1 ଆପେ ପାର୍‌ମେଶ୍ୱାର୍‌ଆଃ ଅଡ଼ାଃ ସେନଃ ଇମ୍‌ତା ଚିର୍‌ଗାଲ୍‌ କେଦ୍‌ତେ ସେସେନ୍‌ପେ । ଚିୟାଃଚି ଡଣ୍ଡକ ଲେକା ଦାଣେଁ ରାକାବ୍‌ ବାଗିକେଦ୍‌ତେ, ଆୟୁମ୍‌ ନାଗେନ୍ତେ ହେପାଦ୍‌ ସେନ୍‌ତେୟାଃ ବୁଗିନାଃ ତାନାଃ । ଚିୟାଃଚି ଏନ୍‌ ଡଣ୍ଡକ ଏତ୍‌କାନାଃ କାମି ରିକା ତାନାଲେ ମେନ୍ତେ କାକ ସାରିୟାଃ । 2 ଆପେ ଜାଗାର୍‌ ଇମ୍‌ତାଙ୍ଗ୍‌ ଚିର୍‌ଗାଲ୍‌ କେଦ୍‌ତେ କାଜିପେ ଓଡ଼ୋଃ ପାର୍‌ମେଶ୍ୱାର୍‌ଆଃ ଆୟାର୍‌ରେ ଜେତାନ୍‌ କାଜି ଜାଗାର୍‌ ନାଗେନ୍ତେ ଆପେୟାଃ ମନ୍‌ ଜାଲ୍‌ଦି ଆଲକା ହବାଅଃକା । ଚିୟାଃଚି ପାର୍‌ମେଶ୍ୱାର୍‌ ସିର୍ମାରେ ମେନାଇୟାଃ ଓଡ଼ୋଃ ଆପେ ଅତେଦିଶୁମ୍‌ରେ ମେନାପେୟା । ଏନାମେନ୍ତେ ଆପେୟାଃ କାଜିତେୟାଃ କାଟିକାନ୍‌ ହବାଅଃକା । 3 ପୁରାଃ କାମିକ ହରାତେ କୁମୁ ହିଜୁଃଆ, ମେନ୍‌ଦ ପୁରାଃଗି ବେଜେର୍ ବେଜେର୍‌ ଜାଗାର୍‌ ହରାତେ ଡଣ୍ଡ ହଡ଼ରାଃ ଡଣ୍ଡ ସାରିୟଃଆ । 4 ଚିମ୍‌ତା ପାର୍‌ମେଶ୍ୱାର୍‌ତାଃରେ ଦାଣେଁ ରାକାବ୍‌ରେୟାଃ କିରିୟା ରିକାଏ ତାନାମ୍‌, ଇମ୍‌ତା ଏନାକେ ଏମ୍‌ ନାଗେନ୍ତେ ବିଲାମ୍‌ ଆଲମେ ରିକାଏ । ଚିୟାଃଚି ଡଣ୍ଡ ହଡ଼କତାଃରେ ପାର୍‌ମେଶ୍ୱାର୍‌ଆଃ ସୁକୁଇଚି ବାନଃଆ । ଅକଆଃ ଏମ୍‌ ନାଗେନ୍ତେ କିରିୟା କାଦାମ୍‌, ଏନାକେ ଏମ୍‌ରୁହାଡ଼୍‌ ନାଗେନ୍ତେ ସେକାଡ଼୍‌ କେଦ୍‌ତେ ତାଇନ୍‌ମେଁ । 5 କିରିୟା କେଦ୍‌ତେ କା ଏମ୍‌ରୁହାଡ଼୍‌ ବାଦ୍‌ଲାରେ କା କିରିୟା ରିକାତେୟାଃ ଆମାଃ ନାଗେନ୍ତେ ବୁଗିନାଃ ତାନାଃ । 6 ଆମାଃ ମଚାରେୟାଃ ଜାଗାର୍‌ତେ ହଡ଼୍‌ମକେ ପାପ୍‌ରେ ଆଲମେ ଉୟୁଃ ଇଚିୟା, ଚାଏ ନେଆଁଦ କା ସାରିତେ ହବାୟାନା ମେନ୍ତେ ଦୁଁତ୍‌ରାଃ ଆୟାର୍‌ରେ ଆଲମେ କାଜିୟା, ଚିନାଃମେନ୍ତେ ପାର୍‌ମେଶ୍ୱାର୍‌ ଆମାଃ କାଜିକାଦ୍‌ ତେୟାଃରେ ଖିସ୍‌କେଦ୍‌ତେ, ଆମାଃ ସବେନାଃ କାମିକାଦ୍‌ କାଜିକେ ଜିୟନ୍‌ ରିକାୟା ? 7 ଚିୟାଃଚି କୁମୁ ଓଡ଼ୋଃ ସାମା କାଜିରାଃ ପୁରାଃତେ ଓଡ଼ୋଃ ପୁରାଃ ଜାଗାର୍‌ ହରାତେ ନେ’ଲେକା ହବାଅଃଆ । ମେନ୍‌ଦ ଆପେ ପାର୍‌ମେଶ୍ୱାର୍‌କେ ବରଇପେ ।

