3 तत्‌यार अब्‌राम मोडा ना भरहे पड़्‌यो अने भगवान तीनी सी आहयी वात करतो ज्‌यो, 4 "देख, मारो वायदो तारी ह़ाते बांदलो रेहे, एतरे तु राज्‌य ना टोळा नो मुख्‌यो बाह हय जही। 5 एतरे हाव सी तारु नाम अब्‌राम नी रेय पण तारु नाम अब्‌राहम रेहे, काहाके मे तने राज्‌य ना टोळा नो मुख्‌यो बाह बणाय देदलो से।✝17:5 रोमीयो 4:17 6 मे तने ढेरेत फोळ वाळो करही, अने तने राज्‌य-राज्‌य नो मुख्‌यो बणाय देही, अळी तारी अवल्‌यात मे राजा पयदा हयहे।

7 "अने मे तारी ह़ाते, अने तारीन अळतेण पीड़ी-पीड़ी तक तारी अवल्‌यात नी ह़ाते बी आहया मरजी सी के हमेसा-हमेसा नी वायदो बांदु, के तारी अने तारीन अळतेण तारी अवल्‌यात नो बी भगवान रेही।✝17:7 लुका 1:55 8 अने मे तने, अने तारीन अळतेण तारी अवल्‌यात ने बी, आहयु आखु कनान देस, जीनी मे तु अंजाणलो हय्‌न रेय, आहयी रीती सी आपही के तीहयी हमेसा-हमेसा तीमनी आह़फी जागा रेहे, अने मे तीमनो भगवान रेही।" ✝17:8 नेवताळा ना काम 7:5

9 अळतेण भगवान अब्‌राहम ने केदो, "तु बी मारी ह़ाते करला वायदा ने पाळजे; तु अने तारीन अळतेण तारी अवल्‌यात बी आपणी-आपणी पीड़ी मे तीने पाळ्‌या करे। 10 मारी ह़ाते करलो वायदो, जीने पाळवा तने अने तारीन अळतेण तारी अवल्‌यात ने पड़हे, तीहयो आहयो से: तमारी मे सी एक-एक अदमी नु खतनु हये।✝17:10 रोमीयो 4:11; नेवताळा ना काम 7:8 11 तमु आपणी-आपणी फतरी नु खतनु कर लेजो: जे वायदो मारी अने तमारी वचमे से, तीनी आहयी सेलाणी हयहे।