Êxodo 16

मन्‌ना अने लावरा

1 अळतेण आखा ईस्‌रायली माणहु एलीम गेथा नीकळीन, अने मीस्‌र मे गेथा नीकळवा ना बीजा मयना ना पंदरवा दाहड़े, सीन नाम ना जंगल मे, जे एलीम अने सीने बड़ा नी वच मे से, आय लाग्‌या। 2 ह़ुनह़ान जंगल मे ईस्‌रायलीम नी आखी मंडळी मुसा अने हारुन ना वीरोद मे बक-बक करवा बाज जी। 3 अने ईस्‌रायली माणहु तीमने केवा बाज ज्‌या, "जत्‌यार आमु मीस्‌र देस मे मांह ना हांडलान्‌तां बहीन मन गमतु खाणु खाता हता, ता कदीम आमु यहोवा भगवान ना हात सी मरी बी जता ता वारु तीहयुत रेतु; पण तमु आमने आहया जंगल मे आनीन करते नीकाळीन ली आवला से के आहया आखा माणहु ना टोळा ने भुकला मार नाखो।"✝16:3 गीनती 11:4; नीरगमन 14:12 4 ता यहोवा मुसा ने केदो, "देख, मे तमारी जुगु ह़रग मे गेथो खाणु नो पाणी पाड़ही; अने आहया माणहु दाड़ीन बाहर जाय्‌न दाड़ीन नु खाणु एकठु करहे, आनी सी मे तीमनी पारख करही के तीहया मारा नेम पोर चाले के नी।✝16:4 भजन सहीता 78:24; 105:40; वेवस्‌थावीवरन 8:2 5 अने आसम हयहे के छटवा दाड़े तीहयु खाणु बीजा दाड़ान करते डबल हय जहे, एतरे जे कंय तीहया ते दाड़े एक्‌ठु करे तीने तीहया तीयार कर राखे।" 6 करीन मुसो अने हारुन आखा ईस्‌रायली माणहु ने केदा, "ह़ांता तमु जाण लेहु के जे तमने मीस्‌र देस मे गेथो नीकाळीन ली आवलो से तीहयो यहोवा से, 7 अने ह़वारे वेगात तमने यहोवा नु वीजाळु देखाव पड़हे, काहाके तमु जे यहोवा भणी बक-बक कर र्‌या तीने तीहयो ह़मळ र्‌यो। आमु ह़ु से के तमु अमारी भणीन बक-बक कर र्‌या?" 8 जत्‌यार मुसो केदो, "आहयु तत्‌यार हयहे जत्‌यार यहोवा ह़ांतो तमने खावा करीन मांह अने ह़वारे आफरीन रोट्‌लो आपहे; काहाके जे तमु तीनी भणी बक-बक करो तीने तीहयो ह़मळलो से। आमु ह़ु से? तमारु बक-बक करनु अमारा वीरोद मे नी पण यहोवा ना वीरोद मे से।"✝16:8 लुका 10:16 9 अळतेण मुसो हारुन ने केदो, "ईस्‌रायली माणहु नी आखी मंडळी ने हुकम आप के यहोवा अगळ अने तीनी ह़ाते आवो, काहाके तीहयो तीमनु बक-बक करनु ह़मळलो से।" 10 जत्‌यार हारुन ईस्‌रायली माणहु नी मंडळी ह़ाते आसम वात करवात बाज र्‌यो हतो के उचकालेत तीहया जंगल भणी भाळ्‌या, अने तीमने यहोवा नु वीजाळु वादळु मे देखाव पड़्‌यु। 11 ता यहोवा मुसा ने केदो, 12 "मे ईस्‌रायली माणहु नु बक-बक करनु मे ह़मळलो से; दाड़ीक ह़ांत्‌ली टेमे तमु मांह खाहु अने ह़वारे तमु रोट्‌ला सी आफरी जहु; अने तमु आहयु जाण लेहु के मे तमारो भगवान यहोवा से।" 13 ता आसम हयु के ह़ांती टेमे लावरा आवीन आखा पड़ावा ने ढाक लेदा; अने ह़वारे पड़ावा नी च्‌यारो-मेर अळी झाकळु पड़्‌यु।✝16:13 गीनती 11:31 14 जत्‌यार झाकळु ह़ुक ज्‌यु ता ह़ुकला जागा पोर नान्‌ला-नान्‌ला छोलटा, पाला ह़रका टुकड़ा, देखाव पड़्‌या। 15 जत्‌यार ईस्‌रायली माणहु आहयु देख्‌या जे नी जाणता हता के आहयु ह़ु चीज से, ता मुसो तीमने केदो, "आहयी तीहयीत खावा नी चीज से जीने यहोवा तमने खावा करीन आपे।✝16:15 1 कुरन्‌थी 10:3 16 जे हुकम यहोवा आपलो से तीहयो आहयो से: तमु तीमनी मे गेथा आह़फाम नी जरवत नी अनसारे एक्‌ठा कर्‌या करजो, मतलब आह़फा-आह़फाम ना माणहु नी गीनती नी अनसारे, एक माणेह पछळ एक ओमेर*16:16 एक खास माप, एक कीला नी आड़े-धेड़े एक्‌ठा करजो; जीना तम्‌बु मे जेतरा हय तीहयो तीमनीत जुगु एक्‌ठा कर्‌या करे।" 