1 Ábati lagumeserun Hesusu adimureha houn gürigia ha ñéinbaña lau hénpulu, aba lariñagun houn:

—Ñeinñein meha aban wügüri ábunaguti tídibu beibei licharirugu. Aba layaraagun lau, adüga ligía aban ágeidinaü lun laribichawagún tira beibei lidoun tuma aban muna lun óunigihati.

Aba láhayahani lichari houn nadagimeintiña, aba lidin gaweiyasun. 2 Dan le lachülürünbei dan lun alubahani, aba lóunahan aban lumusun amuriahei lufanran hámagiñe nadagimeintiña. 3 Ábarüga hárügüdüni musu ligía, aba habuleseiruni, aba hóunahani lárigoun, míchutiña ni kata lun. 4 Ábaya lóunahan labureme ichari ábanya musu; aba hachamuragun dübü luagu, bougua haméi lichügü, anaba haméi. 5 Ábaya lóunahan labureme ichari ábanya, aba háfaruni hilagubei. Lárigiñe, aba lóunahan saragu; bulesei hamaña híbiri, áfaragua híbiri hilagubei.

6 Aniheinguati buga aban lun lóunahani, aban liráü hínsiñeti lun; lagumuhóun oura aba lóunahani, aba laritagun luagu inebebei lan houn ladüga liráü lan. 7 Aba hariñagun nadagimeintiña hámagua: «Anihán le lunbei libihini alagan; wáfaraali hilagubei, wagía láamuga laburiña sun katei». 8 Ábati hárügüdüni, aba háfaruni hilagubei, aba hasagaruni lídangiñe fulasu ligía.

9 Ábati lálügüdahan Hesusu: «Kábati ladüga labureme ichari? Liábinba, ábame láfaraguniña nadagimeintiña hilagubei, ábame líchuguni ichari houn amu.

10 Maliihan humagili san le tariñagubei Lererun Bungiu:

"Dübü le meha aubei meberesen hamá ábunagutiña,

ligíaali dübü le tímatimaati.

11 Aburemei adügübalin katei le,

ani wéiritu wanigi lau" ».

12 Aba habusenrún yebe hadaürüni Hesusu ladüga hasubudiruni luagu hawagu lan layusurei hénpulu le. Kei hanufudebei hawéi gürigia, aba hígiruni lungua, aba houdin.

13 Lárigiñe, aba hounahóuniwa hádangiñe fariséugu hama hádangiñe lánigu Erodesi lumoun Hesusu lun hariñagagüdüni somu katei le gayaraati híchugun lidurun lau. 14 Aba hayabin, aba hariñagun lun:

—Máisturu, subudi wamuti luagu ariñaga bani inarüni, manufudeuga luéi ni aban ladüga ni kata lan luéirigun gürigia bun; ani barufudahani lémeri Bungiu lau inarüni. Ariñagabá aban katei woun: Buiti san lun lafayeihóun seinsu lun warúeite le Rómana odi mabuidunti?

15 Subudi lumuti Hesusu luagu biangua lan hagibu; aba lariñagun houn:

—Kame san híchaaha sádara nubá? Barǘ humá aban lídangiñe seinsu ligía nun, ariha náamugei.

16 Aba hanügüni lun. Dan le larihini, aba lálügüdüniña:

—Kagia iyawa luma iri le luágubei?

Aba hariñagun lun:

—Liyawa luma liri urúei Rómana.

17 Aba lariñagun houn:

—Ru humeiti lani urúei lun urúei, ru humeime lani Bungiu lun Bungiu.

Aba taweiridun hanigi lau ligaburi lóunabuniña.

18 Aba houdin fiu saduséugu arihei Hesusu. Afiñetiñati saduséugu luagu ua lan ásaaruni lídangiñe óunweni. Aba lubeiti hariñagun lun:

19 —Máisturu, abürühati meha Moisesi woun luagu anhein lan ounwe aban wügüri le maríeiti masaaniga tau lúmari, lunti lan lamarieidun líbiri tuma würi to ueiboun lounwe, lun gasaanigu lan líbugaña le óunwebei. 20 Ñéinñanu méhati sedü gamulenuguátiña; le furumiñeti, aba lamarieidun, aba lounwen marahüñüga. 21 Le habiaman, aba lamarieidun tuma würi to buga lúmari líbugaña, aba giñe lounwen marahüñüga; ligiaméme asusereda luma le háürüwan. 22 Maríeitiña sédügubei hagía tuma, úati ni aban garaüti tau. Lagumuhóun oura, aba giñe tounwen würi tuguya. 23 Anihán le uágubei wálügüdaha: Danme le hásaarun hilaaña lídangiñe óunweni lunya gabagari hamá, kábagia úmari würi tuguya hádangiñe sedü íbirigu ha, lárigiñe maríei hamá sun hagía tuma?

