1 "अदमड़ा ने वेवा नी करवा वारु से।" आहयी वात तमु लीखीन आपला से। 2 पण छीनाळा सी बचवा करीन आखा अदमड़ा नी लाडी रेवा जोवे, अने आखा बयरा नो लाडो रेवा जोवे। 3 लाडा ने आह़फा नी लाडी नी हेर पुरी करवा जोवे। अने लाडी ने आह़फा ना लाडा नी हेर पुरी करवा जोवे। 4 लाडा ने आह़फा ना डील पोर हक नी हय, पण लाडा ने लाडी ना डील पोर हक से; आहयी रीते लाडा ने बी आह़फा ना डील पोर हक नी हय, पण लाडी ने लाडा ना डील पोर हक से। 5 तमु एक-बीजा सी अलग ना रेवो; पण थोड़ीक टेम लग एक-बीजा नी मरजी सी भगवान सी वीन्‌ती करते लग छेटा रेवो। भगवान सी वीन्‌ती करीन अळी भेळा रेवो। आसम नी हयवा जोवे के तमने नी वेठावा सी भुतड़ो तमने पारखे।

6 मे जे की र्‌यो तीहयी छुट से हुकम नी हय, पण कदीम तमारी मरजी हय ता तमु वेवा कर सको। 7 मारी मरजी ते आहयी से के आखा माणहु मारीन तेम छड़ला रेवा जोवे, पण आखा ने मारीन तेम छड़ला नी रेवाये। काहाके भगवान काना ने वेवा करीन लाडा-लाडी बणीन रेवा नो वाटो आपे, अने काना ने वेवा कर्‌या वगर छड़ला रेवा नो वाटो आपे।

8 मे छड़ला अने रंडायला ने केम: कदीम तीहया मारीन तेवा रेय, ता आहयु घणु वारु से। 9 पण सवसार कर्‌या वगर नी रेवाये, ता तीमने वेवा कर लेवा वारु से; काहाके छीनाळु ना हयाळ्‌ळा बणवा सी वेवा कर लेवा वारु से।

10 ✝ 7:10 मत्‌ती 5:32; 19:9; मरकुस 10:11,12; लुका 16:18 जीमना वेवा हय ज्‌या तीमने हाव मारु आहयु केणु पड़े, आहयी वात मे मारो नी पण मालीक ईसु नो हुकम से के कानी बी लाडी आह़फा ना लाडा ने नी सोड़वा जोवे। 11 कदीम तीहयी आह़फी ना लाडा ने सोड़ी बी देय, ता तीने बीजो लाडो कर्‌या वगर रेवा जोवे। नीता पासी जीन आह़फी ना लाडा ह़ाते मेळ कर लेवा जोवे, एमेत कानो बी लाडो आह़फा नी लाडी ने नी सोड़वा जोवे।

12 बीजा माणहु ने मालीक ईसु नी, पण मेत केम: कदीम भरहो करन्‌या काना भाय पांह, ईसु पोर भरहो नी करवा वाळी लाडी हय, अने तीहयी तीनी ह़ाते रेवा करीन राजी हय, ता तीहयो तीने नी सोड़वा जोवे। 13 कदीम ईसु पोर भरहो करवा वाळी कानी बयर नो लाडो ईसु पोर भरहो नी करतो हय, अने तीहयो तीने राखवा करीन राजी हय, ता तीहयी ते लाडा ने नी सोड़वा जोवे। 14 काहाके जे ईसु पोर भरहो नी करे तीहयो लाडो, आह़फा नी लाडी नी लारे चोखो हय जाय, अने जे लाडी ईसु पोर भरहो नी करे, तीहयी आह़फा ना लाडा नी लारे चोखी हय जाय। कदीम ईसम नी रेतु ता तमारा सोरा-सोरी वीटळ्‌ळा हयता, पण तीहया हाव वीटळ्‌ळा नी पण चोखला से। 15 पण कदीम ईसु पोर भरहो नी करे तीहयो भाय नी ता बेनेह अलग हयवा हय ता अलग हय सके, आनी मे कंय बी रोको नी हय। पण भगवान आपणु ने अलग हयवा नी पण मेळीन रेवा करीन बणावलो से। 16 ए लाड्‌या, तमु आहयी वात जाणो ह़ु? के कंखर माय्‌न तमु तमारा लाडा ने बचाड़ लेहु? अने ए लाडा तमु आहयी वात जाणो ह़ु, के कंखर माय्‌न तमु तमारा लाड्‌या ने बचाड़ लेहु?

