1 Yesu kanjiti kutakula nawu kwa mifanu, "Muntu yumu kalimiti lirambu lya mizyabibu. Katindiliziya shibambaza na pakati pa lirambu kabawa lirindi lya kuyonera zyabibu, kanyawa lilingu lya kulolelera. Kawazimila lirambu ali kwa walimi, mweni kagenda mpaka lushi lwa kutali.Wantu wawili wankuyonera zyabibu 2 Shaka sha kubenanga, kamtumiti ntumintumi gwakuwi kwa walimi walii, kamjegeri seemu ya viboga vya lirambu lyakuwi. 3 Walimi walii wambata, wamkoma, wamwuziya mawoku hera. 4 Kamtuma kayi ntumintumi yumonga, ayu viraa walimi wamkomanga mumtuwi na kumtendera vidoda. 5 Mweni kana lirambu ulii kamtuma kayi ntumintumi yumonga, walimi awa wamlagiti. Watenditi hangu kwa wamonga wavuwa yakawatumiti, wamonga wawakomiti, na wamonga wawalaga. 6 Kasigaliwiti na muntu yumu, yani mwana gwakuwi yakamfira. Upeleru kamtuma ayu pakalihola, ‘Hawamupanani ligoya mwana gwangu.’ 7 Kumbiti walimi awa waligambirana, ‘Ayu ndo muhala mweni, tumlagi su uhala wakuwi uweri wa twenga!’ 8 Su, wambata, wamlaga na kumwasa kunja kulirambu lilii.

9 "Hashi, mweni kana lirambu hakatendi shishi? Hakizi kuwalaga walimi woseri na kuliyazimilira lirambu lya mizyabibu kwa wantu wamonga. 10 Hashi, hamwenibetuli Malembu Mananagala,

‘Libuwi lyawaliremiti wanyawa numba

Vinu liwera libuwi lyaliwera na mana nentu kuliku mabuwi goseri.

11 Mtuwa ndo mweni yakatenditi shintu ashi,

Nasheni ndo shakulikangasha kwa twenga’?"

12 Watambika wa numba ya Mlungu na wafunda wa malagaliru na wazewi wavimaniti handa mfanu agu guweriti kawalonga womberi. Hangu wajeriti kumbata, kumbiti watiriti lipinga lya wantu. Su wamleka kagendi zakuwi.

13 Su Mafalisayu wamu na wantu wa shipinga sha mfalumi Herodi watumitwi su wamgomiziyi Yesu kwa visoweru vyakuwi. 14 Wamgendera, wamgambira, "Mfunda tuvimana handa gwenga ndo muntu yagwaminika, gutakula nakaka hera, wala gumshera ndiri muntu yoseri shakaliholiti. Gulishera ndiri ukulu wa muntu, toziya gufunda unakaka hera wa Mlungu kwa wantu. Su, gutugambiri vya halali kumupa Kayisari kodi ama ndala?"

15 Kumbiti Yesu kavimaniti ufyangu wawu, kawagambira, "Iwera hashi mfira kungomiziya? Mnanguziyi ligwala lya mpiya."

16 Wamlanguziya. Yomberi kawakosiya, "Sheni na shilanguliru ashi sha gaa?"

Wamwankula, "Shilanguliru ashi sha Kayisari."

17 Su Yesu kawagambira, "Vya Kayisari mumpanani Kayisari na vya Mlungu mumpanani Mlungu." Walikangashira nentu.

18 Wantu yawalawiti mushipinga sha Masadukayu, walii watakulaga kwahera muntu yakaweza kuzyuka, su wamgenderiti Yesu wamkosiya, 19 "Mfunda, Musa katulagaliriti hangu, ‘Muntu pakahowa na kumleka mdala pota mwana, mlongu gwakuwi mpaka kamtoli mkenja ulii na kamyiwuliri wana mlongu gwakuwi yakahowiti.’ 20 Su kuweriti na walongu saba. Gwa kwanja kamyugiti, kahowa pota kumleka mwana. 21 Mlongu gwa pili kamyuga mkenja ayu na yomberi kahowa pota kuleka mwana. Ilawiriti ntambu iraayi kwa mlongu gwa tatu. 22 Woseri saba wahowa pota kuleka wana. Pawupeleru mdala ulii kahowa. 23 Vinu wantu pawazyuka mulishaka lya kuzyuka, mawu ayu hakaweri mdala gwa gaa? Toziya woseri saba wamyugiti."

