1 Palipititi Lishaka lya kwoyera, Mariya Magidalena na Salomi na Mariya mawu gwakuwi Yakobu wahemeriti lipaki lya utuli wagendi kuyiswaga nshimba ya Yesu. 2 Su mandawira putiputi lishaka lya Jumapili. Kwa Shigiriki jumapili walishema lishaka lya kwanja la juma, mshenji pagwanjiti kulawa wiziti Mulipumba. 3 Nawomberi waweriti wankuligambiziyana, "Gani hakatuwusiliri libuwi lilii paligomi lya lipumba?" 4 Kumbiti pawaloliti, wawona libuwi waliwusiya kala. Nalyeni liweriti likulu nentu. 5 Pawayingiriti Mulipumba, wamwoniti muntemba yumu yakavaliti nguwu neru mbuu, kalivaga uwega wa kumliwu, walikangasha nentu. 6 Kumbiti muntemba ulii kawagambira, "Namulikangasha. Mwankumsakula Yesu gwa Nazareti yawampingikiti. Kazyuka, kwahera panu. Mloli pahali pawamgonjekiti. 7 Mgendi mwakawagambiri wafundwa wakuwi pamuhera na Peteru. ‘Handa Yesu kankuwalongolera Galilaya kulii. Aku hamumwoni ntambu yakawagambireni.’ " 8 Su walawa mulipumba mlii na watuga pawashashatika kwa lyoga na kulikangasha. Wamgambira ndiri muntu yoseri shintu, toziya watira nentu

9 Yesu pakazyukiti Jumapili mandawira putiputi, kalilanguziya kwanja kwa Mariya Magidalena, yomberi Yesu kaweriti kamlaviyiti washamshera saba. 10 Mariya Magidalena kagenda, kawagambira walii yawaweriti pamuhera na Yesu. Waweriti wankulira na kudaya. 11 Kumbiti pawapikaniriti handa Yesu mkomu na Mariya Magidalena kamwona, womberi wajimira ndiri.

12 Shapakanu Yesu kawalawiriti wafundwa wawili pakawera na sheni shingi. Wafundwa awa waweriti wankugenda kuvijiji. 13 Nawomberi viraa wawuya na kuwagambira wayawu. Pamuhera na hangu wajimira ndiri.

14 Upeleru Yesu kawalawiriti wafundwa lilongu na yumu pawaweriti pamuhera pashitalawanda. Kawakalipira nentu toziya ya kujimira ndiri kwawu na mtiti gwawu, mana wawajimira ndiri walii wawaweriti wamwona pakazyukiti kala. 15 Su, kawagambira, "Mgendi muisi zoseri mkabweri Shisoweru shiwagira kwa wantu woseri. 16 Yakajimira na kubatizwa hakalopoziwi. Yoseri yakajimira ndiri hakatozwi. 17 Walii yawajimira hawaweri na uwezu wakutenda mauzauza. Kwa litawu lyangu hawawusiyi washamshera na hawatakuli kwa likabira lyasyayi. 18 Pawakola njoka ama pawalanda shintu shoseri shana usungu, hapeni wayambuki. Hawawatuliri walweli mawoku, nawomberi hawaweri wakomu."

19 Su Mtuwa Yesu pakatakuliti kala nawomberi, kanyasulitwi kugenda kumpindi kwa Mlungu, kalivaga uwega wa kumliwu wa Mlungu. 20 Wafunda wagenda pahala poseri pawabwera. Mtuwa katenda lihengu pamuhera nawomberi na kukamaziya shawabwera kuwera sha nakaka na mauzauza gaweriti pamuhera nawomberi.