1 Larugan binaafin, aba hóundaragun hábutigu fádirigu hama arufudahatiña lilurudun Moisesi, hama amu wügüriña ha wéirigutiña lidan hafiñen huríu luma sun líbiri liñun-agei lúrudu, ariha kaba lan hadüga lun lasiadirúniwa Hesusu. Aba hanügüni güragu, aba hederegeruni lun Pilatu. 2 Aba lálügüdüni Pilatu Hesusu, lariñaga lun:

—Buguya san Harúeitebei Huríu?

Aba lóunabun Hesusu, lariñaga:

—Buguya guánarügü ariñagubalin.

3 Aba buriti híchugun hábutigu fádirigu saragu lidurun. 4 Ábayati lálügüdüni Pilatu, aba lariñagun lun:

—Móunabuntibu san ni kata? Arihabá átiriñein lan bidurun ichugúti.

5 Mounabunmémeti Hesusu ni kata, aba taweiridun lanigi Pilatu lau lira.

6 Héchutiti Pilatu ígiragüda aban adaürǘti sagü fedu le Luéyuri Esefuruni, le hamuriahan gürigia hádangiñe adaürǘtiña. 7 Ñéinñeinti aban adaürǘti gíriti Barawási úara hama amu ha áfarahabaña gürigia hilagubei lidan iñuraguni luagun gumadi. 8 Ábati hayabin gürigia, aba hariñagun lun Pilatu lun ladügüni kéiñaha ladüga. 9 Aba lálügüdüniña:

—Busentün san lun nígiragüdüni Harúeite Huríu?

10 Lariñagunbalin Pilatu lira ladüga subudi lani luagu ladüga lan gimugaü hederegerei hábutigu fádirigu. 11 Furugüda hamaña hábutigu fádirigu gürigia, hariñaga houn lun hamuriahan lun lígiragüdüni Barawási. 12 Ábati lariñagun Pilatu:

—Kati habusenrubei nadügün lau le uágubei hariñaga Harúeite Huríu?

13 Aba hagúaragun:

—Dáguabei luagu gurúa!

14 Aba lariñagun Pilatu houn:

—Kati wuribati ladügübei?

Ábaya hagúaragun:

—Dáguabei luagu gurúa!

15 Keiti busén lan Pilatu lerederun buidu hama gürigia, aba lígiragüdüni Barawási; lárigiñeti lóunahan abeichei Hesusu, aba lederegeruni lun ládarawagun luagu gurúa.

16 Ábati hanügüni súdaragu lidoun tibürürün luban urúei, aba houndarúniwa sun súdaragu. 17 Aba hadaüraguagüdüni tau aban daüguaü funatu, aba hadügün aban ridi lauti hiiyu, aba híchuguni lábulugu. 18 Aba hagumeserun agúaraha lun, hariñaga:

—Gabagarilá Harúeite Huríu!

19 Aba hagayuahan lábulugun lau aban wewe, aba hásueraguni, aba háhuduragun abusura lun. 20 Lárigiñe héherahan lau ítara, aba haragachunu daüguaü funatu to hadaürüboun luagu, aba hadaürünu ladaüragun luagu. Aba hasagaruni lun hádaraguni luagu gurúa.

21 Ñeinñein aban wügüri Sirenena, gíriti Simón, lúguchi Alehánduru luma Rufu, liábiña áraabugiñe; dan le lásügürünbei ñéingiñe, aba hafosuruni lun lanügüni luguruan Hesusu.

22 Aba hanügüni Hesusu lidoun aban fulasu gíriti Gólugota (mini lan lira, «Lubara Labu Úgubu».) 23 Aba híchugun diwéin mígisiñu lau mira lun, gama lumoun matun lumutu. 24 Ábati hádaraguni luagu gurúa; aba háhurerun súdara ubunuruni lun harihin kaba lan hádangiñe eredera tau ladaüragun.

