1 जत्‌यार मुसा नो ह़ाह़रो मीद्‌यान देस नो पुंजारो यीत्‌रो आहयु ह़मळ्‌यो के भगवान मुसा अने आह़फा ना माणहु ईस्‌रायली जुगु ह़ु-ह़ु करलो से, मतलब आहयु के कानी रीते तीहयो ईस्‌रायली माणहु ने मीस्‌र मे गेथा नीकाळ लायो, 2 ता मुसा नो ह़ाह़रो यीत्‌रो मुसा नी लाडी सीप्‌पोरा ने, जीने मुसो पेलेत तीना बाह ना घोर मोकल देदलो हतो, 3 तीने अने तीना बेम सोरा ने बी लीन आयो; ईमनी मे गेथा एक जणा नु नाम मुसो आहयु कीन गेर्‌सो‌म पाड़लो हतो: "मे बीजा देस मे रेण्‌यो से।"✝18:3 नीरगमन 2:21-22; नेवताळा ना काम 7:29 4 अने बीजा नु नाम तीहयो आहयु कीन एलीएजार*18:4 मतलब भगवान मारो मदत करन्‌यो से पाड़्‌यो: "मारा बाह नो भगवान मारो मदत करवा वाळो बणीन मने फीरोन नी तलवार सी बचाड़लो से।" 5 मुसा नी लाडी अने तीना सोरा ने, तीनो ह़ाह़रो यीत्‌रो ह़ाते लीन मुसान्‌तां जंगल मे तीहया जागे आयो, जां ह़ारीक भगवान ना बड़ा धेड़े तीनो पड़ावो हतो। 6 अने आवीन तीहयो मुसान्‌तां आहयु की मोकल्‌यो, "मे तारो ह़ाह़रो यीत्‌रो से, अने बेम सोरा भेळ तारी लाडी ने तारीन्‌तां ली आवलो से।" 7 ता मुसो आह़फा ना ह़ाह़रा ने भेटवा करीन नीकळ्‌यो, अने तीने वांदीन तीने गोळो देदो; अने तीहया एक-बीजा ने वारला से के पुसता जाय्‌न तम्‌बु मे आया। 8 तां मुसो आह़फा ना ह़ाह़रा ने तीहया काम ना बारा मे देखाड़्‌यो के यहोवा ईस्‌रायली माणहु जुगु अने फीरोन अने मीस्‌री माणहु ने ह़ु-ह़ु दुख आपलो, अने ईस्‌रायली वाटे ह़ु-ह़ु दुख झेलला, अळतेण यहोवा तीमने कीकम-कीकम छोड़ावतो आवलो। 9 ता यीत्‌रो आखी तीहयी भलाय ना कारण जे यहोवा ईस्‌रायली माणहु ह़ाते करलो, के तीमने मीस्‌री माणहु ना हक मे गेथो छोड़ावलो, खुस हयो, 10 अने केदो, "जुगाळो से यहोवा, जे तमने फीरोन अने मीस्‌री माणहु ना हात मे गेथो छोड़ायो, जे तमने मीस्‌री माणहु नी गुलामी मे गेथो छोड़ावलो से। 11 हाव मे जाण लेदलो से के यहोवा आखा देवताम नी गेथो मोटो से; अने तीना बारा मे बी जीनी सी तीहया ईस्‌रायली माणहु ह़ाते गलत वेहवार करला हता।" 12 ता मुसा नो ह़ाह़रो यीत्‌रो भगवान जुगु होम बादा अने मेलबादा चड़ायो, अने हारुन ईस्‌रायल ना आखा डायला भेळ मुसा ना ह़ाह़रा यीत्‌रो ह़ाते भगवान अगळ खाणु खावा करीन आयो।

13 बीजा दाहड़े मुसो माणहु नो नीयाव करवा करीन बठ्‌यो, अने ह़वारे गेथा ह़ांता तक माणहु मुसा नी आड़े-धेड़े उबा र्‌या। 14 आहयु देखीन के मुसो माणहु नो नीयाव करे, तीनो ह़ाह़रो केदो, "आहयु ह़ु काम से जे तु माणहु जुगु करे? ह़ु कारण से के तु एखलो बह र्‌यो, अने माणहु ह़वारे गेथा ह़ांता तक तारी आड़े-धेड़े उबा रेय?" 15 मुसो आह़फा ना ह़ाह़रा ने केदो, "आनो कारण आहयो से के माणहु मारीन्‌तां भगवान नी मरजी ह़ु से पुछवा करीन आवत्‌ला। 16 जत्‌यार-जत्‌यार ईमनो मुकदमो हये तत्‌यार-तत्‌यार तीहया मारीन्‌तां आवे, अने मे ईमनी वच मे नीयाव करु, अने भगवान नी रीती अने नेम ईमने ह़मजाड़ु।" 17 मुसा नो ह़ाह़रो तीने केदो, "जे काम तु करे तीहयु वारु नी हय। 18 तु अने तारा माणहु आनी सी थाकी-थाकी जहु, काहाके आहयु काम तारी जुगु घणु भारी से; तु आने एखलो नी कर सकतो।✝18:18 गीनती 11:14; वेवस्‌थावीवरन 1:9 19 एतरे हाव तु मारी वात ह़मळ ले, मे तने ह़ला आपु, भगवान तारी ह़ाते रेय! तु आहया माणहु जुगु भगवान अगळ जीया करजे, अने आमना मुकदमा ने भगवान ने तां पुगाड़ दीया करजे। 20 तु आमने भगवान नी रीती अने नेम देखाड़ीन, जे वाटे आमने चालवा, अने जे-जे काम आमने करवा जोवे, तीहया आमने देखाड़ दीया कर। 21 पण तु ईस्‌रायल ना आखा माणहु ने टाळ ले, जे लायक से, जे भगवान नी बीक मानन्‌या अने खरला अने बुराय ना फायदा सी ह़ीगी करवा वाळा हय तीमने टाळ ले, अने एवा माणहु ने हजार-हजार, ह़ो-ह़ो, अने दह-दह माणहु ना टोळा पोर नीयाव करन्‌या टाळ दे। 22 अने तीहया आखी टेमे आहया माणहु नो नीयाव कर्‌या करे; अने आखी मोटा-मोटा मुकदमा ने तारीन्‌तां लाया करे, अने नान्‌ला-नान्‌ला मुकदमा नो नीयाव आह़फात कर लेय; ता तारो बोज हळको हयहे, काहाके आहया बोज ने तीहया बी तारी ह़ाते उचलहे। 23 कदीम तु आसम करही, अने भगवान आसम हुकम आपे ता तु टेकलो रेही, अने आहया आखा माणहु आह़फाम ना जागे सांती सी पुग सकहु।"

24 करीन आह़फा ना ह़ाह़रा नी आहयी वात मानीन मुसो तीनीन तेमेत कर्‌यो। 25 मुसो आखा ईस्‌रायली माणहु मे गेथा काम ना लायक माणहु ने टाळीन तीमने हजार-हजार, ह़ो-ह़ो, पचाह-पचाह अने दह-दह माणहु पोर अदीकारी ठेरायो। 26 अने तीहया आखा माणहु नो नीयाव करवा बाज ज्‌या; अने जे मुकदमो काठो रेय तीने मुसान्‌तां ली आवता हता, अने आखा नान्‌ला मुकदमा नो नीयाव तीहया आह़फात करता हता। 27 ता मुसो आह़फा ना ह़ाह़रा ने वळाय देदो, अने तीहयो आह़फा ना देस नी वाटे चाल पड़्‌यो।