17 भगवान तीने जीसम रेवा करीन टाळलो से, तीने तेमेत रेवा जोवे; अने मे आखी मंडळी मे एमेत ह़ीकाड़ु। 18 जीने खतनु करलो बणावलो से, तीने खतनु करलोत रेवा जोवे: अने जे खतनु करलो नी बोलावलो से तीने खतनु करलो नी रेवा जोवे। 19 खतनु कराव्‌वा सी कंय फायदो नी हय, अने नी खतनु करलो रेवा सी बी कंय फायदो नी हय, पण भगवान नो हुकम पाळवा आखु कंय से। 20 जीने भगवान जीसम रेवा करीन टाळलो से, तेमेत रेवा जोवे। 21 कदीम भगवान तने गुलाम चाकर्‌यो से, तीहयी टेमे बोलायो हय ता फीकर ना करे, पण मोखो जड़े ता पावराय सोड़ दे। 22 काहाके मालीक नी लारे बोलाव्‌वा नी टेमे जे पावर्‌यो हतो, तीहयो भगवान नी नींगा मे गुलाम पावराय मे गेथो सुट्‌लो से। अने कदीम गुलाम पावराय मे गेथो सुट्‌लो बोलावलो हय ता तु मालीक ईसु मसी नो गुलाम पावर्‌यो से। 23 भगवान तमने दाम आपीन सोड़ाय लेदलो से। एतरे माणहु ना गुलाम ना बणो। 24 ए भायु अने बेन्‌या, जीसम जीव्‌वा करीन भगवान तमने टाळलो से, तेमेत तमु भगवान अगळ जीवो।

25 कुवारली ना बारा मे केवा करीन भगवान मने कंय बी हुकम नी आप्‌यो। पण ते बी भगवान नी गीण हात करलो से, अने भगवान ना भरहे तमने मार वगे गेथो केम।

26 मार वीच्‌यार सी हाव आहया काठला दाड़ा मे माणेह मारीन तेमेत रेवा जोवे। 27 कदीम तारी लाडी हय ता तीने सोड़वान हेर ना करे; अने कदीम तारी लाडी नी हय ता लाडी बणाव्‌वा नी हेर ना करे। 28 पण कदीम तु लाडी बी बणावे ता कंय पाप नी हय; अने कदीम छड़्‌ली सोरी वेवा करे ता कंय पाप नी करे; पण जे वेवा करहे तीमना डील मे दुख झेलवा पड़हे, अने मे तमने आहया दुख सी बचाड़वा हींड र्‌यो।

29 ए भायु, टेम थोड़ीक बच री एतरे, जीनी लाडी हय तीहयो ईसम रेवा जोवे, के तीनी लाडी नी हय। 30 अने रड़वा वाळा ने ईसम रड़वा जोवे के रड़ता नी हय; अने खुसी हयवा वाळा ने ईसम खुस हयवा जोवे के खुस नी हय, अने तीहया चीज वेचातु लेता हय, तीहया ईसम रेवा जोवे के तीमनी पांह कंय नी हय। 31 जे बी आहयी कळी नी चीज ने वापरे, तीहयो तीहयी चीज ने आसम ह़मजवा जोवे के आहयी चीज एक दाड़ो खत्‌तम हय जहे। काहाके आहयी कळ एक दाड़ो खत्‌तम हयवा वाळी से।

32 मारी आहयीत मरजी से के तमु बेफीकर्‌या रेवो। छड़लो माणेह आहयो वीच्‌यार करीन मालीक नी फीकर करे, के मे मालीक ने केम करीन खुस करु। 33 पण वेवा करलो माणेह आहयो वीच्‌यार करीन आहयी कळी नी वात नी फीकर करे के मे मारी लाडी ने केम करीन खुस करु। 34 ईसम करीन तीना वीच्‌यार वटाय जाय। अने आहयी छड़्‌ली से, तीहयी मालीक भगवान ने आसम वीच्‌यारीन फीकर करे, के मे मालीक ईसु वाटु डील मे अने जीव आत्‌मा मे चोखली रेम, पण जीनो लाडो से तीहयी आसम वीच्‌यारीन आहयी कळी नी वात नी फीकर करे के मे मारा लाडा ने केम खुस करु।

35 मे तमारा फायदा नी करते की र्‌यो, तमने फसाड़वा करीन नी केतो। पण जीसम तालेत हयवा जोवे करीन की र्‌यो, अने तमु एक-मन्‌या हय्‌न मालीक ईसु नी भक्‌ती पुरु मन लगाड़ीन करता रेवो।

36 कदीम कोय आहयु वीच्‌यार करे के मे मारी छड़्‌ली सोरी ना वेवा नी करावीन तीनो हक हापकी र्‌यो, ता जीसम तीनी मरजी हय तेमेत वेवा कर देवा जोवे। वेवा कराव्‌वा पाप नी हय। 37 कदीम तीहयो मन मे वात ठान लेदो हय, अने काठु मन कर लेदो हय के मे छड़्‌ली सोरी सी वेवा करे वगर रेही, ता तीहयो वारु कर र्‌यो। 38 एतरे जे छड़्‌ली सोरी ह़ाते वेवा कर लेय, ता तीहयो वारलु करे, अने जे तीहयी ह़ाते वेवा नी करे तीहयो अळी बी वारलुत करे।

39 जत्‌यार लग कानी बी बयर नो लाडो जीवत्‌लो रेय, तत्‌यार लग तीना जीवत्‌ला लाडा ह़ाते जोड़ायली रेय, पण कदीम तीहयो लाडो मर जाय, तत्‌यार तीहयी काना बी माणेह ह़ाते वेवा कर सके। पण मालीक ईसु ना नाता मे वेवा करवा जोवे। 40 पण कदीम तीहयी वेवा कर्‌या वगर रेय, ता जादा खुस रेहे, अने मे ईसम ह़मजु के भगवान नी आत्‌मा मारी मे बी से।