gwagulawa kwajili ya wantu wavuwa. Mwazi gwangu gwagulanguziya lipatanu lya Mlungu na wantu. 25 Nakaka nukugambirani, hapeni nandi kayi divayi mpaka lishaka lilii panfira kuyilanda divayi yasyayi Muufalumi wa Mlungu." 26 Shakapanu wimba lwimbu, wawuka, wagenda kulugongu lwa Mizeyituni.

27 Yesu kankuwagambira wafundwa wakuwi, "Mwawoseri hamtugi na kundeka, toziya Malembu Mananagala galonga,

‘Mlungu hakamlagi mlolera gwa kondolu,

Na wakondolu hawapangalanyiki.’ 28 Kumbiti panzyuka kala, hanuwalongoleri Galilaya kulii!" 29 Peteru kamgambira, "Handa woseri hawakuleki, neni hanukulemi ndiri!"

30 Yesu kamgambira Peteru, "Nakaka nukugambira, pashiru panu, pamberi njogolu keniwiki mala mbili, hagunemi mala ntatu." 31 Kumbiti Peteru kalilapira, "Ata payiwera nfuwi pamuhera na gwenga, hapeni nukulemi." Wafundwa woseri viraa watakula ntambu iraa ayi.

32 Su, wasoka mushiwunga shawashishemiti Getisemani. Yesu kawagambira wafundwa wakuwi, "Mulivagi panu shaka neni nankumluwa Mlungu." 33 Shakapanu kawatola Peteru na Yakobu na Yohani, kanja kulishera nentu na kushashatika. 34 Kawagambira, "Moyo gwangu guntama nentu, ata sambira howa. Mukali panu na muweri masu." 35 Kagenda kulongolu kidogu, kasuntumala makukama, kamluwa Mlungu, handa payiwezekana, shimpiti shaka ashi sha ntabiku. 36 Kalonga, "Tati!, Tati gwangu, kwa gwenga vitwatira yoseri viwezikana. Gumpusiliri lwindi lwa ntabiku alu, kumbiti hayiweri handa ntambu yanfira neni, ira ntambu yagufira gwenga." 37 Shakapanu kawuya kwa Wafundwa walii watatu, kawoniti wagonja. Su kamkosiya Peteru, "Simoni, hashi gugonja? Guweza ndiri kulikala masu ata lisaa limu?" 38 Shakapanu kawagambira, "Mukali weri na mumluwi Mlungu su namwingira mukujerwa. Rohu ifira, kumbiti nshimba yahera likakala." 39 Kagenda kumluwa Mlungu kayi pakawuyira visoweru viraa vilii. 40 Shakapanu kawuya kayi kwa wafundwa walii kawawoniti wagonja. Masu gawu gaweriti gana mpota. Wavimana ndiri sha kumwankula. 41 Pakawiziriti mala ya tatu kawagambiriti, "Mwankali mwankugonja na kwoyera? Vinu itosha! Saa isoka! Muloli, Mwana gwa muntu wankumpanana kwa wantu yawawera na vidoda. 42 Mwimuki, tugendeni zetu. Mloli, ulii yakafira kung'alambuka kapakwegera."

43 Yesu Pakaweriti kankali kankutakula, Yuda, yumu gwa wafundwa lilongu na mbili, kiza pamuhera na lipinga lya wantu wana mapanga na vindonga. Wantu awa waweriti walagalilwiti na watambika wakulu na wafunda wa Malagaliru na wazewi. 44 Yuda mgalambuka kaweriti kawalanguziya lilanguliru, "ulii hanumnoneri ndo mweni, mumbati na kumjega wakamloleri." 45 Yuda pakasokiti, kamgenderiti Yesu, kamgambira, "Mfunda." Shakapanu kamnonera. 46 Wantu walii wambata Yesu, na kumtawa. 47 Yumu gwa walia yawaweriti wagoloka pamuhera na Yesu, kasolomola ligumba lyakuwi, kamdumula likutu ntumintumi gwa Mtambika mkulu. 48 Yesu kawagambira, "Vyamwiza na mapanga na vindonga kumbata gambira neni na mkwepula? 49 Kila lishaka nweriti pamuhera na mwenga panfunda Mnumba nkulu ya Mlungu, wala mumbata ndiri. Kumbiti vinu Malembu Mananagala ga kala."

