1 Yesu kongera kuwagambira, nukugambirani nakaka, wamonga wapalaapa hapeni wahowi pota kuuwona Ufalumi wa Mlungu pawiza na makakala.

2 Pagapititi mashaka sita, Yesu kawatola Peteru na Yakobu na Yohani kagenda nawa kumpindi kulugongu lutalipa gweka yawu. Pawaweriti wankulola, Yesu kagalambusiwa nshimba kulongolu kwawu, 3 nguwu zakuwi zimelemeta, ziwera za neru mbuu kwahera muntu yakaweza kuputa ntambu ilii. 4 Wantumintumi watatu walii wawawoniti Eliya na Musa wankuyowera na Yesu. 5 Peteru kamgambira Yesu, "Mfunda iherepa nentu twa panu. Su mbaka tunyawi visasa vitatu, shimu shaku na shimu sha Musa na shimu sha Eliya." 6 Ashina Peteru watira nentu, Peteru kavimana ndiri shakutakuliti.

7 Shakapanu shilawira shivinyiru sha liwundi shiwagubikira na liziwu lipikanirika kulawa muliwundi, "Ayu ndo mwana gwangu yanumfira, mumpikiniri." 8 Palapaliya wantumintumi awa walolalola, kumbiti wamwona ndiri muntu yumonga, kumbiti Yesu gweka yakuwi.

9 Pawaweriti wankusuluka mlugongu, Yesu kawagambiriti, namumgambira muntu yoseri vitwatira vyamuwoniti, mpaka neni Mwana gwa muntu panzyukaku kulawa kwa wahowa. 10 Su, wakola malagaliru aga, kumbiti waweriti wankulitakuziyana mana ya kuzyuka kulawa kwa wahowiti. 11 Wamkosiya Yesu, "Iwera hashi wafunda wa Malagaliru watakula Eliya mpaka kizi huti?"

12 Nayomberi kawankula, "Yina, Eliya kankwiza huti kuwanyawira vyoseri. Kumbiti kwa shishi su walemba mumalembu mananagala handa Mwana gwa muntu hakatabiki nentu na kulemwa? 13 Kumbiti nukugambirani, Eliya kizakala, nawomberi wamtendera ntambu yawafiriti gambira Malembu ntambu yagatakuliti hawamtenderi."

14 Yesu pamuhera na wafundwa watatu pawawuyiti kwa wantumintumi wamonga, wawoniti lipinga likulu lya wantu na wafunda wamu wa Malagaliru waweriti wankulitakuziyana nayomberi. 15 Palaa palii wantu pawamwoniti Yesu, woseri walikangasha nentu, wamtugira wamlamusiyi. 16 Yesu kawakosiya wantumintumi wakuwi, "Mwankulitakuziyana shishi nawa?" 17 Su muntu yumu mulipinga lya wantu kawankula, "Mfunda numjega mwana gwangu kwaku, toziya kana shamshera yakamtenda kalanduli ndiri. 18 Kila mala pakamwizila, kamgusiya pasi na kumtenda kalawi ufulufulu mumlomu, pakagayagaya menu na nshimba yoseri iyuma. Nuwaluwiti wafundwa waku wamlaviyi shamshera uliya kumbiti wasinda."

19 Yesu kawagambira, "Mwenga, shiyiwuku shashihera njimiru! Hashi hankali na mwenga mpaka ndii? Hashi hanuwahepeleri mpaka ndii? Mumjegi panu." 20 Wamjega mwana uliya yakaweriti na washamshera, shamshera ulii pakamwoniti Yesu, palaa palii kamgusiya pasi na kumlekela shisirika, nayomberi, kagalagata na kulawa lufulufulu mumulomu. 21 Yesu kamkosiya tati gwa mwana ulii, "Vitwatira avi vimpata kwanjira ndii?"

Yomberi kawankula, "Kwanjira uwana wakuwi." 22 Mala zitangala shamshera ulii kamgusiyiti mumotu na mumashi su kamlagi. Payiwera guweza Gutuwoneri lusungu, gututangi!

23 Yesu kamgambira, "Iwera hashi gutakula handa guweza?" Nukugambira vitwatira vyoseri viwezekana kwa muntu yakawera na njimiru.

24 Su Palaa palii tati gwa mwana ulii kabotanga pakalonga, "Njimira! Guntangi neni weri na njimiru itosha."

25 Yesu pakaliwoniti lipinga lya wantu lyankuwongereka kamukamu, kamkalipiriti shamshera ulii pakamgambira, "Shamshera yagumtenda mwana ayu kaweri bebi na majogu, nukugambira gumlawi mwana ayu nagumwingira kayi!"

