1 "अळतेण जे नेम तने तीमने ह़मजाड़वा ना से तीहया आहया से: 2 जत्‌यार तमु कोय बी ईब्‌रानी जाती नो पावर्‌यो वेचातो लेवो, ता तीहयो छो साल तक सेवा करहे, अने ह़ातवा साल कीमत आप्‌या वगर छुटीन जाय सकहे। 3 कदीम तीहयो वेवा कर्‌या वगर आवलो हय ता वेवा कर्‌या वगरेत छुटीन जत रेय; अने कदीम तीनी ह़ाते तीनी लाडी बी आयी हय, ता तीनी ह़ाते तीनी लाडी बी जत रेय। 4 कदीम तीनो मालीक तीने लाडी आप्‌यो हय अने तीनी सी तीना सोरा-सोरी पयदा हया हय, ता तीनी लाडी अने सोरा तीहया मालीकनात रेय, अने तीहयो एखलो जत रेय।✝21:4 लेव्‌यवेवस्‌था 25:44 5 पण कदीम तीहयो चाकर्‌यो हीम्‌मत सी केय, मे मारा मालीक, अने लाडी, अने सोरा ह़ाते मोंग करु; एतरे मे छुटीन नी जाम, 6 ता तीनो मालीक तीने भगवान ने तां ली जाय; अळतेण तीने झापला ना डेहळ ने तां ली जाय्‌न तीना कान्‌टे ह़ोय वेर कोरे; ता तीहयो तीनी सदा सेवा करतो रेय।

7 "कदीम कोय आह़फा नी सोरी ने पावर्‌याण ना रुप मे वेच देय, ता तीहयी पावर्‌याण तेम छुटीन बाहर नी जाय सके। 8 कदीम तीनो मालीक तीने आह़फा नी लाडी बणावे, अने अळतेण तीनी सी खुस नी रेय, ता तीहयो तीनी कीमत लीन छोड़ देय; तीने धोको देवान अळतेण तीने बीजा देस वाळा ना हात मे वेचवा नो तीने हक नी रेय। 9 कदीम तीहयो तीनी ह़ाते तीना सोरा ना वेवा कर देदो हय, ता तीनी ह़ाते सोरीन तेम वेहवार करे। 10 भले तीहयो बीजी लाडी ली आवे, ते बी तीहयो तीनु खाणु, लुगड़ा अने मेळ तीनी ह़ाते कम नी करे। 11 अने कदीम तीहयो आहयी तीन वात मे कमी करे, ता तीहयी बयर कीमत आप्‌या वगर जत रेय।

12 "जे कोय माणेह ने आसम देय के तीहयो मर जाय, ता नक्‌खी तीने बी मोत नो डंड आपे।✝21:12 लेव्‌यवेवस्‌था 24:17 13 कदीम तीहयो तीने मारवा नु नी कर्‌यो हय, अने भगवान नी मरजी सीत तीना हात मे आय ज्‌यो हय, ता एवा मारवा वाळा ना नाहवा जुगु मे एक जागो ठेरावही जां तीहयो नाह जाय।✝21:13 वेवस्‌थावीवरन 19:4-5 14 पण कदीम कोय जाण बुजीन तीने धोका सी मारे, ता तीने मारवा मारी वेदीन्‌तां गेथा बी अलग लीज्‌जो।✝21:14 1 राजा 2:28

15 "जे आह़फा ना आय्‌ह-बाहा ने ठोके तीने नक्‌खी मार देवा जोवे।

16 "जे कोय काना माणेह ने चोरी कर लेय, भले तीने ली जाय्‌न वेच देय, नीता तीनीन्‌तां जड़े, ता तीने बी नक्‌खी मार देवा जोवे।✝21:16 वेवस्‌थावीवरन 24:7

17 "अने जे आह़फा ना आय्‌ह-बाहा ने सराप देय तीने बी नक्‌खी मार देवा जोवे।✝21:17 लेव्‌यवेवस्‌था 20:9; मत्‌ती 15:4

18 "कदीम माणहु झुमाय, अने एक बीजा ने दगड़ा वेर नीता ढीक वेर आसम देय के तीहयो मरे नी पण खाट्‌ला मे पड़ जाय, 19 ता जत्‌यार तीहयो उठीन लाकड़ी ना टेके बाहर चालवा फीरवा बाज जाय, ता तीहयो देवा वाळो वण-गुनाळ्‌ळो ठेरे; अने देवा वाळो, तीनी तीहयी हालत मे जे तीहयो पड़ रेलो हतो तीनो घाटो भर देय, अने तीने वारलो आरगो बी कर देय।