8 ଚିମ୍‌ତା ଆପେ ଜେତାନ୍‌ ରାଇଜ୍‌ରେ ମିଆଦ୍‌ ଗାରିବ୍‌ ହଡ଼ ଚେତାନ୍‌ରେ ସିଗିଦ୍‌, ନ୍ୟାୟ ବିଚାର୍‌ ଚେତାନ୍‌ରେ ଅନ୍ୟାୟ ହବାଅଃତାନ୍‌ ନେଲେ ରେଦ, ଏନ୍‌ ବିଷାଏ ନାଗେନ୍ତେ ଆଲପେ ଆକ୍‌ଦାନ୍ଦାଅଃ । ଚିୟାଃଚି ମାରାଙ୍ଗ୍‌ ଚେତାନ୍‌ ଏତେ ମିହୁଡ଼୍‌ ପୁରାଃଗି ମାରାଙ୍ଗେନ୍‌ ଲେକା ନେଲାଏଃ । ଓଡ଼ୋଃ ଇନିଃ ସବେନ୍‌କଆଃ ପୁରାଃ ଚେତାନ୍‌ରେ ମେନାଇୟାଃ ।

9 ଆଡଃଗି ଅତେରେୟାଃ ଜଅ ସବେନ୍‌କ ନାଗେନ୍ତେ ତାନାଃ । ଓଡ଼ୋଃ ରାଜା ପିଡ଼ି ହରାତେ ନାଲା ନାମେ ।

10 ଅକନ୍‌ ହଡ଼ ଟାକାକେ ଦୁଲାଡ଼୍‌ ରିକାଏଃ, ଇନିଃ ପୁରାଃ ଟାକାତେ କା ସୁକୁଆଃ । ଚାଏ ଅକନ୍‌ ହଡ଼ ଟାକାକେ ଦୁଲାଡ଼୍‌ ରିକାଏଃ, ଇନିୟାଃ ପୁରାଃ ଟାକା ପସାଅଃ ରେହଁ ଇନିଃ କା ସୁକୁଆଃ, ନେଆଁଗି ସାମା ତାନା । 11 ଖୁର୍ଜି ପସା ଇଦିୟଃରେ, ଏନାରେନ୍‌ ଜଜମ୍‌ ହଡ଼କ ପୁରାଃଗି ପସା ଇଦିୟଃଆ । ଏନାମେନ୍ତେ ଆପ୍‌ନାଃ ମେଦ୍‌ରେ ନେନେଲ୍‌ ବାଗିକେଦ୍‌ତେ ଏନାରେନ୍‌ ଗମ୍‌କେରାଃ ଜେତାନ୍‌ ଲାଭ୍‌ ବାନଃଆ ? 12 କାମିତାନ୍‌ ସୁସାର୍‌ତାନ୍‌ ହଡ଼ କାଟିକାନ୍‌ ଚାଏ ପୁରାଃ ଜମେରେୟ ଇନିଃ ସୁକୁତେ ଦୁଡ଼ୁମ୍‌ମାଃଏ । ମେନ୍‌ଦ ମିଆଦ୍‌ କିସାଁଣ୍‌ ହଡ଼ରାଃ ପୁରାଃ ଖୁର୍ଜି ତାଇନ୍‌ ହରାତେ ଇନିଃକେ ସୁକୁ ଦୁଡ଼ୁମ୍‌ କା ହିଜୁଆଃ ।

