1 जब सम्बल्लत सुनी कि यहूदि लोग दीवार को दुबारा बनानो सुरु कर दईं हैं, तौ बौ रिसियान लग गौ और हमरो मजाक उड़ान लगो। 2 बौ अपने भईय्यन के और सामरिया की सेना के सामने जौ कहन लगो, "बे कमजोर यहूदी का करनो चाहथैं? का बे अपने बल से काम करंगे? का बे अपनी जघा मजबूत करंगे? का बे हवन करंगे? का बे मट्टी के ढेरन मैं के जले भै पथरन कै फिर नया सिरा से बनांगे?"

3 अम्मोन देस को तोबियाह बाके संग रहै, और बौ कहन लगो, "जो कछु बे बनाए रहे हैं, अगर कोई गीदड़ भी बामैं चढ़ जाबै, तौ बौ उनकी बनाई भई पथरा की दीबार कै तोड़ देगो।"

4 हे हमारे परमेस्वर सुन ले, कि हमरो अपमान हुई रौ है; और उनको करो भौ अपमान उन्हईं की मुड़िया मैं लौटार दे, और उन्हैं बंधुवाई के देस से लुटवाए दे। 5 और उनके दुस्टता के काम कै मत ढाँप, और ना उनको पाप तेरे सामने से मिटाओ जाए; काहैकि बे तोकै दीबार बनानबारेन के सामने गुस्सा दिबाई हैं।

6 हम लोग दीबार कै बनाए; और पूरी दीबार आधी ऊँचाई ले जुड़ गई। काहैकि लोगन को मन बौ काम मैं लगो रहो।

7 जब सम्बल्लत और तोबियाह और अरबी, अम्मोन और असदोद के लोग सुनी, कि हम यरूसलेम की दीबार कै दुबारा बनान मैं अग्गु बढ़ रहै हैं, और दीबार मै दरार भी बंद करी जाए रही हैं, तौ बे भौत गुस्सा भै। 8 फिर बे सब मिलकै यरूसलेम मै हमला करन और गड़बड़ी फैलान की योजना बनाईं, 9 लेकिन हम लोग अपने परमेस्वर से प्रार्थना करे, और दुस्मन के हमला से बचन के ताहीं दिन-रात के ताहीं पहरुआ बैठाए दै।

10 यहूदा के लोग एक गीत गाईं:

"हम ताकत से बोझ उठान मै कमजोर ही जाथैं;

हटान के ताहीं भौत सारो मलबा है।

आज हम दीवार कैसे बनाए सकथैं?"

11 और हमरे दुस्मन कहन लगे, "जबले हम उनके बीच मैं ना पहुँचे, और उन्हैं घात करकै बौ काम बंद ना करैं, तौले उनकै ना कछु पता चलैगो, और ना कछु दिखाई पड़ैगो।" 12 फिर जो यहूदी उनके आस-पास रहत रहैं, बे सब जघा से दस बार आए-आएकै, हम लोगन से कहीं, "तुमकै हमरे झोने लौट आनो चाहिए।" 13 जौ बजह से मैं सब लोगन कै तलवार, बर्छी और धनुस दैकै दीबार के पच्छू सबसे नीचे की खुली जघा मैं घर-घर के हिसाब से बैठार दईं।

14 तौ मैं देखकै उठो, और नेता और अधिकारियन और सब लोगन से कहो, "उनसे मत डराबौ; प्रभु जो महान और भययोग्य है, बहे कै याद करकै, अपने भईय्या, लौड़ा-लौड़ियन, बईंय्यरैं और घरन के ताहीं लड़ाई लड़ियो।" 15 जब हमरे दुस्मन सुनीं, कि जे बात हमकै पता चल गई है, और परमेस्वर उनकी योजना कै विफल करी है, तौ हम सब के सब दीबार के झोने अपने-अपने काम मैं लौट गै।

16 और बौ दिन से मेरे आधे सेवक तौ बौ काम मैं लगे रहे, और आधे बर्छी, तलवार, तीर धनुस और कवज कै धारड़ करे रहत रहैं; और यहूदा के पूरे घराने के पच्छू, अधिकारी रहे करत रहैं। 17 दीबार कै बनान बारे और बोझ कै ढोनबारे दोनों बोझ कै उठात रहैं, मतलब एक हात से काम करत रहैं, और दुसरे हात से हथियार पकड़े रहत रहैं। 18 राजमिस्त्री अपनी-अपनी जाँघ मैं तलवार लटकाए कै दीबार बनान को काम करत रहैं। और लोगन कै चाहचीते करन ताहीं तुरहई कै फूँकन बारो मेरे झोने रहत रहै। 19 जौ बजह से मैं नेता , अधिकारियन और सब लोगन से कहो, "काम तौ बढ़ा फैलो भौ है, और हम लोग दीबार मैं अलग-अलग एक दुसरे से दूर रहथैं। 20 जौ बजह से जहाँ से तुरहई तुमकै सुनाई देबै, उतई हमरे झोने जुराए जईयो। हमरो परमेस्वर हमरे घाँईं से लड़ैगो।" 21 और हम काम मैं लगे रहंगे, और उनमैं आधे, दिन निकरन से पहले और रात ले बर्छी लैकै पहरेदारी करत रहैं।

22 फिर बहे समय मैं लोगन से जौ भी कहो, "एक-एक इंसान अपने दास समेत यरूसलेम के भीतर रात बिताए करैं, कि बे रात कै तौ हमारी रखबारी करैं, और दिन के काम मैं लगे रहमैं।" 23 ऐसे करकै हम सब, मैं मेरे हितुआ, मेरे सेवक, मेरे अंग रक्छक, इतने चाहचीते और व्यस्त रहैं कि हमैं लत्ता तक बदलन के ताहीं समय ना मिलत रहै। हर पल, हर समय, हर आदमी अपने हात मैं हथियार लै रहत रहै।