1 जब सातमों महेना झोने आओ, बौ समय सब इस्राएली अपने-अपने सहर मैं रहैं, तभई बे सब लोग एक मन हुईकै, पानी फाटक के सामने के चौराह मैं इकट्टो हुई कै, एज्रा यहूदी नियम के सिक्छक से कही, कि मूसा की जो नियम कानून प्रभु परमेस्वर इस्राएलिन कै दई है, बौ किताब लै आ। 2 तौ एज्रा पुजारी सातमों महेना के पहले दिन कै का बईय्यर, का लोग, जित्ते सुनकै समझ सकत रहैं, बे सबन के सामने कानून किताब कै लै आई। 3 बे बाकी बात भोर से दुपारी ले बौ चौराह के अग्गु जो पानी फाटक के अग्गु रहै, का बईय्यर, का लोग और सब समझन बारेन कै पढ़कै सुनात रहो; और लोग व्यवस्था की किताब मैं कान लगाए कै ध्यान से सुनत रहैं।

4 एज्रा सास्त्री, काठ के एक मचान मै जो जहे काम के ताहीं बनो रहै, और खड़ो ही गौ; और बाकी दहने घाँईं मत्तित्याह, सेमा, अनायाह, ऊरिय्याह, हिल्किय्याह और मासेयाह; और बाईं घाँईं, पदायाह, मीसाएल, मल्किय्याह, हासूम, हस्बद्दाना, जकर्याह और मसुल्लाम खड़े भै।

5 तब एज्रा जौ सब लोगन से ऊँचे मैं रहै, सबकै देखत भै बौ किताब कै खोल दई; और जब बौ बाकै खोली, तौ सब लोग उठ खड़े ही गै।

6 तब एज्रा महान परमेस्वर प्रभु परमेस्वर कै धन्य कही; और सब लोग जहे रीति अपने-अपने हात उठाएकै आमीन, आमीन, कहीं; और मुड़िया झुकाएकै अपनो-अपनो घुटनो टिकाएकै प्रभु परमेस्वर कै दंडवत करीं।

7 येसुआ, बानी, सेरेब्याह, यामीन, अक्कूब, सब्बतै, होदिय्याह, मासेयाह, कलीता, अजर्याह, योजाबाद, हानान और पलायाह नामक लेवी, लोगन कै व्यवस्था समझात गै, और लोग अपने-अपने जघा मै खड़े रहे। 8 बे परमेस्वर की व्यवस्था की किताब से पढ़कै मतलब समझा दई; और लोग पाठ कै समझ लईं।

9 तब नहेम्याह जो अधिपति रहै, और एज्रा जो पुजारी और सास्त्री रहै, और जो लेवी लोगन कै समझत रहैं, बे सब लोगन से कहीं, "आज को दिन तुमरे परमेस्वर प्रभु परमेस्वर के ताहीं पवित्र है; तभई विलाप मत करौ और नाय रोबौ।" काहैकि सब लोग व्यवस्था के वचन सुनकै रोत रहैं। 10 फिर नहेम्याह उनसे कहीं, "जाएकै अच्छो-अच्छो खानु खाबौ और मीठो-मीठो रस पीबौ, और जोके ताहीं कुछ तैयार नाय भौ उनके झोने खानु की सामग्री भेजौ; काहैकि आज को दिन हमारे प्रभु के ताहीं पवित्र है; और उदास मत होबौ, काहैकि प्रभु परमेस्वर को आनन्द तुमरो दृढ़ गढ़ है।"

11 फिर लेवियन सब लोगन कै जौ कहकै चुप कराए दई, "चुप रहबौ काहैकि आज को दिन पवित्र है; और उदास मत रहबौ।" 12 तब सब लोग खानु, पीनो, खानु सामग्री भेजन और बड़ा आनन्द मनान कै चले गै, काहैकि जो वचन उनकै समझाए गै रहैं, और बे समझ गै रहैं।

13 दूसरे दिन भी पूरी प्रजा के पितरन के घराने के मुख्य-मुख्य आदमी और पुजारी और लेवी लोग, एज्रा सास्त्री के झोने व्यवस्था के वचन ध्यान से सुनन के ताहीं इकट्ठे भै। 14 उनकै व्यवस्था मैं जौ लिखो भौ मिलो, कि प्रभु परमेस्वर मूसा कै जौ आग्या दई रहै, कि इस्राएली सातवें महेना के त्योहार के समय झोपड़ियन मैं रहै मैं, 15 और अपने सब नगरन और यरूसलेम मैं जौ सुनाई और जौ प्रचार करो जाबै, "पहाड़ मै जाएकै जैतून, तैलवृक्ष, मेंहदी, देवदार, खजूर और घने-घने पेंड़न की हंगईय्यन कै लै आएकै झोपड़ियन कै बनबाबौ, जैसो कि लिखो है।"

16 फिर सब लोग बाहर जाएकै हंगईय्यन कै लै आईं, और अपने-अपने घर के ऊपर मै , और अपने आँगन मैं, और परमेस्वर के भवन के आँगन मैं, और जलफाटक के चौक मैं, और एप्रेम के फाटक के चौक मैं, झोपड़ियन कै बनाए लईं। 17 फिर सब मंडली के लोग जितने बँधुआई से छुटकै लौट आए रहैं, झोपड़ियन कै बनाएकै बामैं रहन लगे। नून के लौड़ा यहोसू के दिनन से लैकै बौ दिन तक इस्राएलियन ऐसो नाय करीं रहैं। बौ समय भौत बड़ो आनन्द भौ। 18 फिर पहले दिन से अन्तिम दिन तक एज्रा हरदिन परमेस्वर की व्यवस्था की किताब मैं से पढ़ पढ़कै सुनाई। बे सात दिन तक त्योहार कै मानत रहे, और आठवें दिन नियम के जैसी महासभा भई।