नहेम्याह 13

विदेसियन से अलग होनो

1 बहै दिन मूसा की किताब लोगन कै पढ़कै सुनाए दई; और बामै जौ लिखो भौ मिलो, कि कोई अम्मोनी और मोआबी लोग परमेस्वर की सभा मैं नाय आनो चाहिए।*13:1 व्यवस्थाविवरड़ 23:3-5; 2 काहैकि बे अन्न जल लैकै इस्राएली लोगन से भेंट नाय करीं, फिर बिलाम कै बे स्राप देन के ताहीं भेंट दैकै बुलबाईं रहैं- तौ भी हमरे परमेस्वर बौ स्राप कै आसीस मैं बदल दई।*13:2 गिनती 22:1-6 3 जौ व्यवस्था सुनकै, बे इस्राएली लोगन कै दुसरे देस के लोगन से अलग कर दई।

नहेम्याह को सुधार

4 जासे पहले एल्यासीब पुजारी जो हमरे परमेस्वर के भवन की कुठरियन को अधिकारी और तोबियाह को सम्बंधी रहै। 5 बौ तोबियाह के ताहीं एक बड़ी कुठरिया तैयार करी रहै जोमैं पहले अन्नबलि को सामान और लोबान और बर्तन और अनाज, नया दाखमधु और टटके तेल के दसमांस, जिनकै लेवियन, गवईयन और द्वारपालन कै देन की आग्या रहै, रखी भई रहै; और पुजारियन के ताहीं उठी भई भेंट*13:5 पुजारी के लिये उठाई हुई भेंट। पुरोहितन के निर्वाह हेतु नियुक्त भेंटन का अंस। भी रखी जात रहै। 6 मैं बौ समय यरूसलेम मै नाय रहौं, काहैकि बेबीलोन को राजा अर्तछत्र के बत्तीसमें साल मै मैं राजा के झोने चले गौ। फिर कितने दिनन के बाद राजा से छुट्टी लैकै बापस आओ 7 फिर मैं यरूसलेम आएकै, तब मैं जान लौ, कि एल्यासीब तोबियाह के ताहीं परमेस्वर के भवन के आँगन मैं की जघा मैं एक कुठरिया तैयार करकै, का बुराई करे हैं। 8 मैं बड़ा गुस्सा ही गौ, और तोबियाह को पूरो घर को सामान बौ कुठरिया मैं से फेंक दई और खाली करबाए दौ। 9 तब मेरी आग्या से बे कुठरियन कै सुद्ध करो गौ, और मैं परमेस्वर के भवन के बर्तन और भेंट को सामान और लोबान बामैं फिर से रखबाए दौ।

10 फिर मोकै पता चलो कि लेवियन को भाग उनकै नाय दौ गौ है; और जाके काम करनबारे लेवी और गवैये अपने-अपने खेत कै भाज गै हैं। 11 तब मैं अधिकारियन कै लक्कार कै कहो, "परमेस्वर को भवन काहे त्यागो गौ रहै?" फिर मैं उनको इकट्टो करकै*13:11मैं उनको इकट्ठा करकै: नहेम्याह ने लेवी को उनके स्थानों से बुलाया और अपनी-अपनी सेवा मैं उनको पुनर्स्थापन किया।, एक-एक कै बाके जघा मै नियुक्त करी। 12 तब से सब यहूदी अनाज, नया दाखमधु और टटके तेल के दसमांस भंडार मै लान लगे। 13 मैं भंडारन के अधिकारी सेलेम्याह पुजारी और सादोक मुंसी कै, और लेवियन मै से पदायाह को, और उनके नीचे हानान को, जो मत्तन्याह को पोता और जक्कूर को लौड़ा रहै, नियुक्त करी; बे तौ विस्वासयोग्य गिने जात रहैं, और अपने भईय्यन के मध्य बाँटनो उनको काम रहै।

14 हे मेरो परमेस्वर! मेरो जौ काम मेरे प्रेम के ताहीं याद रख, और जो-जो सुकर्म मैं अपने परमेस्वर के भवन के ताहीं, तेरे भवन की आराधना के ताहीं करी है, उनकै मत भूलिये।

