1 Ariñagati giñe Hesusu houn:

—Ninarün hau, luagu añahein lan hádangiñe ha yáabaña guentó, móunwenbaña darí harihini lachülürün larúeihan Bungiu lau ubafu.

2 Sisi weyu lárigiñe, aba lanügüni Hesusu Féduru, Santiagu, luma Huan luagun aban wübü íñuti; aba lámuñedagun larihín ñein hagibugiñe. 3 Aba támiridun ladaüragun; wéiriti tíharun darí lun ua hamá gürigia ubouagu gayaraati hachibun gamisa lun táharudun ítara. 4 Aba harihini Elíasi luma Moisesi ayanuha luma Hesusu; 5 aba lariñagun Féduru lun Hesusu:

—Máisturu, lidan dan awanha lan ya! Adüga wamá ǘrüwa dibasein, aban bun, aban lun Moisesi, aban lun Elíasi.

6 Lariñagunbalin lira ladüga hanufude disipulugu, ani ibidiñeti lun Féduru ka lan lariñagubei. 7 Aba lararirun dúeri le ñeinhin habéi, aba ladouragun hau, aba laganbúniwa aban umalali lídangiñe dúeri ligía le ariñagubei: «Anihán Niráü le hínsiñebei nun; adüga huméi le lubeibei». 8 Lidan oura ligía, dan le harihinbei geyegu ñein, marihinhaña amu ñein luéidigia Hesusu.

9 Dan le ararireina hamá luéigiñe wübü, aba léredun Hesusu hawagu lun mabahüdagun hamani le harihibei ni ka un darime saraali lídangiñe óunweni, ligía le Wügüri Garaüwarügüti. 10 Ligía hareidunbalin katei le hádangua, álügüdaharügütiña hámagua katei lan funa ásaarunibei lídangiñe óunweni. 11 Ábati hálügüdüni Hesusu, hariñaga lun:

—Ka san uagu hariñaga arufudahatiña lilurudun Moisesi luagu lunti lan liabin Elíasi furumiñe lubaragiñe liabin le Krístubei?

12 Aba lóunabuniña, lariñaga houn:

—Inarüni le hariñagubei luagu Elíasiba lan ñübuin furumiñe ani laranserubei lan sun katei. Kagia tariñagubei Lererun Bungiu nuagu, au le Wügüri Garaüwarügüti? Ariñagatu luagu nasufuriruba lan saragu ani mabahüdǘnwabadina lan. 13 Nariñahare hun luagu ñǘbuinhali lan Elíasi, aba hadügüni gürigia sun le habusenrubei lau, kei tariñaguni Lererun Bungiu luagu ítara luba lan lasuseredun lun.

14 Lárigiñe, aba hagiribudun le ñeinhin habéi híbiri disipulugu, aba harihin saragu gürigia geyegu hau. Ñéinñanu giñe arufudahatiña lilurudun Moisesi asigeneha hama. 15 Dan le harihinbalin Hesusu, aba taweiridun hanigi lau harihini ñein, aba héibaagun abusura lun. 16 Ábati lálügüdüniña, lariñaga houn:

—Ka uagu hasigeneha hama?

17 Aba lóunabun aban hádangiñe ha ñéinbaña, aba lariñagun:

—Máisturu, anihán niráü nanügün bun; anihein aban sífiri wuribati luagu, mererungüdalá. 18 Ñein lumuti lárügüdei sífiri wuribati ligía, láhuchuruni múarugun, aba láfurihan hakutaü liyumulugugiñe, aba lakünrinhan lari. Ledebiliduñati ítara. Amuriahaadina hama bani disipulugu lun hasagaruni sífiri wuribati le luéi, siñá hamuti.

19 Aba lóunabun Hesusu, aba lariñagun:

—Gürigia mafiñeraditiña! Átiribei san dan lun nerederuni huma? Ídaame lagumucha mafiñeni le hídanbei? Barǘ huméi irahü ligía ñahoun.

20 Aba hanügüni lun. Dan le larihinbalin sífiri wuribati ligía Hesusu, aba lóunwehagüdüni irahü ligía, aba léiguadun múarugun, aba lagarabahan, aba láfurihan hakutaü liyumulugugiñe. 21 Aba lálügüdüni Hesusu lúguchi, aba lariñagun lun:

—Átiri dan lau ítara?

Aba lariñagun lúguchi:

—Lúmagiñe ñǘraügili. 22 Gíbeeli wéiyaasu láhuchuruni sífiri wuribati ligía wáturugun o dúnarugun lan lun yebe láfaruni hilagubei. Anhein lubeiti anihein lubeiti gayara lubéi badügün somu katei, gudeme wamá bun, íderagua bawa.

23 Aba lariñagun Hesusu lun:

—Ka uagu bariñaga "anhein gayara lubéi"? Sun katei gayaraati lun le afiñebei.

24 Aba lagúaragun lúguchi irahü ligía:

—Afiñetina; íderagua bana lúntima laganwoundun nafiñen!