25 Ladaünrün nefu binaafin hádaraguei Hesusu luagu gurúa. 26 Aba labürüdǘniwa lidurun ñein: «Harúeite Huríu». 27 Dáguatiña giñe bián híwerutiña luagu gurúa úara luma, aban luéigiñe lóunwenren, aban luéigiñe lubaünan.

29 Dan le buriti hásügürün gürigia, aba hánhinhani hachügü lau, aba hanabuni, hariñaga:

—Buguya le ariñagubei luagu fuibounme lan ténpulu, ábaya lanme bararamagüdünu lidan ǘrüwa weyu, 30 sefuguabá bungua; rariba luéigiñe gurúa!

31 Aba giñe héherahan hábutigu fádirigu hama arufudahatiña lilurudun Moisesi lau, aba hariñagun hámagua:

—Séfuti amu, ani siñati lesefuragun lungua! 32 Rarila Kristu, Harúeite Ísüraelina, luéigiñe gurúa guentó wagibugiñe, afiñe wamaamuga luagu!

Anaba hamuti giñe ha dáwaguñubaña luagu gurúa úara luma.

33 Amidirugu, aba laburigadun sun ubóu darí ladaünrün ǘrüwa rábounweyu. 34 Ligía lagúaragun Hesusu, lariñaga: «Eloí, Eloí, lamá sabaktani?» (mini lan lira: «Nubungiute, Nubungiute, ka san uagu bígirana?»)

35 Ñéinñanu hádangiñe ha ñéinbaña aganbuti, aba hariñagun:

—Aganba humá, lagúahaña lun profeta Elíasi.

36 Aba léibaagun aban hádangiñe, aba ladüdüragüdün aban mudusi tau diwéin garühütu, aba líchuguni luagu aban wewe, aba línchuni lun Hesusu lun lachuurunu; lariñagati:

—Ígira waméi guentó, wariha anhein ñübuin Elíasi arariragüdei.

37 Ábati ladügün Hesusu aban agúaraguni héreti, aba lounwen. 38 Aba taheiridagun tubelun ténpulu lidan bián murusun íñugiñe lun ǘnabun. 39 Dan laganbunbalin hábuti súdaragu Rómana le rárabei ligibugiñe Hesusu lagúaragun, arihaléi ida liña lan lounwen, aba lariñagun:

—Inarüni luagu Liráü lan Bungiu wügüri le.

40 Ñéinñanu giñe würiña, aríagutiña dísegiñe; ñeinñoun María Mágüdalena, Salomé tuma María to lúguchu Santiagu le ñǘraütimagilibei, lúguchu giñe Hosé. 41 Würiña ha, falá hamuti Hesusu ani íderagua hamuti dan meha le Galiléañein lubéi. Ñéinñanu giñe saragu amu würiña ha ñǘbuinbaña Herusaléun úara luma Hesusu.

42,43 Lubaragiñe lálüdün weyu, aba liabin Hosé, aban wügüri inebewati hádangiñe liñun-agei lúrudu, le agurabahabálin lagumeserun larúeihan Bungiu tau sun lanigi; lílana fulasu le gíribei Arimatéa. Keiti luéyuri lubéi aransehani lubá luéyuri emeraaguni, aba lebelurun le ñeinhin lubéi Pilatu amuriahei lúgubu Hesusu; úouga ni murusun anufudei lidan. 44 Aba taweiridun lanigi Pilatu dan le laganbunbei luagu hilá lan Hesusu, aba lóunahan luagu aban hábuti súdaragu lun lálügüdüni anhein inarüni lubéi luagu hilá lan. 45 Dan le lariñagunbei lun luagu inarüni lan, aba líchuguni Pilatu lúgubu Hesusu lun Hosé. 46 Ábati lagañeihan Hosé aban gamisa fínutu, aba larariragüdüni lúgubu Hesusu luéigiñe gurúa, aba lóuburaguni tau. Aba líchuguni lidoun aban umúahaü achigiti luagu dübü, aba ladouruni lau aban dübü. 47 Aba tidin María Mágüdalena tuma María to lúguchu Hosé arihei fulasu le ñein lubéi labunúa Hesusu.