10 Le hínsiñehabubei lun seinsu súnwandan busén lan lanwoun liseinsun; le hínsiñehabubei lun irisini, súnwandan laritagun luagu lougua lan le lúmabei. Katei giñe málati lira, 11 lugundun gagibedun lúmati gürigia, gagibedun lawesirun. Kati lagañeirubei gürigia lau liibe liseinsun bóugudin luéi laríaguni? 12 Le nadagimeinbei, gibe yebe leigin mibe yebe leigin, arumugati buidu; ánheinti le rísibei, marumugagüdün lumuti lirisin.
13 Anihein aban katei narihin ligibuagu ubóu le ruti íruni: Barǘ lan lareidahóun seinsu wuribani houn gürigia, 14 lugundun gayaraati lagumuchun aban marasun mabuidunti lau sun lirisin, ani ánheinti garáü lubéi aban, úaalime ni kata luma lun lígiruni lun. 15 Ani ítara kei ligaburi liabin ubouagun, ítara luba lidin: Surusu kei dan le lágurahounbei, manügünga ni kata lídangiñe lebegi luadigimari.