25 Dan le larihinbei Hesusu luagu furesetimáhali lan hagibedun gürigia, aba ladeinhan lun sífiri wuribati ligía, aba lariñagun:

—Sífiri maganbaditi, mariñagadi, ariñagatina bun lun báfuridun; ígirabei irahü le ani mebeluradigiabá lidoun.

26 Aba lagúaragun sífiri, ábaya lóunwehagüdüni irahü ligía, aba láfuridun; aba lerederun irahü ligía kamá hilaali. Saragu haña ariñagutiña luagu hilá lan. 27 Aba lárügüdüni Hesusu luéigiñe lúhabu, aba liñuraguni, aba lararamun.

28 Ábati lebelurun Hesusu múnadoun; aba hálügüdüni lani disipulugu dan le hábuguarügaaña luma, aba hariñagun lun:

—Ka san uagu siñá wabalin sífiri wuribati ligía asagara?

29 Aba lariñagun houn:

—Lugundun libe sífiri le, láurügüñein furíeigi luma ayunaruni lun Bungiu gayara lan láfuridun.

30 Dan le houdin ñéingiñe, aba hásügürün Galiléagiñe; 31 mabusenrúntiti Hesusu lun lasubudirúniwa halíañein lan ladüga larufudahaña lan houn lani disipulugu, ariñageina ligía luagu lederegerúaba lan, ligía le Wügüri Garaüwarügüti, háhaburugun wügüriña wuribatiña ani háfarubei lan hilagubei, ábame lan lásaarun lídangiñe óunweni luagu lǘrüwan weyu.

32 Úati gunfuranda hamani le lariñagubei houn, ani hanufudetiña lun hálügüdüni.

33 Aba hachülürün uburugu Kafarünaumu; múnada, aba lálügüdüniña Hesusu:

—Ka san buga uagu hadimureha dan éibugeina humá?

34 Aba herederun maniñu ladüga adimureheina haña buga ǘmada luagu ka lan hádangiñe wéirigutimabei. 35 Ábati lañuurun Hesusu, aba lagúarun houn dúusugubei disipulugu lubadun, aba lariñagun houn:

—Le abusenruti ligía lan furumiñeti, lunti agumuhóuni lan hadan súngubei, lun giñe leseriwidun houn súngubei.

36 Aba lanügün aban irahü, aba líchuguni hamidangua; aba lanügüni lúhaburugu, aba lariñagun houn:

37 —Gürigia le eresibiruti aban irahü kei le lidan niri, resibi lumutina, ani mámarügüñein au leresibira, resibi lumuti giñe Núguchi le óunahabalina.

38 Aba lariñagun Huan lun:

—Máisturu, arihatiwa aban wügüri asagahati sífirigu wuribatiña lidan biri; kei mama lan wámañein, aba weweridiruni lun madügündügüya lani.

39 Aba lariñagun Hesusu:

—Meweridira huméi, ladüga úati ni aban le adügüti milaguru lidan niri lun ladimurehan wuriba nuagu. 40 Le mámabei wágani, wámagiñeñein. 41 Ninarün hau luagu furumiñeguarügü lan le íchuguti aban weru duna hun lidan niri ladüga lánigu humá Kristu, libihuba afayeiruahaü buiti.

42 Furumiñeguarügü le afigougüdüti aban hádangiñe ha iserigiñabaña lidan hafiñen nuagu, buítimati hamuga lun lun lagurúniwa baranahoun lau aban óunwenbu dübü le amuligülei gürañu luagu ligiina sügǘ lau ladügüni katei lira. 43 Ánhabu lafigougüda búhabu guánarügü, buítimati hamuga lun bíbuguni, ladüga buítimati hamuga bidin sielun láurügü aban úhabu sügǘ lau hamuga badarún lau biángubei búhabu máfiougatin, 44 ñein lubéi mounwen hamá héweraü ha éigibalin hágubu hilaaña, méñeguchadi ligía watu. 45 Ánhabu giñe lafigougüda bugudi guánarügü, buítimati hamuga giñe lun bíbuguni, ladüga buítimati hamuga bebelurun sielun lau aban ugudi sügǘ lau badarún máfiougatin lau biángubei bugudi, 46 le ñein lubéi mounwen hamá héweraü, méñeguchadi ligía watu. 47 Ánhabu giñe lafigougüda bagu, buítimati lun basagaruni, ladüga buítimati hamuga bebelurun lidoun larúeihan Bungiu lau aban aguu sügǘ lau hamuga badarún máfiougatin lau biángubei bagu, 48 le ñein lubéi mounwen hamá héweraü, méñeguchadi ligía watu.

49 «Ladüga houchúaba súngubei lau watu gemeti. 50 Buiti salu; gama lumoun anhein leferidira lubasuan, kábagia un hu lan? Memegeiralá lubeiti salu hidan gayara láamuga haganóun lidan darangilaü húmagua».