17 अने ईस्‌रायली माणहु तेमेत कर्‌या; अने काना जादा, अने काना कम एक्‌ठा कर लेदा। 18 जत्‌यार तीहया तीने ओमेर ठाहरु सी माप्‌या, ता जीनी पांह जादा हता, तीनी पांह जादा नी नीकळ्‌या, अने जीनी पांह कम हता तीने कंय बी कम नी पड़्‌या।✝16:18 2 कुरन्‌थी 8:15 काहाके एक-एक माणेह आह़फाम नी जरवत नी अनसारे एक्‌ठा कर लेदला हता। 19 अळतेण मुसो तीमने केदो, "कोय बी माणेह आनी मे गेथा ह़वारे तक नी राखजो।" 20 पण ते बी तीहया मुसा नी वात नी मान्‌या; एतरे जत्‌यार काना-काना माणहु तीमनी माय्‌न थोड़ाक ह़वारे तक राख्‌या, ता तीमनी मे कीड़ा पड़ ज्‌या अने तीहया गंदायवा बाज ज्‌या; ता मुसो तीमनी पोर खीजवाय पड़्‌यो। 21 तीहया ह़वारे दाड़ीन आह़फाम नी जरवत नी अनसारे खावा करीन एक्‌ठा कर लेता हता, अने जत्‌यार घण जबर दाड़ु नो ह़ेक लागतो हतो, ता तीहया ओगळी जता हता। 22 अळतेण आसम हयु के छटवा दाड़े तीहया बे गुणा, मतलब एक-एक पसळ बे-बे ओमेर एक्‌ठा कर लेदा, अने मंडळी ना मुख्‌या आवीन मुसा ने की देदा। 23 ता मुसो तीमने केदो, "यहोवा आसम केय, के वाहणे चोखलो अराम, मतलब यहोवा नी लेदे चोखलो अराम नो दाड़ो से।✝16:23 नीरगमन 20:8 एतरे तमने जेतरु रांदवा लागे ते रांदो, अने जे ह़ीजाड़वा लागे ते ह़ीजाड़ो, अने तीनी मे गेथु जेतरु बचे तेतरु ह़वारे जुगु मेक लेवो।" 24 जत्‌यार तीहया तीने मुसा ना हुकम नी अनसारे ह़वारे तक मेक र्‌या, ता नी ते ह़ीतायु अने नी तीनी मे कीड़ा पड़्‌या। 25 ता मुसो केदो, "आज हीनेत खावो, काहाके आज यहोवा नो अराम नो दाड़ो से; करीन आज तमने तीहयु मयदान मे नी जड़े। 26 छोव दाहड़ा मे तमु एक्‌ठा कर्‌या करहु; पण ह़ातवो अराम नो दाड़ो से, तीहया दाड़े तमने तीहयु नी जड़े।" 27 ते बी माणहु मे गेथा कोय-कोय ह़ातवा दाड़े बी एक्‌ठु करवा करीन बाहर ज्‌या, पण तीमने कंय बी नी जड़्‌यु। 28 ता यहोवा मुसा ने केदो, "तमु मारा हुकम ने अने नेम ने कारु तक नी मानो? 29 देखो, यहोवा तमने जे अराम नो दाड़ो आपलो से, करीनेत तीहयो छटवा दाहड़े तमने बे दाड़ा नु खाणु आपे; एतरे तमु आह़फा-आह़फाम ने तां बह रेजो, ह़ातवा दाहड़े कोय बी आह़फाम ना जागे गेथा बारा नी जजो।" 30 करीन माणहु ह़ातवा दाड़े अराम कर्‌या। 31 ईस्‌रायली ना घोराणा तीहयी खावा नी चीज नु नाम मन्‌ना पाड़्‌या; अने तीहया धाणा बराबर हता अने धोळ्‌ळा बीज ह़रका हता, अने तीनो ह़वाद मोद वेर बणला चांत्‌या ह़रको हतो।✝16:31 गीनती 11:7 32 अळतेण मुसो केदो, "यहोवा भगवान जे हुकम आप्‌यो तीहयो आहयो से के आनी मे गेथा एक ओमेर भरीन मन्‌ना, आपणा घोराणा नी पीड़ी जुगु मेक लेवो, जीनी सी तीहया जाणे के यहोवा आमु ने मीस्‌र देस गेथा नीकाळीन जंगल मे केवा रोट्‌ला खवाड़तो हतो।" 33 ता मुसो हारुन ने केदो, "एक हांड‌लु लीन तीनी मे एक ओमेर नी बराबर लीन तीने यहोवा अगळ मेक दे के तीहयो तमारी पीड़ी जुगु मेकलु रेय।"✝16:33 ईब्‌रानीयो 9:4 34 अने जेवो हुकम यहोवा मुसा ने अने हारुन ने आपलो हतो, तीनीत अनसारे हारुन तीने वायदा ना बाक्‌सा अगळ मेक देदो के तीहया तांत मेकला रेय। 35 जत्‌यार तक ईस्‌रायली माणहु तीहया देस नी पुग ज्‌या, तांह तक चाळीह साल तक मन्‌ना खाता र्‌या, कनान देस नी काकड़ पोर पुगते तक ईस्‌रायली माणहु मन्‌नात खाता र्‌या।✝16:35 यहोसु 5:12 36 एक ओमेर ते एपा*16:36 एक खास माप, दह कीला नी आड़े-धेड़े नो दसवो वाटो से।