24 Yesu kawankula, "Mwenga mwagamila toziya mgamana ndiri Malembu Mananagala ama likakala lya Mlungu. 25 Toziya yawahowiti pawazyuka, hapeni wayugi wala kuyugwa, hawaweri handa wantumintumi wa kumpindi. 26 Kumbiti kwa shisoweru sha kuzyukisiwa kwa wantu yawahowiti, hashi, mwenibetuli mushintola sha Musa shisoweru shilii sha shitogolu shashiyakiti motu, Mlungu ntambu yakamgambiriti Musa, ‘Neni na Mlungu gwa Aburahamu na Mlungu gwa Isaka na Mlungu gwa Yakobu.’ 27 Yomberi Mlungu ndiri gwa yawahowiti, ira Mlungu gwa wakomu. Su, mwenga mwagamila nentu!"

28 Yumu gwa wafunda wa malagaliru kasokiti, kawapikanira Masadukayu wankulitakuziyana na Yesu. Pawawoniti Yesu kawankuliti weri, kamkosiya, "Mumalagaliru goseri, lilagaliru lyoshi likulu kuliku goseri?"

29 Yesu kamwankula, "Lilagaliru likulu ndo ali, ‘Gupikaniri Israeli! Mlungu Mtuwa gwetu, ndo mweni Mtuwa gweka yakuwi. 30 Gumfiri Mlungu Mtuwa gwaku kwa moyu gwaku goseri na kwa rohu yaku yoseri na kwa mahala gaku goseri na kwa makakala gaku goseri.’ 31 Na lilagaliru lya pili kwa ukulu ndo ali, ‘Guwafiri wamonga ntambu yagulifira gumweni.’ Kwahera lilagaliru limonga likulu nentu kuliku ali."

32 Su mfunda ulii gwa malagaliru kamgambira, "Iherepa Mfunda! Gutakula nakaka kulonga Mlungu yumu hera na kwahera yumonga ira yomberi. 33 Na gumfiri Mlungu Mtuwa gwaku kwa moyu gwaku goseri na kwa mahala gaku goseri na kwa makakala gaku goseri na guwafiri wamonga ntambu yagulifira gamweni. Shitwatira ashi shana mana nentu kuliku matambiku goseri gakulunguziya torosu kwa Mlungu."

34 Yesu pakawoniti handa muntu ayu kamwankula kwa luhala, kamgambira, "Gwenga gwakutali ndiri na Ufalumi wa Mlungu."

Palongolu pa aga, kwahera muntu yakajeriti kayi kumkosiya shintu.

35 Shaka Yesu pakaweriti kankufunda Mnumba nkulu ya Mlungu, kakosiyiti, "Iwera hashi wafunda wa malagaliru watakula handa Kristu mwana gwa Dawudi? 36 Dawudi pakalongoziwitwi na Rohu Mnanagala katakuliti,

‘Mtuwa kamgambiriti Mtuwa gwangu,

Gukali uwega wa neni wa kumliwu,

Mpaka panuwatula wankondu waku pasi pa magulu gaku.’ "

37 "Dawudi mweni kamshema Kristu Mtuwa. Su Kristu hakaweri hashi mwana gwakuwi?" Lipinga lya wantu waweriti wankumpikanira,

Lipinga lya wantu liweriti lyakumpikanira Yesu kwa kunemelera. 38 Yesu pakaweriti kankufunda, katakuliti, "Mulikali weri na wafunda wa malagaliru weni wafira kulipitiziya pitiziya walikwindira lihabiti ritali na wafira wantu wawalamsiyi kwa ligoya kusoku. 39 Wafira kulivaga muvigoda vya kulongolu mnumba ya Mlungu, na kutola mpenyu ziherepa pamsambu 40 Wawayonga wakenja aku wankulipayira kumluwa Mlungu kwa shaka shitali! Lishaka lya kutoza hawatabiki nentu!"

41 Yesu kaweriti kalivaga pakwegera na lisanduku lya luhanja. Kaweriti kankulola wantu wavuwa ntambu yawaweriti wankulavia mpiya na kuzitula muluhanja lwa Numba nkulu ya Mlungu. Walunda wavuwa walaviyiti mpiya zivuwa. 42 Kiza mkenja muhushu kalaviya senti ndidika mbili zya mpiya. 43 Panu Yesu kawashema wafundwa wakuwi, kawagambira, "Nukugambirani nakaka, mkenja muhushu ayu kalaviya zivuwa kuliku wamonga woseri yawatuliti mpiya mulisanduku lya luhanja. 44 Mana woseri walaviya kulawilirana na mpiya zyazisigalliti, kumbiti mawu ayu, tembera muhushu, kalaviya vyoseri vyakaweriti navi, kalaviya kila shintu shakafiriti kwa kulikala."