नहेम्याह 5

गरीबन के ऊपर नहेम्याह की मदत

1 तौ लोग और उनकी बईंय्यरन के घाँईं से उनके भईय्या यहूदियन के खिलाप बड़ी चिल्लाहट मची। 2 कुछ तौ कहत रहैं, "हम अपने लौड़ा - लौड़ियन समेत भौत प्राड़ी हैं, जौ बजह से हमैं अन्न मिलनो चाहिए कि बाकै खाएकै जिंदे रहमैं।"

3 "कुछ कहत रहैं, हम अपने खेतन, दाख की बारिन और घरन कै अकाल के बजे से गिरमी रखथैं, कि हमैं अन्न मिलै।"

4 फिर कुछ जौ कहथैं, "हम राजा के चुंगी के ताहीं अपने-अपने खेतन और दाख मधु की बारिन कै गिरवी रखकै, रुपईया उधार लै।" 5 पर हमरे और हमरे भईय्यन के सरीर और हमरे और उनके बालका एक जैसी हैं, तहुँओं हम अपने लौड़ा-लौड़ियन कै बेच दै हैं; बल्किन हमरी कोई लौड़िया दासी भी हुई चुकी है; और हमरो कछु बस ना चलथै, काहैकि हमरे खेत और दाख की बारी दूसरे के हात पड़ी हैं।

6 जब मैं बाकी सिकायत सुनो तौ मोकै भौत गुस्सा आई। 7 तौ अपने मन मैं सोच बिचार करकै, मैं नेता कै और अधिकारी कै घुड़कै कहो, "तुम अपने-अपने भईय्या से ब्याज लेथौ।"

8 और मैं उनसे कहो, "हम अपने सामर्थ्य के हिसाब से अपने यहूदी भईय्या-बहेनिया कै, जो गैरयहूदी जाति के हात बिक गै रहैं, दाम दैकै छुड़ाए हैं, फिर का तुम अपने भईय्यन कै बेचैगे? का बे हमरे हात बिकंगे?" तौ बे चुप रहे और कछु ना कह पाए। 9 फिर मैं उनसे कहो, "जो काम तुम करथौ बौ अच्छो ना है; का तुमकै जौ बजह से हमरे परमेस्वर को भय मानकै ना चलनो चाहिए, कि हमरे दुस्मन जो गैर यहूदी जाति के हैं, बे हमारी नाओंधराई ना करैं? 10 मैं भी और मेरे भईय्या और सेवक उनको रुपईया और अनाज उधार देथैं, पर हम जाको ब्याज छोड़ देमैं। 11 आजै उनकै उनके खेत, और दाख, और जैतून की बारिन, और घर वापस दियौ; और जो रुपईया, अन्न, नया दाखमधु, और टटको तेल तुम उनसे लै लेथौ, बाको सौमौं हिस्सा वापस दियौ?"

12 बे कहीं, हम उनकै वापस दै देंगे, और उनसे कछु ना लेंगे; जैसो तैं कहथै, बैसोई हम करंगे। तौ मैं पुजारिन कै बुलाएकै बे लोगन कै जौ कसम खबाओ कि बे जहे बादा के हिसाब से करंगे। 13 फिर मैं अपने लत्ता के छोर कै झारकै कहो, जहे रीति से जो कोई जौ बादा कै पूरो ना करै, बाकै परमेस्वर झारकै, बाको घर और कमाई बासे छुड़ाबै, और जहे रीति से बौ झारो जाबै, और कंगाल हुई जाबै। तौ पूरी सभा कही, "आमीन!" और प्रभु परमेस्वर की स्तुति करीं। तौ लोग जौ बादा के हिसाब से काम करीं।

नहेम्याह की निस्वार्थ सेवा

14 फिर जब से मैं यहूदा देस मैं उनको सासक ठहराओ गौ, मतलब राजा अर्तछत्र के बीसमें साल से लैकै बाके बत्तीसमें साल ले, मतलब बाहरै साल ले मैं और मेरे भईय्या सासक के हक को खानु ना खाईं। 15 पर मोसे पहले के अधिपति, बे प्रजा के ऊपर भारी बोझ डारत रहैं, और उनसे रोटी, और दाखमधु, और जाके संग चालीस सिक्का चाँदी लेत रहैं, और उनके सेवक भी प्रजा के ऊपर हक जतात रहैं; पर मैं ऐसो ना करत रहौं, काहैकि मैं प्रभु परमेस्वर को भय मानत रहौं। 16 फिर मैं दीबार के काम मैं लिपटो रहो, और हम लोग कुछ जमीन मोल न लै; और मेरे सब सेवक काम करन के ताहीं, हुँआँ जुराने रहत रहैं। 17 फिर मेरी मेज मैं खान बारे एक सौ पचास यहूदी और अधिकारी और बे भी रहैं, जो चारौ घाँईं के गैर यहूदी जाति मैं से हमरे झोने आए रहैं। 18 जो हर दिन के ताहीं तैयार करो जात रहै, बौ एक बरधा, छै अच्छी-अच्छी भेंड़ और बकरिया रहैं, और मेरे ताहीं मुर्गिया भी तैयार करी जात रहै; दस-दस दिन के बाद तमान तराहनी को दाखमधु भी तैयार करो जात रहै; पर तहुँओं मैं अधिपति के हक को भोज ना लौ,

19 काहैकि काम को भार प्रजा के ऊपर भारी रहै। हे मेरे परमेस्वर! जो कछु मैं जौ प्रजा के ताहीं करो हौं, बाकै तैं मेरे हित के ताहीं याद रख।