24 Aba lariñagun Hesusu houn:

—Bulíeiguatün ladüga libidiñe tuáguti Lererun Bungiu hun, ni luáguti lubafu Bungiu. 25 Danme le hásaarun hilaaña lunya habagaridun, ámuhalime habagari; mamarieidun haba, míchugun hamañame hasaanigu lun maríei, keisi mamarieidun hamá ánheligu sielu. 26 Ánheinti luagu sará hamá hilaaña lunya habagaridun, maliihan humagiru liliburun Moisesi luagu ladimurehan Bungiu lun lídangiñe aban búbugati durungu umuti? Lariñahare lun: «Au Lubungiutebei Abüraámü, Lubungiute Isaakü, Lubungiute Hakobu.*» 27 Ani mama Habungiute hilaguaaña Bungiu, Habungiute wínwangiña. Ítara liña lubeiti, huguya wéiriti habulieidagun.

28 Ñeinñein aban hádangiñe arufudahatiña lilurudun Moisesi le aganbubalin hadimurehan; keiti subudi lani luagu óunaba lániña Hesusu buidu, aba liabin lubaroun, aba lálügüdüni, lariñaga lun:

—Katei san lídangiñe lilurudun Bungiu wéirigutimabei?

29 Aba lariñagun Hesusu lun:

—Anihán le wéirigutimabei: "Aganba humana, huguya Ísüraelina; Wabureme Bungiu, ligíarügüñein Aburemei. 30 Hínsiñela lubeiti Babureme le Bubungiute bun tau sun banigi, tau sun buani, lau sun bisaminan, lau sun bere". Ligía gumadi le wéirigutimabei; 31 ani le libiaman lidan uéiriguni lenege le furumiñeti: "Hínsiñela bíbiri bun kei bínsiñegua bungua". Úati amu gumadi wéiriguti luéi biama le.

32 Aba lariñagun arufudahati ligía lun:

—Buiti bariñaguni, máisturu. Binarün luagu ábanrügüñein lan Bungiu, luagu ua lan amu; 33 ani lunti hínsiñe lan Bungiu woun tau sun wanigi, lau sun wasaminan, tau sun wawani, lau sun were, lun giñe hínsiñe hamá wíbirigu woun keisi wínsiñegua woungua. Gebegiti sun lira ligibugiñe Bungiu sügǘ lau sun wadagaragüdün lun luma sun katei le agudúbei luagu latarü.

34 Danti le laganbun Hesusu lóunabun lau lichú aau, aba lariñagun lun:

—Madiseedibu luéi lílana ban larúeihan Bungiu.

Aba manigihaña lan lun hálügüdahan.

35 Larufudahaña Hesusu ténpulurugu, lariñaga:

—Ida liña san hariñagunbei arufudahatiña lilurudun Moisesi luagu ladügawagun lan Dawidi Kristu? 36 Dawidi guánarügü lau lubafu Sífiri Sandu ariñagati ítara:

Lariñahare Bungiu lun Nabureme:

«Ñuruba luéigiñe nóunwenren

darí níchuguniña báganiñu lábugiñoun bugudi».

37 Ida lubati ladügawagun lan Dawidi Kristu anhein wa lubalin Dawidi guánarügü Kristu, «Nabureme»?

Aba haganbahani bürübünu gürigia hagía lau ugundani.

38 Ábaha lariñagun Hesusu houn lidan larufudahan: «Góunigi humatia hawéi arufudahatiña lilurudun Moisesi; hínsiñeti houn lun héibugun tau daüguaü dururutu luma lun labusurúniwa houn ǘmada lau saragu inebesei. 39 Áluaha hamuti haláü le hala wéirigutiña tidan haligilisin huríu, luma lubuidun-agei ubaraü lidan adineruni. 40 Gidá hamutu haban würiña ha hilaañabaña úmarigu hawéi; lunti hadouragun lau sun lira, aba hadügün afurieidúni le miginaguti. Wéiribei hasufurirun luagu sun le hadügübei».

41 Luagu aban weyu, ñun liña Hesusu ténpulurugu tigibugiñe gafu to lagei seinsu, aríaguei híchaahan gürigia seinsu tidoun. Gíbetiña rísitiña íchugutiña saragu seinsu. 42 Ligía tiabin aban fugiabu würi to hilaaru úmari, aba tíchugun bián gáwanaü tidoun gafu tuguya. 43 Aba lagúarun Hesusu houn lani disipulugu lubadun, aba lariñagun houn:

—Ninarün hau luagu gíbetima lan tíchugun würi to sügǘ hau sun ha íchugubaña seinsu tidoun gafu to; 44 ladüga sun hagía, lídangiñe le ígiragubei hama híchiga; anhoun tuguya, lau tugudemen ru tumuti sun le túmabei lun yebe tawinwandun.