13 ଆଇଙ୍ଗ୍‌ ସିଙ୍ଗି ଲାତାର୍‌ରେ ମିଆଦ୍‌ କା ହବାଅଃ ଲେକାନ୍‌ କାମି ନେଲାକାଦା । ଚିୟାଃଚି ମିଆଦ୍‌ ଗମ୍‌କେ ଆୟାଃ ଖୁର୍ଜିକେ ଆପ୍‌ନାଃ ହାନି ରିକା ନାଗେନ୍ତେ ହୁଣ୍ଡିକେଦ୍‌ତେ ଦହାକାଦା । 14 ଓଡ଼ୋଃ ଏନ୍‌ ଖୁର୍ଜି, ଜେତାନ୍‌ ଏତ୍‌କାନ୍‌ କାମି ହରାତେ ଜିୟନଃଆ । ଓଡ଼ୋଃ ଇନିୟାଃ ଅଡ଼ାଃରେ ହନ୍‌ ଜାନାମଃଆ ଓଡ଼ୋଃ ଇନିୟାଃ ତିଃଇରେ ଜେତାନ୍‌ ଖୁର୍ଜି କା ତାଇନାଃ । 15 ଇନିଃ ଆୟାଃ ଏଙ୍ଗାରାଃ କୟଙ୍ଗ୍‌ ଏତେ ଚିଲ୍‌କା ସାମା ହଡ଼ମ ହିଜୁଃୟାନା, ଏନ୍‌ଲେକା ଇନିଃ ସାମା ହଡ଼ମ ରୁହାଡ଼୍‌କଆ । ଓଡ଼ୋଃ ଇନିଃ ଆୟାଃ ତିଃଇତେ ରିକାକାଦ୍‌ କାମି ନାଗେନ୍ତେ, ଜେତ୍‌ନାଃ ଗଅଃକେଦ୍‌ତେ କା ସେନଃ ରୁହାଡ଼ା । 16 ଓଡ଼ୋଃ ଇନିଃ ଚିଲ୍‌କା ହିଜୁଃୟାନା, ଏନ୍‌'ଲେକାଗି ଇନିଃ ସେନଃ ରୁହାଡ଼ାଏ । ନେଆଁଗି ଇନିୟାଃ ନାଗେନ୍ତେ ଜାଲୋମ୍‌ରେ ଉୟୁଃ ଲେକାନ୍‌ ବିଷାଏ ତାନାଃ । ଇନିଃ ହୟ ନାଗେନ୍ତେ ଯେ କାମିୟାଃ, ଏନାରେ ଚିକାନ୍‌ ଲାଭ୍‌ ହୁଇନାଃ ? 17 ଓଡ଼ୋଃ ଇନିଃ ଜାନାଅଗି ନୁବାଃରେ ଜଜମ୍‌ ରିକା କେଦା । ଇନିଃ ପୁରାଃଗି ଦୁକୁରେ ଓଡ଼ୋଃ ଉରି ଗେରାଙ୍ଗ୍‌ରେ ତାଇନ୍‌ୟାନା ଓଡ଼ୋଃ ଖିସ୍‌ରେ ପେରେଃୟାନା ।

18 ନେଲେପେ, ଅକନ୍‌ ବୁଗିନ୍‌ କାଜି ଓଡ଼ୋଃ ସାର୍‌ତି କାଜି ଆଇଙ୍ଗ୍‌ ନେଲାକାଦା,ଏନା ନେଆଁତାନାଃ, ସିଙ୍ଗି ଲାତାର୍‌ରେ ହଡ଼ ଆୟାଃ କାମିରେୟାଃ ଅକ ନାଲା ନାମେ ଓଡ଼ୋଃ ଜମ୍‌ ନୁଁ କେଦ୍‌ତେ ରାସ୍‌କା ରିକାଏଃ ଓଡ଼ୋଃ ପାର୍‌ମେଶ୍ୱାର୍‌ ଇନିଃକେ ଜିନିଦ୍‌ ତାଇନ୍‌ ରେୟାଃ ଅକ ଦିପିଲି ଏମାକାଇୟା । ଏନା ବାଗିକେଦ୍‌ତେ ଏଟାଃ ଆୟାଃ ଜେତାନ୍‌ ହିସା ବାନଃଆ । 19 ଆଡଃଗି ପାର୍‌ମେଶ୍ୱାର୍‌ ହଡ଼କେ ପୁରାଃ ଖୁର୍ଜି ଏମାକାଇୟା, ଇନିଃ ଏନାରେ ରାସ୍‌କା ରିକାକେଦ୍‌ତେ ଓଡ଼ୋଃ ଇନିଃ ଏନାରେୟାଃ ହିସା ନାମ୍‌କେଦ୍‌ତେ ଓଡ଼ୋଃ ଆୟାଃ କାମିରେୟାଃ ନାଲା ନାମ୍‌କେଦ୍‌ତେ ଏନାରେ ଇନିଃ ରାସ୍‌କା ରିକାୟା । ନେଆଁଗି ଏନ୍‌ ହଡ଼ ନାଗେନ୍ତେ ପାର୍‌ମେଶ୍ୱାର୍‌ଆଃ ଦାନ୍‌ ତାନାଃ । 20 ଇନିଃ ଆୟାଃ ଜିନିଦ୍‌ ତାଇନ୍‌ ରେୟାଃ ଦିପିଲିକେ ପୁରାଃ କା ପାହାମେୟା । ଚିୟାଃଚି ପାର୍‌ମେଶ୍ୱାର୍‌ ଇନିୟାଃ ମନ୍‌ସୁରୁଦ୍‌ରେ ରାସ୍‌କା ଏମ୍‌କେଦ୍‌ତେ ସୁକୁ ରେୟାଃ ଦିପିଲି ଏମାକାଇୟା ଓଡ଼ୋଃ ଇନିଃକେ ରାସ୍‌କାତେ କାଜିକରାଃ ଉତ୍ତାର୍‌ ଏମାଇୟାଃ ।