15 बे दिनन मै मैं यहूदा मै भौतन कै देखो जो विस्राम दिन कै हौदिया मैं दाख रौंदते, और पूलियन कै लै आते, और गधन मैं लादत रहैं; बैसिये बे दाखमधु, दाख, अंजीर और बड़ा प्रकार के बोझ विस्रामदिन कै यरूसलेम मै लात रहैं; तौ जो दिन बे खान की चीज बेचत रहैं, बहै दिन मैं उनकै चिताए दौ। 16 फिर बामैं सोर देस के लोग रहकै मच्छी और निरे तराहनी को सामान लाएकै, यहूदियन के हात यरूसलेम मै विस्राम दिन कै बेचे करत रहैं। 17 तब मैं यहूदा के नेतन कै डाँटकै कहो, "तुम लोग जौ का बुराई करत हौ, जौ विस्राम दिन कै अपवित्र करथौ? 18 का तुमरे पुरखा ऐसो नाय करत रहैं? और का हमरे परमेस्वर जौ सब विपत्ति हमैं और जौ नगर मै नाय डारी? तौ भी तुम विस्राम दिन कै अपवित्र करन से इस्राएल मै परमेस्वर को गुस्सा और भी भड़कात जात हौ।"

19 फिर जब विस्राम दिन के पहले दिन कै यरूसलेम के फाटकन के आस-पास अंधियारो होन लगो, तब मैं आग्या दौ, कि उनके पल्ला बन्द करे जामैं, और जौ भी आग्या दई, कि बे विस्रामदिन के पूरे होन तक खोले नाय जामैं। तौ मैं अपने कुछ सेवकन को फाटकन को अधिकारी ठहराए दई, कि विस्रामदिन कै कोई बोझ भीतर आए नाय पाए। 20 तभई व्यापारी और बड़ा प्रकार के सौदा कै बेचनबारे यरूसलेम दीबार के बाहर एक दुई बार रात मैं डेरा डारीं। 21 तब मैं उनकै चिताएकै कहो, "तुम लोग दीबार के अग्गू रात काहे बिताए रहे हौ? अगर तुम फिर ऐसो करैगे तौ मैं तुमरे ऊपर हात बढ़ाँगों।" तभई बौ समय से बे फिर विस्राम बार कै नाय आए। 22 तब मैं लेवियन कै आग्या दौ, कि अपने-अपने कै सुद्ध करकै फाटकन की रखबारी करन के ताहीं आए करौ, ताकि विस्राम दिन पवित्र मानो जाए। हे मेरे परमेस्वर! मेरे हित के ताहीं जौ भी याद रख और अपनी बड़ी करूड़ा के जैसे मेरे ऊपर तरस खा।

23 फिर बे दिनन मैं मोकै ऐसे यहूदी लोग दिखाई पड़े, जो असदोदी, अम्मोनी और मोआबी देस की बईंय्यरन कै बिहा लाईं। 24 उनके बालकन की आधी बोली असदोदी रहै, और बे यहूदी बोली न बोल सकत रहैं, हर एक अपनी कोम की भासा बोलत रहैं। 25 तब मैं उनकै डाँटो और कोसो, और बामैं से कुछ कै पिटबाए दौ और उनके बार नुचवाए; और उनके परमेस्वर की जौ सपथ खबाईं, "हम अपनी लौड़ियन उनके लौड़न के संग बिहा मैं न देंगे और न अपने ताहीं और अपने बालकन के ताहीं उनकी लौड़ियन कै बिहा मैं लेंगे। 26 का इस्राएल को राजा सुलेमान जौ प्रकार के पाप मैं नाय फसो रहै? बहोत जातियन मैं बाके जैसी कोई राजा नाय भौ, और बौ अपने परमेस्वर को प्यारो भी रहै, और परमेस्वर बौ सब इस्राएल के ऊपर राजा नियुक्त करी; फिर बाकै भी गैरयहूदी बईंय्यरन बाकै पाप मैं फसाईं। 27 तौ का हम तुमरी सुनकै, ऐसी बड़ी बुराई करैं कि गैरयहूदी की बईंय्यरन से बिहा करकै अपने परमेस्वर के खिलाप विस्वासघात करैं?"

28 और एल्यासीब बड़ो पुजारी के लौड़ा योयादा को एक लौड़ा, होरोनी सम्बल्लत को दमदा रहै, तभई मैं बाकै अपने झोने से भजाए दौ। 29 हे मेरे परमेस्वर, उनकै याद रख, काहैकि बे पुजारी पद और पुजारी और लेवियन की वाचा कै असुद्ध करी है।

30 जौ प्रकार मैं उनके सब गैरयहूदिन से सुद्ध करी, और एक-एक पुजारी और लेवी की बारी और काम कै ठहराए दई। 31 फिर मैं कठिया की भेंट लै आन के खास समय कै ठहराए दै, और पहली उपज कै देन को बंदोबस्त भी करे। हे मेरे परमेस्वर! मेरे हित के ताहीं मोकै याद रख।