20 "कदीम कोय आह़फा ना पावर ने नीता पावर्‌याण ने लाकड़ी वेर आसम देय के तीमने ठोकवा सी मर जाय, ता तीने नक्‌खी डंड आपवा जोवे। 21 पण कदीम तीहया एक नीता बे दाड़ा जीवत्‌ला रेय, ता तीमना मालीक ने डंड नी आपवा जोवे; काहाके तीहया पावर्‌या तीनु धन से।

22 "कदीम माणेह आह़फा-आह़फात झगड़ो करीन ठोकाय, अने कानी भारेपोगे बयर ने आसम लाग जाय के तीनु सोरु पड़ जाय, पण अळी कंय नुकसान नी हये, ता देवा वाळा पांह एतरोत डंड लेवा जोवे जेतरो तीहयी बयर नो घोरवाळो पंचु अगळ ठेरावे। 23 पण कदीम तीने जादा नुकसान हये, ता जीव ना बदले जीव, 24 अने डोळा ना बदले डोळो, अने दात ना बदले दात, अने हात ना बदले हात, अने पोग ना बदले पोग,✝21:24 लेव्‌यवेवस्‌था 24:19,20; वेवस्‌थावीवरन 19:21; मत्‌ती 5:38 25 अने डाग ना बदले डाग, अने घाव ना बदले घाव, अने मार ना बदले मार नो डंड रेवा जोवे।

26 "जत्‌यार कोय आह़फा ना पावर नीता पावर्‌याण ना डोळे आसम देय के फुट जाय, ता तीहयो तीना डोळा ना बदले तीने पवराय सी छुटीन जवा देय। 27 अने कदीम कोय आह़फा ना पावर ने नीता पावर्‌याण ने दीन तीनो दात भांग देय, ता तीहयो तीना दात ना बदले तीने पवराय सी छुटीन जवा देय।

28 "कदीम बोळद्‌यो काना माणेह ने नीता बयर ने आसम ह़ींगड़ु लगाड़े के तीहया मर जाय, ता तीहया बोळद्‌या ने बी नक्‌खी दगड़ाटीन मार देवा जोवे, अने तीनु मांह नी खावा जोवे; पण बोळद्‌या नो मालीक वण-गुनाळ्‌ळो ठेरे। 29 पण कदीम तीहया बोळद्‌या नी पेले गेथी मारवा नी आदत पड़ली हय, अने तीना मालीक ने की देवा पोर बी बांदीन नी राख्‌यो हय, अने तीहयो काना अदमी ने नीता बयर ने मार नाखे, ता ते तीहया बोळद्‌या ने बी दगड़ाटीन मार देवा जोवे, अने तीना मालीक ने बी मार देवा जोवे। 30 पण कदीम तीनी पोर छुटवा जुगु गुनो मेके, ता जीव छोड़ाव्‌वा करीन जे कीमत तीनी जुगु ठेरावे तीने तेतरु आपवात पड़हे। 31 भले बोळद्‌यो काना सोरा ने, नीता सोरी ने मार्‌यो हय, ते बी आहयात नेम नी अनसारे तीना मालीक ह़ाते वेहवार करे। 32 अने कदीम बोळद्‌यो काना पावर ने नीता पावर्‌याण ने ह़ींगड़ु लगाड़्‌यो हय, ता बोळद्‌या नो मालीक तीहया पावर्‌या ना मालीक ने तीस चांदी ना सीक्‌का आपे, अने तीहया बोळद्‌या ने दगड़ाटीन मार नाखे।

33 "अने कदीम कानु माणेह खाडो उगड़लो रेवा देय, नीता खोदीन तीने नी ढाके, अने तीनी मे कानो बोळद्‌यो नीता गदड़ु पड़ जाय, 34 ता जीनो तीहयो खाडो हय तीहयो नुकसान भर देय; तीहयो जानवर ना मालीक ने तीनी कीमत आप देय, अने तीहयु जानवर तीहया खाडा वाळा नु ठेरे। 35 कदीम काना माणेह नो बोळद्‌यो बीजा ना बोळद्‌या ने आसम मारे के तीहयो मर जाय, ता तीहया बेम माणहु तीहया जीवत्‌ला बोळद्‌या ने वेचीन तीना पय्‌हा आदा-आदा वाट लेय; अने तीहयु मरलु जानवर ने बी तेमेत वाट लेय। 36 कदीम आहयु मालम पड़े के तीहया बोळद्‌या नी पेले गेथी मारवा नी आदत पड़ली हती, पण तीनो मालीक तीने बांदीन नी राख्‌यो, ता नक्‌खी तीहयो बोळद्‌या ना बदले बोळद्‌यो आप देय, पण तीहयु मरलु जानवर तीनुत ठेरे।