1 Pawaweriti wapakwegera na Yerusalemu wasokiti Betifagi na Betaniya, pakwegera na Lugongu lwa Mizeyituni, palii kawatuma wawili wa wafundwa wakuwi wawalongoleri, 2 kawagambira, "Mgendi mushijiji sha kulongolu kwenu. Payiwera mwakwingira amu, hamwoni mwana gwa punda wamtawa, mweni kenitenderwi na muntu. Mumyopoli mumjegi. 3 Handa muntu pakawakosiya, ‘Iwera hashi mtenda hangu?’ Mumgambiri, ‘Mtuwa kamfira na hakamwuziyi panu ulavinu.’ "

4 Su wagenda, wamwona mwana gwa punda mumbwega munjira wamtawa muligomi. Pawaweriti wankumyopola, 5 wantu wamu waweriti wagoloka palii wawakosiya, "Iwera hashi mwankumyopola punda ayu?"

6 Wafundwa wawankula ntambu Yesu yakawagambiriti, nawomberi wawaleka wagendi zawu. 7 Wamjegiriti Yesu mwana punda ayu. Wayazalira nguwu zawu pampindi pa mwana punda ulii na Yesu kakwena kalivaga pampindi pakuwi. 8 Wantu wavuwa wayazalira nguwu zawu munjira, wamonga wayazalira miputira ya mitera yawayidumuliti mumalambu. 9 Wantu woseri yawalongoleriti na yawafatiti, wanjiti kubotanga, "Kakwisuwi Mlungu! Katekelerwi ulii yakiza kwa litawu lya Mtuwa! 10 Utekelerwi ufalumi wiza wa tati gwetu Dawudi. Kakwisuwi Mlungu gwa kumpindi nentu!"

11 Yesu kingiriti lushi lwa Yerusalemu, kagenda Mnumba nkulu ya Mlungu, Kalola kila shintu weri. Kumbiti toziya iweriti kala pamihi, kagenda Betaniya pamuhera na wafundwa wakuwi lilongu na mbili.

12 Shirawu yakuwi, pawaweriti wankulawa Betaniya, Yesu keniti njala. 13 Su kwa kutali kaguwona mtera gwa mkuyu gwana mihamba ivuwa. Kagugendera kawoni handa guweriti na libwajubwaju loseri. Pakasokiti, kaguwoniti gwahera libwajubwaju lyoseri ira mihamba hera, toziya iweriti ndiri shaka sha mabwajubwaju. 14 Panu Yesu kagugambira mtera gwa mkuyu, "Kwanjira leru ata mashaka goseri muntu yoseri nakaliya mabwajubwaju kwaku!"

Na wafundwa wakuwi wapikaniriti visoweru avi.

15 Su wasokiti Yerusalemu. Yesu kingira Mnumba nkulu ya Mlungu kanja kuwawinga kunja wantu yawaweriti wankuwuza na kuhemera vintu. Kagalambuziya vintalawanda vyawaweriti wankuvunjira mpiya na vigoda vya walii yawaweriti wankushuuza wang'unda. 16 Kamlekeziyiti ndiri muntu yoseri kupitira paligomi lwa Numba nkulu ya Mlungu pakatola shintu. 17 Shakapanu kawafunda, "Ilembwa Mumalembu Mananagala, ‘Mlungu kalonga Numba yangu hawayishemi Numba ya kumluwa Mlungu kwa isi zoseri!’ Kumbiti muyitenda kuwera mpanga ya wakwepula!"

18 Watambika wakulu na wafunda wa Malagaliru pawapikaniriti aga, wanjiti kusakula njira ya kumlaga. Kumbiti wamtiriti toziya lipinga lya wantu lilikangashiti na mafundu gakuwi.

19 Paiweriti pamihi, Yesu na wafundwa wakuwi wawukiti mlushi.

20 Shirawu yakuwi mandawira pee, pawaweriti wankupita, waguwoniti mkuyu guliya gunyala goseri, kwanjira kumishigira mpaka kumihamba 21 Peteru kalihola visoweru vyakatakuliti Yesu, kamgambira, "Mfunda gulori! Mkuyu gulii gwagugupangiriti, gunyala!"

22 Yesu kawagambira, "Mumjimiri Mlungu." 23 "Nukugambirani nakaka, muntu pakalugambira lugongu alu, ‘Gutupuki gukalyasi mulitanda,’ pota na lyoga mumoyu mwakuwi, kumbiti kajimira kuwera vitwatira vyoseri vyakatakula vinyawiki, havimnyawikili. 24 Hangu nukugambirani, pamumluwa Mlungu shintu shoseri, mjimiri handa mshiyanka kala, namwenga hamshiyanki shintu shoseri shamuluwiti. 25 Pamgoloka kumluwa Mlungu, gumlekiziyi kila muntu yakakutenderani vidoda, su Tati gwenu kakumpindi hakawalekiziyi mwenga vidoda vyenu." 26 Kumbiti handa mwenga pamulekiziya ndiri, Tati gwenu gwa kumpindi hapeni kawalekiziyi mwenga vidoda vyenu.

27 Su wasoka kayi Yerusalemu. Yesu pakaweriti kankugendagenda Mnumba nkulu ya Mlungu, watambika wakulu na wafunda wa malagaliru na wazewi wamgendiriti, 28 wamkosiya, "Gwankutenda vitwatira avi kwa ukulu gaa? Gani yakakupananiti ukulu wa kutenda vitwatira avi?"

29 Kumbiti Yesu kawagambira, "Hanuwakosiyani shintu shimu, pamunankula, naneni vira hanuwagambirani kwa ukulu wa gaa nankutenda vitwatira avi. 30 Hashi, uwezu wa Yohani wa Mbatiza ulawa kumpindi kwa Mlungu ama ulawa kwa wantu? Munankuli."

31 Wanja kulitakuziya, "Patutakula, ‘Ulawiti kumpindi kwa Mlungu,’ hakatukosiyi, su iwera hashi munjimira ndiri?" 32 "Hapeni tutakuli ulawa kwa wantu, patutakula hangu tutira lipinga lya wantu toziya woseri wajimiriti handa Yohani kaweriti mbuyi gwa Mlungu nakaka." 33 Su, wamwankula Yesu, "Twenga tuvimana ndiri."

Yesu kawagambira, "Naneni vira hapeni nuwagambiri ntenda vitwatira avi kwa uwezu wa gaa."