50 Panu wantumintumi woseri wamleka, watira. 51 Kweniti na muntemba yumu yakaweriti kavala lishuka kaweriti kankumfata Yesu. Nawomberi wajeriti kumbata, 52 kumbiti yomberi kayirekiziya shuka yakuwi, katuga shivula hera.

53 Su wamjega Yesu kwa Mtambika mkulu peni Watambika wakulu woseri na wazewi na wafunda wa malagaliru waweriti waliwona. 54 Peteru kamfatiti Yesu kwa kutali, kingira muluwaga lwa numba ya mtambika mkulu, kalivaga pamuhera na walolera ligomi pakotera motu. 55 Watambika wakulu wa shiyotera motu sha Wayawudi woseri wasakula upitawu wa kumsitaki Yesu wapati kumlaga, kumbiti wapata ndiri. 56 Wantu wavuwa walaviyiti upitawu wa kupaya kwa Yesu, kumbiti upitawu wawu ujimilirana ndiri. 57 Shakapanu wamonga wagolokiti, walaviya upitawu wa kupaya pawatakula, 58 "Tumpikaniriti muntu ayu pakatakula hanuhalibisiyi Numba nkulu ya Mlungu yawanyawiti kwa mawoku, na kwa mashaka matatu hanuinyawi imonga yawainyawa ndiri kwa mawoku." 59 Kumbiti ata hangu, upitawu wawu ujumilirana ndiri.

60 Su, Mtambika mkulu kagoloka pakati pawu, kamkosiya Yesu, "Hashi, gwankula ndiri shisoweru? Wantu awa gawawoniti kwa gwenga?" 61 Kumbiti yomberi kalikaliti jii katakula ndiri ata shisoweru shimu. Mtambika mkulu gwa numba ya Mlungu kamkosiya kayi, "Hashi, gwenga ndo Kristu, Mwana gwa Mlungu yawamkwisa?" 62 Yesu kankula, "Neni ndo mweni. Kayi hamumoni neni Mwana gwa muntu pakalivaga uwega wa kumliwu wa Mtuwa yakawera na makakala, pakiza mumawundi ga kumpindi." 63 Panu Mtambika mkulu kapapula lihabiti lyakuwi, kalonga, "Tufira ndiri kayi wakapitawu wamonga? 64 Mpikanira kankumwigilanga Mlungu! Mwenga mwona hashi?" Woseri wamtoza, kafiruwa kuhowa. 65 Su wamu wawu wanja kumtemera mata, wamgubikira sheni, wamkoma na kumgambira. "Gutungi gaa yakakukomiti!" Walolera ligomi wamtola, wamwakula.

66 Peteru pakaweriti kankali paluwaga, mdala yumu gwa wantumintumi wa Mtambika Mkulu kiziti. 67 Pakamwoniti Peteru kankuyotera motu, kamloliti, kamgambira. "Viraa gwenga guweriti pamuhera na Yesu Mnazareti." 68 Peteru kalema, "Numumana ndiri, wala nuvimana ndiri gagutakula!" Shakapanu Peteru kawuka, kagenda kunja kuwuwa. Panu njogolu kaweka. 69 Ntumintumi mdala ulii pakamwoniti kayi Peteru, kanja kayi kuwagambira wantu yawaweriti wagoloka palii, "Muntu ayu yumu gwawu." 70 Peteru kalema kayi.

Shakapanu katepu, wantu waweriti wagoloka palii wamgambira Peteru. "Nakaka gwenga gwa yumu gwawu, toziya gwenga gwa Mgalilaya." 71 Kumbiti Peteru kanja kulirapa, pakatakula, "Neni nummana ndiri muntu ulii yamtakula visoweru vyakuwi." 72 Palaa palii njogolu kaeika mala ya pili. Su Peteru kalihola ntambu Yesu pakaweriti pakamgambira, "pamberi pa njogolu keniwiki mala ya pili, hagunemi mala ntatu." Peteru kalira nentu.