26 Shamshera ulii kagutanga na kamgusiya pasi mwana ulii, kamlawa. Mwana ulii kawonekaniti handa kahowa, su wantu wavuwa walongiti, "Kahowa!" 27 Kumbiti Yesu kamkola liwoku kamnyasula na yomberi kagoloka.

28 Yesu pakingiriti mnumba, wafundwa wakuwi wamkosiyiti pawawera gweka yawu, "Iwera hashi twenga tusinda kumlaviya shamshera ulii?"

29 Yesu kawagambira, "Shamshera gwa ntambu ayi hapeni kalawi kumbiti kalawa kwa kumluwa Mlungu hera."

30 Yesu pamuhera na wafundwa wakuwi wawukiti palii, wendereyiti na mwanja kupitira mukowa gwa Galilaya. Yesu kafiriti ndiri muntu yoseri kavimani pawawera, 31 toziya kaweriti kankuwafunda wafundwa wakuwi. Kawagambiriti, "Mwana gwa muntu hawamlaviyi kwa wantu wamlagi. Kumbiti pagapita mashaka matatu hakazyuki."

32 Wafundwa wavimaniti ndiri vitwatira avi kumbiti watira kumkosiya.

33 Su wasokiti Kafarinaumu, na pakaweriti mnumba, Yesu kawakosiyiti wafundwa wakuwi, "Mweriti mwankulitakuziya shishi munjira?"

34 Kumbiti womberi wanyamalira, mana munjira waweriti wankulitakuziana, "Gani mkulu pakati petu?" 35 Yesu kalivaga pasi, kawashema walii wantumintumi lilongu na mbili kawagambira, "muntu pakafira kaweri gwa kwanja hakaweri gwa kupelera na ntumintumi gwa woseri." 36 Shakapanu kamtola mwana mdidini, kamgolosiya pakati pawomberi. Kamkisikira, shakapanu kawagambira, 37 "Yakamwanka yumu gwa mwana gambira ayu kwa litawu lyangu, kananka neni na yakananka neni kananka hera ndiri neni, su kamwanka yakantumiti neni."

38 Yohani kamgambira, "mfunda tumwona muntu yumu kankuwusiya washamshera kwa litawu lyaku, twenga tujera kumberiziya toziya yomberi ka yumu gwetu ndiri."

39 Kumbiti Yesu kawagambira, "Mleki kumberiziya, toziya kwahera muntu yakatenda mauzauza kwa litawu lyangu na palaa panu shakapanu katakuli vidoda kwaneni. 40 Toziya muntu yakatulema ndiri twenga, muyetu. 41 Nuwagambira nakaka, muntu yoseri yakakupanani mashi gakulanda toziya mwenga mwa wantu wa Kristu, nakamu hapeni kakosi kipata lifupu lyakuwi.

42 "Muntu yoseri yakamtenda yumu gwa wadidini wawanjimira katendi vidoda, iweri mbaka kwa muntu uliya kumtawalira musingu mwakuwi lwala na kumwasira mulitanda. 43 Liwoku lyaku palikutenda gutendi vidoda, gulidumuli! Iherepa nentu kwingira muukomu wa mashaka goseri pota liwoku limu kuliku kuwera na mawoku mawili na kugenda mumotu gwa Jehanamu, motu gwakuwi gutenda ndiri tiya. 44 Kweni watekenya wakuwi wafuwa ndiri, wala motu gutenda ndir tiya. 45 Na Ligulu lyaku palikutenda gutendi vidoda, gulidumuli! Iherepa nentu kwingira muukomu wa mashaka goseri pota ligulu limu, kuliku kuwera na magulu goseri mawili na kukwasira mumotu gwa Jehanamu motu gutenda tiya ndiri. 46 Kweni watekenya wawaluma wafuwa ndiri na motu gutenda tiya ndiri. 47 Na lisu lyaku palikutenda gutendi vidoda, gulitupuli! Iherepa nentu kwingira Muufalumi wa Mlungu paguwera na lisu limu hera. Kuliku kuwera na masu gaku goseri mawili na kukwasira mumotu gwa Jehanamu gutenda tiya ndiri. 48 Amu watekenya wakuwi wawaluma wafuwa ndiri, na motu gutenda ndiri tiya.

49 "Toziya kila yumu hawampungi kwa motu.

50 "Munu guherepa, kumbiti pagulawa kunoga wakuwi, hagukoleri na shishi?

"Muweri na munu mngati mwenu na mulikali weri na wayenu."