नहेम्याह 6

नहेम्याह के खिलाफ चाल

1 जब सम्बल्लत, तोबियाह और अरबी गेसेम और हमरे दुसरे दुस्मन कै जौ खबर मिली, कि मैं दीबार कै बनबाए चुको; और बौ समय तक भी मैं फाटकन मै पल्ला नाय लगाए पाओ रहौं, और दीबार मैं कोई दरार नाय बची रहै। 2 तौ सम्बल्लत और गेसेम मेरे झोने जौ खबर भेजीं, "आ, आपन ओनो के मैदान के कोई गाँव मैं एक दुसरे से भेंट करैं।" पर बे मेरो नुकसान करन की इच्छा करत रहैं। 3 पर मैं उनके झोने दूत के जरिये जौ जबाब दौ, "मैं तौ भारी काम मैं लगो हौं, हुँआँ नाय जाए सकथौ; मेरे जाकै छोड़कै, तुमरे झोने जान से जौ काम काहे बंद रहै?"

4 फिर बे चार बार मेरे झोने बैसिये खबर भेजीं, और मै उनकै बैसिये जबाब दौ।

5 तौ पाँचमी बार सम्बल्लत अपने सेवक कै बिना मोहर बंद चिट्ठी दै कै मेरे झोने भेजी, 6 जो मै जौ लिखो रहै, "जाति- जाति के लोगन मैं जौ कहो जाथै, और गेसेम भी जहे बात कहथै, कि तुमरी और यहूदियन की मनसा बगावत करन की है, और तभई तू बौ दीबार कै बनवाथै; और तू जे बातन के जैसी बाको राजा बननो चाहथै। 7 तू यरूसलेम मैं नवी ठहरो है, जौ कहकै तेरे बारे मैं प्रचार करै, कि यहूदियन मैं एक राजा है। अब ऐसो ही समाचार राजा कै दौ जागो। तभई अब आ, हम एक संग सलाह करैं।"

8 तौ मैं अपने मालिक के झोने खबर भेजो, "जैसे तू कहथै, बैसे तौ कुछ भी नाय भौ, तैं जे बात अपने मन गढ़थै।"

9 बे सब लोग जौ सोच कै हमैं डरानो चाहथै, "उनके हात ढीले पड़े, और काम बन्द ही जाए।" पर अब हे परमेस्वर, तू मोकै हिम्मत दे।

10 फिर मैं समायाह के घरै गौ, तौ जो दलायाह को लौड़ा और महेटबेल को नतिया जे खुदकै घर मैं बंद करे होथैं, तौ बे मोसे कहीं, "आ, आपन परमेस्वर के मंदिर के भीतर आपस मै भेंट करैं, और मंदिर के मोहोट बन्द करैं; काहैकि बे लोग तोकै मारन कै आंगे, रात मै ही तोकै मारन कै आंगे।"

11 पर मैं कहो, "का मेरे जैसी आदमी कै भाजनो सई है? और मेरे जैसो कौन है जो अपनी जान बचान के ताहीं मंदिर मैं घुसैगो? ऐसो मैं न करंगो।"

12 फिर मैं जान लौ की बौ परमेस्वर को भेजो भौ नाय है, पर बौ सब बात परमेस्वर को वचन कहकै मेरो नुकसान के ताहीं कही, काहैकि तोबियाह और सम्बल्लत बाकै रूपईया दै रखाई रहै। 13 बे जाके जौ बजह से रूपईया दै रखाई रहैं, कि मैं डराए जामौं, और बैसिये काम करकै पापी रहमौं, और उनकै दोस लगान को मौका मिलै, और बे मोए बदनाम कर सकैं।

14 हे मेरे परमेस्वर! तोबियाह, सम्बल्लत, और नोअद्याह, नवी और दुसरे जित्ते नबी मोकै डरपानो चाहथैं, उनके सब ऐसे कामन की खबर रख।

निर्माड़ के काम को समापन

15 एलूल महेना के पच्चीसवें दिन कै मतलब बावन दिन के भीतर दीबार बन गई। 16 जब हमारे सब दुस्मन जौ सुनीं, तौ हमरे चारौ घाँईं रहनबारे सब गैरयहूदी जाति के डराएगै, और गजब बेजती महसूस करीं; काहैकि बे जान लईं कि जौ काम हमारे परमेस्वर की घाँईं से भौ।

17 बे दिनन मैं भी यहूदी नेता और तोबियाह के बीच चिट्ठी भौत आए-जाए करत रहै। 18 काहैकि बौ आरह के लौड़ा सकन्याह को दमदा रहै, और बाके लौड़ा यहोहानान बेरेक्याह के लौड़ा मसुल्लाम की लौड़िया कै बिहाए लई रहै; जौ बजह से भौत से यहूदी बाको पक्छ लेन के ताहीं कसम खाए पड़े रहैं। 19 बे मेरे होने मैं बाके भले कामन की चर्चा करे करते, और मेरी बातैं भी बाकै सुनाए करते। तोबियाह मोकै डरपान के ताहीं चिट्ठी भेजे करत रहै।